ചൈനീസ് രഹസ്യാന്വേഷണ സംഘങ്ങളുമായി ബന്ധമുണ്ടെന്ന സംശയത്തിൽ മേജർ റാങ്കിലുള്ള സൈനിക ഉദ്യോഗസ്ഥന്റെ ഭാര്യയെ രഹസ്യാന്വേഷണ വിഭാഗം കസ്റ്റഡിയിലെടുത്ത് ചോദ്യം ചെയ്തതായി റിപ്പോർട്ട്. തെലങ്കാന സ്വദേശിനിയായ യുവതിയെ പത്താൻകോട്ടിലേക്ക് പോകുന്നതിനായി റെയിൽവേ സ്റ്റേഷനിലെത്തിയപ്പോഴാണ് സെൻട്രൽ ഇന്റലിജൻസ് ബ്യൂറോ ഉദ്യോഗസ്ഥർ കസ്റ്റഡിയിലെടുത്തത്.
സൈനിക സുരക്ഷാ സംവിധാനങ്ങളുമായി ബന്ധപ്പെട്ട വിഷയങ്ങളിൽ ഗവേഷണം നടത്തിയിരുന്ന യുവതിയുമായി ചൈനീസ് രഹസ്യാന്വേഷണ ഏജന്റുമാർ വ്യാജ ഗവേഷകരുടെ വേഷത്തിൽ ബന്ധം സ്ഥാപിച്ചെന്നാണ് അന്വേഷണ ഏജൻസികൾ സംശയിക്കുന്നത്. പരിസ്ഥിതി, ഭൗമരാഷ്ട്രീയം തുടങ്ങിയ വിഷയങ്ങളിൽ ലേഖനങ്ങളും ഗവേഷണ കുറിപ്പുകളും തയ്യാറാക്കാനെന്ന ആവശ്യവുമായാണ് ആദ്യം ഇവരെ സമീപിച്ചതെന്നാണ് വിവരം. പിന്നീട് സൈനിക പ്രതിരോധവുമായി ബന്ധപ്പെട്ട വിഷയങ്ങളിൽ വിവരങ്ങൾ തേടിയതായും റിപ്പോർട്ടുകളുണ്ട്.
യുവതിയുടെ ഗവേഷണ പ്രവർത്തനങ്ങളെ വിദേശ രഹസ്യാന്വേഷണ ഏജൻസികൾ ഉപയോഗപ്പെടുത്തിയിട്ടുണ്ടോയെന്നാണ് പ്രധാനമായും പരിശോധിക്കുന്നത്. സൈനിക സുരക്ഷാ സംവിധാനങ്ങളുമായി ബന്ധപ്പെട്ട വിവരങ്ങൾ ശേഖരിക്കുകയായിരുന്നു ബന്ധം സ്ഥാപിച്ചതിന്റെ ലക്ഷ്യമെന്നും സംശയമുണ്ട്. യുവതിക്ക് വിദേശ ഏജന്റുമാരുമായി ഉണ്ടായിരുന്ന ആശയവിനിമയത്തിന്റെ സ്വഭാവവും അന്വേഷണ സംഘം പരിശോധിക്കുന്നുണ്ട്.
സൈനിക രഹസ്യങ്ങളുമായി ബന്ധപ്പെട്ട രേഖകളോ ചിത്രങ്ങളോ ഇലക്ട്രോണിക് വിവരങ്ങളോ യുവതി ശേഖരിച്ചിട്ടുണ്ടോ, അവ വിദേശ ഏജന്റുമാർക്ക് കൈമാറിയിട്ടുണ്ടോ തുടങ്ങിയ കാര്യങ്ങളിൽ ഇതുവരെ വ്യക്തത വന്നിട്ടില്ല. സംഭവത്തിൽ യുവതിയുടെ പങ്ക് എന്താണെന്നും അവർ അറിഞ്ഞുകൊണ്ടാണോ ഇത്തരം നീക്കങ്ങളുടെ ഭാഗമായതെന്നും സ്ഥിരീകരിക്കേണ്ടതുണ്ട്.
അതേസമയം, സംഭവവുമായി ബന്ധപ്പെട്ട് അധികൃതർ കൂടുതൽ വിവരങ്ങൾ പുറത്തുവിട്ടിട്ടില്ല. യുവതിക്കെതിരായ സംശയങ്ങൾ ഔദ്യോഗികമായി സ്ഥിരീകരിച്ചിട്ടുമില്ല.
