ന്യൂഡൽഹി: രാജ്യത്തെ ഉന്നതവിദ്യാഭ്യാസ സ്ഥാപനങ്ങളിലെ ഭരണപ്രതിസന്ധിക്കും അധ്യാപക ക്ഷാമത്തിനും അറുതിവരുത്താൻ നിർണ്ണായക ഇടപെടലുമായി സുപ്രീം കോടതി. സർവ്വകലാശാലകളിലെയും കോളേജുകളിലെയും എല്ലാ അധ്യാപക-അനധ്യാപക ഒഴിവുകളും നാല് മാസത്തിനകം നികത്തണമെന്ന് കോടതി ഉത്തരവിട്ടു. വൈസ് ചാൻസലർമാർ, രജിസ്ട്രാർമാർ തുടങ്ങിയ സുപ്രധാന തസ്തികകളിൽ ഒഴിവ് വന്ന് ഒരു മാസത്തിനകം നിയമനം പൂർത്തിയാക്കണമെന്നും ജസ്റ്റിസ് ജെ.ബി. പർദിവാല, ജസ്റ്റിസ് ആർ. മഹാദേവൻ എന്നിവരടങ്ങിയ ബെഞ്ച് നിർദ്ദേശിച്ചു.
കോടതി നിരീക്ഷണത്തിലെ പ്രധാന പോയിന്റുകൾ:
വിദ്യാർത്ഥി ക്ഷേമം മുൻനിർത്തി: വിസിമാരുടെ അഭാവവും അധ്യാപക ക്ഷാമവും വിദ്യാർത്ഥികളുടെ മാനസികാരോഗ്യത്തെയും പഠനനിലവാരത്തെയും ബാധിക്കുന്നു. കൃത്യമായ മാർഗ്ഗനിർദ്ദേശം ലഭിക്കാത്തത് വിദ്യാർത്ഥികളിൽ സമ്മർദ്ദം വർദ്ധിപ്പിക്കാൻ കാരണമാകുന്നു.
മുൻകൂട്ടി പ്ലാൻ ചെയ്യണം: വിരമിക്കൽ തീയതികളും കാലാവധി അവസാനിക്കുന്നതും നേരത്തെ അറിയാവുന്ന കാര്യങ്ങളാണ്. അതിനാൽ ഭരണപരമായ കാലതാമസം ഒരു ഒഴികഴിവായി സ്വീകരിക്കാനാവില്ല.
സംവരണ തസ്തികകൾക്ക് മുൻഗണന: പാർശ്വവൽക്കരിക്കപ്പെട്ട വിഭാഗങ്ങൾക്കും ഭിന്നശേഷിക്കാർക്കുമായുള്ള സംവരണ തസ്തികകൾ നികത്തുന്നതിന് മുൻഗണന നൽകണം. ബാക്ക്ലോഗ് ഒഴിവുകൾക്കായി പ്രത്യേക റിക്രൂട്ട്മെന്റ് ഡ്രൈവുകൾ നടത്താനും കോടതി അനുമതി നൽകി.
എന്തുകൊണ്ട് ഈ ഇടപെടൽ?
രാജ്യത്തെ ഉന്നതവിദ്യാഭ്യാസ സ്ഥാപനങ്ങളിൽ വർദ്ധിച്ചുവരുന്ന വിദ്യാർത്ഥി ആത്മഹത്യകളെക്കുറിച്ച് പഠിക്കാൻ നിയോഗിച്ച ദേശീയ ടാസ്ക് ഫോഴ്സിന്റെ ഇടക്കാല റിപ്പോർട്ട് പരിഗണിച്ചാണ് കോടതിയുടെ ഈ നീക്കം. അധ്യാപകരുടെ അമിത ജോലിഭാരം, സ്ഥിരമായ നേതൃത്വമില്ലായ്മ, അക്കാദമിക് സമ്മർദ്ദം എന്നിവയാണ് പ്രധാന പ്രശ്നങ്ങളായി ടാസ്ക് ഫോഴ്സ് ചൂണ്ടിക്കാട്ടിയത്.
സുതാര്യത ഉറപ്പാക്കാൻ കർശന നിർദ്ദേശങ്ങൾ:
നിയമനങ്ങളിൽ സുതാര്യത ഉറപ്പാക്കാൻ വിദ്യാഭ്യാസ സ്ഥാപനങ്ങൾ ഇനി മുതൽ കേന്ദ്ര-സംസ്ഥാന സർക്കാരുകൾക്ക് വാർഷിക റിപ്പോർട്ട് സമർപ്പിക്കണം.
ഒഴിഞ്ഞുകിടക്കുന്ന സംവരണ തസ്തികകളുടെ വിവരം.
എത്ര തസ്തികകൾ നികത്തി.
നിയമനം വൈകുന്നുണ്ടെങ്കിൽ അതിന്റെ കാരണം.
റിക്രൂട്ട്മെന്റിനായി എടുത്ത സമയം.
ഭരണപരമായ കാര്യക്ഷമത ഓപ്ഷണൽ അല്ലെന്നും വിദ്യാഭ്യാസ സ്ഥാപനങ്ങളുടെ സുഗമമായ പ്രവർത്തനത്തിന് അത് അത്യാവശ്യമാണെന്നും കോടതി ഓർമ്മിപ്പിച്ചു.
