ദോഹ: ആഗോള വിതരണ ശൃംഖല നേരിടുന്ന വെല്ലുവിളികൾ കണക്കിലെടുത്ത് സ്വകാര്യ മേഖലയെയും ലോജിസ്റ്റിക് രംഗത്തെയും പിന്തുണയ്ക്കുന്നതിനായി പോർട്ട് താരിഫുകളിൽ (തുറമുഖ നിരക്കുകൾ) ഇളവുകൾ പ്രഖ്യാപിച്ച് ഖത്തർ പോർട്ട് മാനേജ്‌മെന്റ് കമ്പനി (മവാനി ഖത്തർ). ഗതാഗത മന്ത്രാലയത്തിന്റെ തന്ത്രപരമായ പദ്ധതികളുടെ ഭാഗമായാണ് ഈ നടപടി.
നിലവിലെ അസാധാരണമായ സാഹചര്യങ്ങൾ സപ്ലൈ ചെയിൻ പ്രവർത്തനങ്ങളെ ബാധിച്ച പശ്ചാത്തലത്തിലാണ് നിരക്കുകളിൽ ഭേദഗതി വരുത്തിക്കൊണ്ടുള്ള മവാനി ഖത്തറിന്റെ പ്രഖ്യാപനം. സ്വകാര്യ മേഖലയുമായുള്ള പങ്കാളിത്തം ശക്തിപ്പെടുത്തുന്നതിനൊപ്പം രാജ്യത്തെ ഇറക്കുമതി-കയറ്റുമതി പ്രവർത്തനങ്ങൾ തടസ്സമില്ലാതെ തുടരുന്നുവെന്ന് ഉറപ്പാക്കുകയുമാണ് ഇതിലൂടെ ലക്ഷ്യമിടുന്നത്.ഉപഭോക്താക്കളുടെ സാമ്പത്തിക ബാധ്യത കുറയ്ക്കുന്നതിനായി നിശ്ചിത താരിഫ് ഇനങ്ങളിൽ ഇളവുകൾ അനുവദിച്ചു.വിവിധ വാണിജ്യ മേഖലകളുടെ ആവശ്യങ്ങൾക്കനുസൃതമായി കൂടുതൽ വഴക്കമുള്ള സ്റ്റോറേജ് ഓപ്ഷനുകൾ ലഭ്യമാക്കും.വിതരണ ശൃംഖലയിലെ വെല്ലുവിളികൾ മറികടന്ന് അവശ്യ സാധനങ്ങളുടെ ലഭ്യതയും ബിസിനസ്സ് തുടർച്ചയും ഉറപ്പാക്കും.
ഗതാഗത മന്ത്രാലയത്തിന്റെ ഔദ്യോഗിക 'X' (ട്വിറ്റർ) അക്കൗണ്ടിലൂടെയാണ് ഈ വിവരം പുറത്തുവിട്ടത്. നിലവിലെ സവിശേഷ സാഹചര്യം തുടരുന്നിടത്തോളം കാലം ഈ ഇളവുകൾ പ്രാബല്യത്തിലുണ്ടാകുമെന്നും മവാനി ഖത്തർ അറിയിച്ചു. ലോജിസ്റ്റിക്സ് രംഗത്തെ ചെലവ് കുറയുന്നത് വിപണിയിൽ ഗുണകരമായ മാറ്റങ്ങൾ കൊണ്ടുവരുമെന്നാണ് വിലയിരുത്തപ്പെടുന്നത്.
