ദുബായ്: പിണറായി വിജയൻ വീണ്ടും മുഖ്യമന്ത്രിയായി തിരിച്ചെത്തുമെന്ന് വ്യവസായി എം. എ. യൂസഫലി. അതേസമയം, താനൊരു രാഷ്ട്രീയക്കാരനല്ലെന്നും അദ്ദേഹം ചൂണ്ടിക്കാട്ടി. കേരളത്തോട് യുഎഇ ഭരണാധികാരികൾക്കുള്ള സ്നേഹത്തെ കുറിച്ചും അദ്ദേഹം വ്യക്തമാക്കി. ഓർമ്മ കേരളോത്സവത്തിൽ സംസാരിക്കവെയാണ് എം എ യൂസഫലി ഇക്കാര്യങ്ങൾ പറഞ്ഞത്.
തനിക്ക് രാഷ്ട്രീയവുമായി ബന്ധമില്ലെന്നും താൻ ഒരു ബിസിനസ്സുകാരനാണെന്നും അദ്ദേഹം വ്യക്തമാക്കി. “മുഖ്യമന്ത്രിയേയും പ്രധാനമന്ത്രിയേയും ഒരുപോലെ ആദരിച്ച് സ്വീകരിക്കുന്നതാണ് ഈ നാട്. എല്ലാകാര്യത്തിലും മത സൗഹാർദ്ദവും ഐക്യവും നിലനിൽക്കുന്ന രാജ്യമാണിത്” എന്നും യൂസഫലി പറഞ്ഞു.
52 വർഷം മുമ്പാണ് താൻ യുഎഇയിൽ എത്തിയത് എന്നും ഈ രാജ്യം തനിക്ക് എല്ലാം നൽകിയെന്നും അദ്ദേഹം ഓർമ്മപ്പെടുത്തി. “കേരളവും കേരളീയരും യുഎഇ ഭരണാധികാരികളുടെ ഹൃദയത്തിലാണ്. ഈ രാജ്യത്തിന്റെ പുരോഗതിയിൽ മലയാളികൾ നിർണായക പങ്ക് വഹിക്കുന്നു. ഇവിടെ ഭരണാധികാരികൾ നൽകുന്നത് സ്നേഹവും സഹോദര്യവുമാണ്. ഇവിടെയുള്ള രാഷ്ട്രീയമെന്നത് ദിവസേന ജീവിതവുമായി ബന്ധപ്പെടുന്ന വിഷയങ്ങളാണ്” എന്നും യൂസഫലി കൂട്ടിച്ചേർത്തു.
