പ്രശസ്ത സിനിമാ നിർമ്മാണ കമ്പനിയായ ലൈക്ക പ്രൊഡക്ഷൻസ് ഉടൻ പ്രവർത്തനം നിർത്തുമെന്ന് റിപ്പോർട്ട്. ജേസൺ സഞ്ജയ് നായകനായ വരാനിരിക്കുന്ന ചിത്രം നിർമ്മിച്ചതിന് ശേഷം കമ്പനി അടച്ചുപൂട്ടും എന്നാണ് റിപ്പോർട്ട്. ലൈക്ക പ്രൊഡക്ഷൻസ് നിർമ്മിച്ച ചിത്രങ്ങൾ തുടർച്ചയായി പരാജയപ്പെട്ടതോടെ വലിയ സാമ്പത്തിക പ്രതിസന്ധിയാണ് കമ്പനി നേരിടുന്നതെന്നാണ് സൂചന. ഇതോടെയാണ് കമ്പനി അടച്ചുപൂട്ടുന്നത്.  

മോഹൻലാൽ, പൃഥ്വിരാജ് കൂട്ടുകെട്ടിൽ ഒരുങ്ങുന്ന മലയാളത്തിലെ ബിഗ് ബഡ്‌ജറ്റ് ചിത്രം എമ്പുരാനിൽ നിന്നും ലൈക്ക പ്രൊഡക്ഷൻസ് പിൻമാറിയിരുന്നു. ആന്റണി പെരുമ്പാവൂരിന്റെ ആശിർവാദ് സിനിമാസും സുഭാസ്‌കരന്റെ ലൈക്കയും ചേർന്നായിരുന്നു ചിത്രത്തിന്റെ നിർമാണം.  ഗോകുലം ഗോപാലന്റെ ഉടമസ്ഥതയിലുള്ള ശ്രീ ഗോകുലം മൂവീസ് ലൈക്കയുടെ ഷെയർ ഏറ്റെടുക്കുമെന്നാണ് വിവരം.  ഏകദേശം 75 കോടി രൂപയാണ് ചിത്രത്തിന് വേണ്ടി ലൈക്ക നിക്ഷേപിച്ചത്. 

2014 ൽ ദളപതി വിജയ് നായകനായ കത്തി എന്ന ചിത്രത്തിലൂടെയാണ് ലൈക്ക പ്രൊഡക്ഷൻസ് സിനിമാ മേഖലയിൽ സാന്നിധ്യം ഉറപ്പിച്ചത്. 2.0, ചന്ദ്രമുഖി 2, ലാൽ സലാം, ദർബാർ, കാപ്പാൻ, രാം സേതു തുടങ്ങിയ സിനിമകളെല്ലാം നിർമ്മാണ സ്ഥാപനത്തിന്റെ സാമ്പത്തിക പ്രതിസന്ധികൾക്ക് കാരണമായി. ഇന്ത്യൻ 2, വേട്ടയ്യാൻ, വിദാമുയാർച്ചി തുടങ്ങിയ വലിയ ബജറ്റ് ചിത്രങ്ങളിൽ നിന്നുള്ള സമീപകാല നഷ്ടങ്ങൾ സ്ഥിതി കൂടുതൽ വഷളാക്കി.

പ്രൊഡക്ഷൻ ഹൗസിന്റെ മാതൃ കമ്പനിയായ ലൈക്ക മൊബൈൽ ഫ്രാൻസിലും യുണൈറ്റഡ് ബ്രിട്ടനിലും നികുതി, കള്ളപ്പണം വെളുപ്പിക്കൽ തട്ടിപ്പ് കേസുകൾ നേരിടുന്നുണ്ട്, ഇത് കാര്യമായ സാമ്പത്തിക പ്രശ്‌നങ്ങൾക്ക് കാരണമായി. തൽഫലമായി, സിനിമകളിൽ നിക്ഷേപിക്കുന്നത് തൽക്കാലം നിർത്താൻ ലൈക്ക പ്രൊഡക്ഷൻസ് തീരുമാനിക്കുകയായിരുന്നു.