ദോഹ: പ്രമുഖ അന്താരാഷ്ട്ര മാധ്യമമായ 'ദി വാഷിംഗ്ടൺ പോസ്റ്റിന്റെ' ഇന്റലിജൻസ് ആൻഡ് അഡ്വൈസറി പ്ലാറ്റ്‌ഫോം രൂപീകരിച്ച ആർട്ടിഫിഷ്യൽ ഇന്റലിജൻസ് & ടെക്‌നോളജി കൗൺസിലിലേക്ക് (Council on AI & Technology) ലുലു ഫിനാൻഷ്യൽ ഹോൾഡിംഗ്സ് മാനേജിംഗ് ഡയറക്ടർ അദീബ് അഹമ്മദിനെ നിയമിച്ചു. നിർമ്മിത ബുദ്ധി (AI), വളർന്നുവരുന്ന അത്യാധുനിക സാങ്കേതികവിദ്യകൾ, ഡിജിറ്റൽ പരിവർത്തനം എന്നിവയിൽ ആഗോള നയരൂപീകരണത്തിനും വ്യവസായ നവീകരണത്തിനുമായി പ്രവർത്തിക്കുന്ന ആഗോള നേതൃത്വ കൂട്ടായ്മയാണിത്.
​മിഡിൽ ഈസ്റ്റിൽ നിന്ന് ഈ ഉന്നത കൗൺസിലിലേക്ക് തിരഞ്ഞെടുക്കപ്പെടുന്ന ആദ്യത്തെ ബിസിനസ്സ് നേതാക്കളിൽ ഒരാളാണ് മലയാളി കൂടിയായ അദീബ് അഹമ്മദ്. AI അടിസ്ഥാനമാക്കിയുള്ള നവീകരണങ്ങൾ, ഡിജിറ്റൽ ഇൻഫ്രാസ്ട്രക്ചർ, അടുത്ത തലമുറ ധനകാര്യ സംവിധാനങ്ങൾ എന്നിവയിൽ അതിവേഗം വളരുന്ന ഗൾഫ് മേഖലയുടെ കാഴ്ചപ്പാടുകൾ അന്താരാഷ്ട്ര തലത്തിൽ അവതരിപ്പിക്കാൻ ഈ പങ്കാളിത്തത്തിലൂടെ അദ്ദേഹത്തിന് സാധിക്കും. ആഗോള എഐ ചർച്ചകളിൽ സാമ്പത്തിക സേവനങ്ങൾക്കും അതിർത്തി കടന്നുള്ള പണമിടപാട് സംവിധാനങ്ങൾക്കും (Cross-border payments) വർദ്ധിച്ചുവരുന്ന പ്രാധാന്യത്തിന്റെ തെളിവ് കൂടിയാണ് ഈ നിയമനം.
അദീബ് അഹമ്മദിന്റെ നേതൃത്വത്തിൽ ലുലു ഫിനാൻഷ്യൽ ഹോൾഡിംഗ്സ് ഇന്ന് ജി.സി.സി, ഇന്ത്യൻ ഉപഭൂഖണ്ഡം, ഏഷ്യാ പസഫിക് മേഖലകളിൽ വ്യാപിച്ചുകിടക്കുന്ന പ്രമുഖ ധനകാര്യ സ്ഥാപനങ്ങളിലൊന്നാണ്. ഫിൻടെക് നവീകരണങ്ങൾക്കും ഡിജിറ്റൽ സാമ്പത്തിക ഉൾപ്പെടുത്തലുകൾക്കും (Digital financial inclusion) വലിയ പ്രാധാന്യമാണ് സ്ഥാപനം നൽകുന്നത്.
​"കൃത്യമായ നവീകരണവും അടിസ്ഥാന സൗകര്യങ്ങളും ആഗോള കണക്റ്റിവിറ്റിയും ഒരുമിച്ച് കൊണ്ടുപോകാൻ സാധിക്കുന്ന മേഖലകളാണ് നിർമ്മിത ബുദ്ധിയുടെ (AI) ഭാവി നിർണ്ണയിക്കുക. ദീർഘവീക്ഷണമുള്ള നേതൃത്വത്തിന്റെ കരുത്തിൽ ജി.സി.സി ഉൾപ്പെടെയുള്ള മിഡിൽ ഈസ്റ്റ് രാജ്യങ്ങൾ ഇന്ന് ഇതിന്റെ പ്രധാന കേന്ദ്രമായി മാറിക്കഴിഞ്ഞു. ആഗോള വാണിജ്യത്തിന്റെയും സാമ്പത്തിക രംഗത്തിന്റെയും ഹബ്ബായി നിൽക്കുന്ന ഒരു മേഖലയിൽ നിന്നുള്ള കാഴ്ചപ്പാടുകൾ ഈ കൗൺസിലിൽ പങ്കുവെക്കാൻ സാധിക്കുന്നതിൽ സന്തോഷമുണ്ടെന്ന് 
അദീബ് അഹമ്മദ് പറഞ്ഞു.ആഗോളതലത്തിൽ വാണിജ്യം, സാമ്പത്തിക ലഭ്യത, നിയമപാലനം, തത്സമയ ആഗോള കണക്റ്റിവിറ്റി എന്നിവ രൂപപ്പെടുത്തുന്നതിൽ വളർന്നുവരുന്ന സാങ്കേതികവിദ്യകൾക്കുള്ള പങ്ക് വലുതാണെന്നും, അതിവേഗം മാറുന്ന സാങ്കേതിക വിദ്യകളെ കൗൺസിലിലൂടെ കൃത്യമായി വിലയിരുത്താൻ സാധിക്കുമെന്നും അദ്ദേഹം കൂട്ടിച്ചേർത്തു. ടെലിവിഷൻ, സിനിമ, മാധ്യമം, സാങ്കേതികവിദ്യ തുടങ്ങിയ രംഗങ്ങളിലെ മികവിനെ പ്രോത്സാഹിപ്പിക്കുന്ന വാഷിംഗ്ടൺ പോസ്റ്റിന്റെ ഈ കൗൺസിലിലേക്ക് അദീബ് അഹമ്മദ് നിയമിതനായത് ഗൾഫ് മേഖലയിലെ ബിസിനസ്സ് സമൂഹത്തിന് ലഭിച്ച വലിയൊരു അംഗീകാരമാണ്.