തിരുവനന്തപുരം: ബീമാപള്ളി ദർഗ്ഗാ ഷറീഫിലെ വാർഷിക ഉറൂസ് മഹോത്സവത്തിന്റെ പശ്ചാത്തലത്തിൽ, 2025 നവംബർ 22-ന് (ശനിയാഴ്ച) തിരുവനന്തപുരം നഗരസഭാ പരിധിയിലെ സ്ഥാപനങ്ങൾക്ക് പ്രാദേശിക അവധി അനുവദിച്ച് ജില്ലാ കളക്ടർ അനുകുമാരി ഐ.എ.എസ്. ഉത്തരവിറക്കി. 2025 നവംബർ 19-നാണ് ഈ നടപടിക്രമം പുറത്തിറങ്ങിയത്.
നവംബർ 22 മുതൽ ഡിസംബർ 2 വരെയാണ് ഇത്തവണത്തെ ഉറൂസ് മഹോത്സവം നിശ്ചയിച്ചിരിക്കുന്നത്. ഉറൂസിന്റെ ആദ്യ ദിവസമായ നവംബർ 22-ന് പ്രാദേശിക അവധി അനുവദിക്കുന്നതിന് സർക്കാർ നേരത്തെ മുൻകൂർ അനുമതി നൽകിയിരുന്നു.
ജില്ലാ കളക്ടറുടെ നടപടിക്രമം അനുസരിച്ച്, നഗരസഭാ പരിധിയിലുള്ള എല്ലാ വിദ്യാഭ്യാസ സ്ഥാപനങ്ങൾക്കും സംസ്ഥാന സർക്കാർ സ്ഥാപനങ്ങൾക്കും ഈ പ്രാദേശിക അവധി ബാധകമാകും.
എങ്കിലും, അവധിയിൽ നിന്ന് ചില സ്ഥാപനങ്ങളെ ഒഴിവാക്കിയിട്ടുണ്ട്. നഗരസഭാ പ്രദേശത്ത് പ്രവർത്തിക്കുന്ന എല്ലാ തദ്ദേശ സ്വയംഭരണ സ്ഥാപനങ്ങളെയും, പൊതു തിരഞ്ഞെടുപ്പുമായി ബന്ധപ്പെട്ട് പ്രവർത്തിക്കുന്ന എല്ലാ സർക്കാർ സ്ഥാപനങ്ങളെയും അവധിയിൽ നിന്ന് ഒഴിവാക്കിയിട്ടുണ്ട്. ഇലക്ഷൻ ഡെപ്യൂട്ടി കളക്ടറുടെ നിർദ്ദേശപ്രകാരമാണ് ഈ ഒഴിവാക്കൽ.
കൂടാതെ, മുൻകൂട്ടി നിശ്ചയിച്ചിട്ടുള്ള പൊതുപരീക്ഷകൾക്ക് ഈ പ്രാദേശിക അവധി ബാധകമായിരിക്കില്ല എന്നും ഉത്തരവിൽ പ്രത്യേകം പറയുന്നു.
