തിരുവനന്തപുരം:സംസ്ഥാനത്ത് തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പ് നവംബർ-ഡിസംബർ മാസങ്ങളിൽ നടക്കുമെന്ന് സംസ്ഥാന തിരഞ്ഞെടുപ്പ് കമ്മിഷണർ എ. ഷാജഹാൻ അറിയിച്ചു. ഡിസംബർ 20-ന് മുൻപ് പുതിയ ഭരണസമിതി അധികാരമേൽക്കും. ഇതിനായി വോട്ടർ പട്ടിക ഒരു തവണകൂടി പുതുക്കും.
തിരഞ്ഞെടുപ്പ് എത്ര ഘട്ടങ്ങളായി നടത്തണം എന്നതിൽ അന്തിമ തീരുമാനമായിട്ടില്ല. സംസ്ഥാന സർക്കാർ, പോലീസ് മേധാവി, ചീഫ് സെക്രട്ടറി, രാഷ്ട്രീയ പാർട്ടികൾ എന്നിവരുമായി കൂടിയാലോചിച്ച ശേഷമായിരിക്കും ഇത് സംബന്ധിച്ച തീരുമാനം.
കഴിഞ്ഞ തവണ കോവിഡ് സാഹചര്യത്തിൽ മൂന്ന് ഘട്ടങ്ങളായിട്ടായിരുന്നു വോട്ടെടുപ്പ്. എന്നാൽ ഇത്തവണ വോട്ടർമാരുടെ എണ്ണം വർധിച്ചതും ഒരു ബൂത്തിലെ വോട്ടർമാരുടെ എണ്ണം 1200 ആയി കുറച്ചതും ബൂത്തുകളുടെ എണ്ണം കൂട്ടിയതും പരിഗണിച്ച് വോട്ടെടുപ്പ് ക്രമീകരിക്കും. ഒക്ടോബർ 13 മുതൽ 21 വരെയായിരിക്കും സംവരണ വാർഡുകളിലെ നറുക്കെടുപ്പ് നടക്കുക.
