തിരുവനന്തപുരം: സംസ്ഥാനത്തെ വാഹന ഉടമകൾക്കും ഡ്രൈവർമാർക്കും വലിയ ആശ്വാസം നൽകുന്ന പ്രഖ്യാപനവുമായി ഗതാഗത വകുപ്പ്. അഞ്ചുതവണ ഗതാഗത നിയമം ലംഘിക്കുന്നവരുടെ ലൈസൻസ് റദ്ദാക്കണമെന്ന കേന്ദ്ര നിയമഭേദഗതി കേരളത്തിൽ ഉടൻ നടപ്പാക്കില്ലെന്ന് ഗതാഗത മന്ത്രി കെ.ബി. ഗണേശ് കുമാർ അറിയിച്ചു. നിയമസഭാ തിരഞ്ഞെടുപ്പ് അടുത്തിരിക്കുന്ന സാഹചര്യത്തിൽ, കടുത്ത നടപടികൾ ജനങ്ങൾക്കിടയിൽ പ്രതിഷേധമുണ്ടാക്കുമെന്ന വിലയിരുത്തലിനെത്തുടർന്നാണ് ഈ പിന്മാറ്റം.
ലഘൂകരിക്കാൻ ചർച്ചകൾ
കേന്ദ്ര നിയമങ്ങൾ അതേപടി നടപ്പാക്കുന്നത് സാധാരണക്കാർക്ക് വലിയ ബുദ്ധിമുട്ടുണ്ടാക്കുമെന്ന് മന്ത്രി വ്യക്തമാക്കി. അപകടങ്ങൾ കുറയ്ക്കാൻ കർശന നിയമങ്ങൾ ആവശ്യമാണെങ്കിലും, കേന്ദ്ര മോട്ടോർ വാഹന നിയമത്തിലെ വ്യവസ്ഥകൾ കേരളത്തിന്റെ സാഹചര്യത്തിനനുസരിച്ച് എങ്ങനെ ലഘൂകരിക്കാം എന്നതിനെക്കുറിച്ച് ഗതാഗത കമ്മിഷണറുമായി ചർച്ച നടത്തി മാത്രമേ അന്തിമ തീരുമാനമെടുക്കൂ.
പിഴയടക്കാൻ 'ഡിസ്‌കൗണ്ട്' വരുന്നു
ക്യാമറകൾ വഴിയും മറ്റും ലഭിക്കുന്ന വലിയ തുകയുടെ പിഴകൾ (ചെലാൻ) അടച്ചുതീർക്കാൻ വാഹന ഉടമകൾക്ക് പ്രത്യേക ഇളവുകൾ നൽകുന്നതിനെക്കുറിച്ച് മോട്ടോർ വാഹന വകുപ്പ് ആലോചിക്കുന്നുണ്ട്. പിഴത്തുക കുമിഞ്ഞുകൂടിയത് കാരണം പലരും അത് അടയ്ക്കാൻ തയ്യാറാകാത്ത സാഹചര്യത്തിലാണിത്. 'ഒറ്റത്തവണ തീർപ്പാക്കൽ' പദ്ധതിയിലൂടെ തുക കുറച്ചുനൽകിയാൽ കുടിശിക വേഗത്തിൽ പിരിച്ചെടുക്കാനാകുമെന്ന് എം.വി.ഡി കരുതുന്നു.
സേവനങ്ങളിലെ തടസ്സം ഒഴിവാക്കും
നിലവിലെ ഭേദഗതി പ്രകാരം പിഴ അടച്ചില്ലെങ്കിൽ ഇൻഷുറൻസ് പുതുക്കാനോ പുകപരിശോധന നടത്താനോ സാധിക്കില്ല. ഇത്തരം കർശനമായ നിയന്ത്രണങ്ങൾ സാധാരണക്കാരെ വലയ്ക്കുന്നതിനാൽ, ഇതിൽ ഇളവ് നൽകുന്നത് സംബന്ധിച്ചും ചർച്ചകൾ നടക്കും. നികുതി അടയ്ക്കുന്നതിനോ വാഹനം സംബന്ധിച്ച മറ്റ് സേവനങ്ങൾക്കോ നിലവിലുള്ള തടസ്സങ്ങൾ നീക്കാനാണ് സർക്കാർ ലക്ഷ്യമിടുന്നത്.
