ദോഹ: ഓഗസ്റ്റ് മാസം അർബുദ ബോധവൽക്കരണ മാസമായി ആചരിക്കുന്നതിന്റെ ഭാഗമായി, രക്തത്തെ ബാധിക്കുന്ന വിവിധതരം അർബുദങ്ങളെക്കുറിച്ച് (Blood Cancer) ജനങ്ങളിൽ അവബോധം സൃഷ്ടിക്കുന്നതിനായി ഒരു മാസം നീണ്ടുനിൽക്കുന്ന പ്രചാരണ പരിപാടിക്ക് ഖത്തർ പൊതുജനാരോഗ്യ മന്ത്രാലയം (MoPH) തുടക്കമിട്ടു. ഹമദ് മെഡിക്കൽ കോർപ്പറേഷൻ (HMC), പ്രൈമറി ഹെൽത്ത് കെയർ കോർപ്പറേഷൻ (PHCC) എന്നിവയുമായി സഹകരിച്ചാണ് പദ്ധതി നടപ്പിലാക്കുന്നത്.
രോഗലക്ഷണങ്ങൾ നേരത്തെ തിരിച്ചറിയേണ്ടതിന്റെ പ്രാധാന്യവും രാജ്യത്ത് ലഭ്യമായ അത്യാധുനിക ചികിത്സാ സൗകര്യങ്ങളെക്കുറിച്ചും മന്ത്രാലയം വ്യക്തമാക്കി. മജ്ജയെയോ ലിംഫാറ്റിക് വ്യവസ്ഥയെയോ ബാധിക്കുന്ന രക്താർബുദങ്ങളിൽ, ഖത്തറിൽ ഏറ്റവും കൂടുതൽ കണ്ടുവരുന്നത് ലുക്കീമിയ (Leukaemia) ആണെന്ന് ദേശീയ കണക്കുകൾ വ്യക്തമാക്കുന്നു. മൈലോമ, ലിംഫോമ എന്നിവയാണ് മറ്റു പ്രധാന വിഭാഗങ്ങൾ.
രോഗം നേരത്തെ കണ്ടുപിടിക്കുന്നതിലൂടെ പൂർണമായി സൗഖ്യമാക്കാൻ സാധിക്കുമെന്ന് മന്ത്രാലയം ഓർമ്മിപ്പിച്ചു. കീമോതെറാപ്പി, റേഡിയേഷൻ, ടാർഗെറ്റഡ് തെറാപ്പി, ഇമ്മ്യൂണോതെറാപ്പി, സ്റ്റെം സെൽ (മജ്ജ) മാറ്റിവെക്കൽ എന്നിവയുൾപ്പെടെയുള്ള അത്യാധുനിക ചികിത്സകൾ ഖത്തറിൽ ലഭ്യമാണ്.
ആരോഗ്യകരമായ ജീവിതശൈലിയും പോഷകാഹാരവും ശീലമാക്കാനും, സംശയങ്ങൾക്കും സഹായങ്ങൾക്കുമായി ഹമദ് മെഡിക്കൽ കോർപ്പറേഷന്റെ 'നെസ്മാക്' (16060), പ്രൈമറി ഹെൽത്ത് കെയറിന്റെ 'ഹയ്യാക്' (107) എന്നീ നമ്പറുകളിൽ ബന്ധപ്പെടാനും അധികൃതർ അറിയിച്ചു.
