ന്യൂഡൽഹി:​രാജ്യത്ത് പുതിയ ലോ കോളേജുകൾ സ്ഥാപിക്കുന്നതിന് മൂന്ന് വർഷത്തെ വിലക്കേർപ്പെടുത്തി ബാർ കൗൺസിൽ ഓഫ് ഇന്ത്യ (ബിസിഐ). നിയമവിദ്യാഭ്യാസത്തിന്റെ ഗുണനിലവാരം ഉറപ്പാക്കുന്നതിനുള്ള കർശന നടപടിയുടെ ഭാഗമായാണ് ഈ തീരുമാനം. 'റൂൾസ് ഓഫ് ലീഗൽ എഡ്യൂക്കേഷൻ, മൊറട്ടോറിയം (ത്രീ-ഇയർ മൊറട്ടോറിയം) വിത്ത് റെസ്‌പെക്ട് ടു സെന്റേഴ്‌സ് ഓഫ് ലീഗൽ എഡ്യൂക്കേഷൻ, 2025' എന്ന പേരിൽ പുതിയ ചട്ടങ്ങൾ ഉടൻ പ്രാബല്യത്തിൽ വരും.

​ഈ നിയമപ്രകാരം, അടുത്ത മൂന്ന് വർഷത്തേക്ക് പുതിയ ലോ കോളേജുകൾക്ക് അനുമതി നൽകില്ല. നിലവിൽ അപേക്ഷ നൽകി പരിഗണനയിലുള്ള സ്ഥാപനങ്ങൾക്ക് മാത്രമാണ് ഇളവുള്ളത്. കൂടാതെ, നിലവിലുള്ള ലോ കോളേജുകൾക്ക് പുതിയ കോഴ്സുകളോ ബാച്ചുകളോ തുടങ്ങണമെങ്കിൽ ബിസിഐയുടെ പ്രത്യേക അനുമതി ആവശ്യമാണ്.

​നിലവാരമില്ലാത്ത സ്ഥാപനങ്ങൾ വർധിക്കുന്നതും, അമിതമായ വാണിജ്യവൽക്കരണവും നിയമവിദ്യാഭ്യാസത്തിന്റെ നിലവാരം ഇല്ലാതാക്കുന്നുവെന്ന് ബിസിഐ വിലയിരുത്തുന്നു. ഏകദേശം 2,000 നിയമ വിദ്യാഭ്യാസ സ്ഥാപനങ്ങൾ നിലവിൽ രാജ്യത്ത് പ്രവർത്തിക്കുന്നുണ്ട്. ഈ സാഹചര്യത്തിൽ, കൂടുതൽ സ്ഥാപനങ്ങൾ തുടങ്ങുന്നതിന് പകരം നിലവിലുള്ളവയുടെ ഗുണനിലവാരം ഉയർത്തുന്നതിൽ ശ്രദ്ധ കേന്ദ്രീകരിക്കാനാണ് ബിസിഐയുടെ തീരുമാനം.

​മുടക്ക് കാലയളവിൽ, നിലവിലുള്ള സ്ഥാപനങ്ങളിൽ ബിസിഐ കർശന പരിശോധന നടത്തും. നിയമങ്ങൾ പാലിക്കാത്ത സ്ഥാപനങ്ങളുടെ അംഗീകാരം റദ്ദാക്കുക, ബിരുദങ്ങൾ അസാധുവാക്കുക, നിയമനടപടികൾ സ്വീകരിക്കുക തുടങ്ങിയ കർശന നടപടികൾ സ്വീകരിക്കുമെന്ന് ബിസിഐ അറിയിച്ചു. എല്ലാ സംസ്ഥാന സർക്കാരുകളും സർവകലാശാലകളും ഈ നിർദ്ദേശങ്ങൾ പാലിക്കണമെന്ന് ബിസിഐ ആവശ്യപ്പെട്ടിട്ടുണ്ട്.