തിരുവനന്തപുരം: തദ്ദേശ തിരഞ്ഞെടുപ്പിലേറ്റ കനത്ത തിരിച്ചടിയുടെ അലകൾ കേരളത്തിലെ ഇടതുമുന്നണിയിൽ ശക്തമായ ആഭ്യന്തര കലഹത്തിന് തിരികൊളുത്തിയിരിക്കുന്നു. ഭരണത്തിന്റെ വീഴ്ചകൾ തുറന്നടിച്ച് സഖ്യകക്ഷിയായ സി.പി.ഐ രംഗത്തുവന്നതോടെ സി.പി.എമ്മും മുഖ്യമന്ത്രി പിണറായി വിജയനും കടുത്ത പ്രതിരോധത്തിലായി.
തിരഞ്ഞെടുപ്പ് ഫലം വന്നതിന് പിന്നാലെ മണിക്കൂറുകളുടെ വ്യത്യാസത്തിൽ ചേർന്ന സി.പി.എമ്മിന്റെയും സി.പി.ഐയുടെയും സംസ്ഥാന സെക്രട്ടേറിയറ്റുകളാണ് ഈ ഭിന്നത പരസ്യമാക്കിയത്.
സിപിഐയുടെ തുറന്നടി: മുഖ്യമന്ത്രി ഒറ്റയാൾ പട്ടാളം
സി.പി.എം സംസ്ഥാന സെക്രട്ടറി എം.വി. ഗോവിന്ദൻ ഭരണവിരുദ്ധ വികാരമില്ലെന്ന പതിവ് നിലപാട് ആവർത്തിച്ച് മണിക്കൂറുകൾക്കകം, സി.പി.ഐ. സംസ്ഥാന സെക്രട്ടേറിയറ്റ് ചേർന്നത് എം.എൻ. സ്മാരകത്തിലാണ്. അവിടെ ഉയർന്ന വിമർശനങ്ങളുടെയെല്ലാം മുന നീണ്ടത് മുഖ്യമന്ത്രി പിണറായി വിജയനിലേക്കായിരുന്നു.
സി.പി.ഐ. സംസ്ഥാന സെക്രട്ടറി ബിനോയ് വിശ്വം നയിച്ച യോഗത്തിന്റെ പ്രധാന കണ്ടെത്തൽ ഇതായിരുന്നു: "തദ്ദേശ തിരഞ്ഞെടുപ്പിലെ കനത്ത പരാജയത്തിന് കാരണം ഭരണവിരുദ്ധ വികാരം തന്നെയാണ്."
മുഖ്യമന്ത്രിയുടെ പ്രവർത്തന ശൈലിയെ രൂക്ഷമായി വിമർശിച്ച സി.പി.ഐ നേതാക്കൾ, അദ്ദേഹത്തെ ഒരു ‘ഒറ്റയാൾ പട്ടാളം’ പോലെ പ്രവർത്തിക്കുന്ന നേതാവായി ചിത്രീകരിച്ചു. ഈ ശൈലിയും പെരുമാറ്റവും പൊതുജനങ്ങളിൽ വലിയ അമർഷമുണ്ടാക്കി. ആത്മപരിശോധന നടത്തിയില്ലെങ്കിൽ വരാനിരിക്കുന്ന നിയമസഭാ തിരഞ്ഞെടുപ്പിലും പരാജയം ആവർത്തിക്കുമെന്ന മുന്നറിയിപ്പും സി.പി.ഐ. നൽകി.
തോൽവിക്ക് പിന്നിലെ നാല് കാരണങ്ങൾ
സി.പി.ഐയുടെ വിലയിരുത്തലിൽ, സർക്കാരിന്റെ നയം തെറ്റിയ നാല് പ്രധാന വിഷയങ്ങളാണ് ജനവിശ്വാസം ഇല്ലാതാക്കിയത്:
പി.എം. ശ്രീ കരാർ: സി.പി.ഐയുടെ എതിർപ്പ് മറികടന്ന് ഈ കരാറിൽ ഒപ്പിട്ടത് ന്യൂനപക്ഷ വിഭാഗത്തിന് സർക്കാരിലുള്ള വിശ്വാസം നഷ്ടപ്പെടുത്തി.
ശബരിമല സ്വർണക്കൊള്ള: കേസിൽ പ്രതിസ്ഥാനത്തുള്ള പത്മകുമാറിനെതിരെ നടപടിയെടുക്കാതെ വിഷയം നിസ്സാരവൽക്കരിക്കാൻ ശ്രമിച്ചത് വിശ്വാസികൾക്കിടയിൽ വലിയ അമർഷമുണ്ടാക്കി.
മുഖ്യമന്ത്രിയുടെ ശൈലി: ഒറ്റയാൾ പട്ടാളത്തെപ്പോലെയുള്ള മുഖ്യമന്ത്രിയുടെ രീതികൾ ജനങ്ങൾക്കിടയിൽ അമർഷം വളർത്തി.
വകുപ്പുകൾക്ക് പ്രാധാന്യം നൽകായ്ക: സി.പി.ഐ കൈകാര്യം ചെയ്യുന്ന വകുപ്പുകൾക്ക് വേണ്ടത്ര പ്രാധാന്യം നൽകാതെയുള്ള സർക്കാർ പ്രവർത്തനവും ദോഷമുണ്ടാക്കി.
ഈ ശക്തമായ വിമർശനങ്ങൾ ഇന്ന് കൂടുന്ന ഇടതുമുന്നണി യോഗത്തിൽ സി.പി.ഐ തുറന്നടിച്ചു പറയുമെന്നും, തോൽവിയുടെ വിശദമായ ഇഴകീറിയുള്ള പരിശോധന ആവശ്യപ്പെടുമെന്നും റിപ്പോർട്ടുകളുണ്ട്.
സിപിഎമ്മിലെ മൗനം, ശബരിമലയിലെ ഏറ്റുപറച്ചിൽ
സി.പി.എം സംസ്ഥാന സെക്രട്ടേറിയറ്റും ഭരണവിരുദ്ധ വികാരം ഒരു കാരണമാണെന്ന് നേതാക്കൾക്കിടയിൽ സമ്മതിക്കുന്നുണ്ടെങ്കിലുംഔദ്യോഗികമായി ആരും അത് പ്രകടിപ്പിച്ചില്ല. എങ്കിലും, ശബരിമല സ്വർണക്കൊള്ള വിഷയത്തിലെ പാർട്ടി നിലപാടിൽ വീഴ്ചയുണ്ടായെന്ന് സമ്മതിക്കാൻ സി.പി.എം തയ്യാറായി. വിഷയം ഉയർന്നയുടൻ കർശന നടപടിയെടുത്തിരുന്നെങ്കിൽ പാർട്ടിയുടെ നിലപാട് ശക്തമാകുമായിരുന്നെന്നാണ് വിലയിരുത്തൽ.
ജനറൽ സെക്രട്ടറി എം.എ. ബേബി, യു.ഡി.എഫിന്റെ വിജയം ഗൗരവമായി കണ്ട് കീഴ്ഘടകങ്ങളിൽ വിശദമായ പരിശോധന ആവശ്യപ്പെട്ടിട്ടുണ്ട്. രണ്ടാഴ്ചയ്ക്കുള്ളിൽ റിപ്പോർട്ട് നൽകാൻ കീഴ്ഘടകങ്ങൾക്ക് നിർദ്ദേശം നൽകിയിട്ടുണ്ട്.
ജോസ് കെ. മാണിയുടെ ഭീഷണി
അതേസമയം, യു.ഡി.എഫ് നടത്തുന്ന മുന്നണി വിപുലീകരണ നീക്കം ഇടതുമുന്നണിക്ക് മറ്റൊരു തലവേദനയായി മാറിയിരിക്കുന്നു. കേരള കോൺഗ്രസ് എം നേതാവായ ജോസ് കെ. മാണി മറുകണ്ടം ചാടുമോയെന്നാണ് സി.പി.എമ്മിന്റെ പ്രധാന ആശങ്ക. കോൺഗ്രസിനും ലീഗിനും ഇതിൽ താൽപ്പര്യമുണ്ട് എന്ന തിരിച്ചറിവ് സി.പി.എമ്മിനെ കൂടുതൽ സമ്മർദ്ദത്തിലാക്കുന്നു.
ഇന്ന് ചേരുന്ന ഇടതുമുന്നണി യോഗം ഭരണത്തിന്റെ വീഴ്ചകൾ ചർച്ച ചെയ്യുമ്പോൾ, മുഖ്യമന്ത്രിക്ക് സി.പി.ഐയുടെ വിമർശനങ്ങളെയും മറ്റ് ആശങ്കകളെയും എങ്ങനെ പ്രതിരോധിക്കാൻ കഴിയുമെന്നാണ് രാഷ്ട്രീയ കേരളം ഉറ്റുനോക്കുന്നത്.
