ദോഹ:ലൈബ്രറികൾ വെറുമൊരു പുസ്തകശേഖരമല്ല, മറിച്ച് സമൂഹത്തെ കോർത്തിണക്കുന്ന സാംസ്‌കാരിക കേന്ദ്രങ്ങളാണെന്ന് അടിവരയിട്ട് 'ലീഡിംഗ് ലൈബ്രറീസ് 2026' ഫോറത്തിന്റെ അഞ്ചാമത് പതിപ്പിന് ദോഹയിൽ ഉജ്ജ്വല തുടക്കം. ഖത്തർ നാഷണൽ ലൈബ്രറിയുടെ ആഭിമുഖ്യത്തിൽ നടക്കുന്ന ഫോറത്തിൽ ലോകത്തിന്റെ വിവിധ ഭാഗങ്ങളിൽ നിന്നുള്ള പ്രമുഖ ഗ്രന്ഥശാലാ വിദഗ്ധരും സാംസ്‌കാരിക നായകരും പങ്കെടുത്തു.
സമൂഹത്തിന്റെ ഓർമ്മകളെ കാത്തുസൂക്ഷിക്കാനും വിജ്ഞാനം എളുപ്പത്തിൽ ലഭ്യമാക്കാനും ലൈബ്രറികൾ നിർണ്ണായക പങ്കാണ് വഹിക്കുന്നതെന്ന് ചടങ്ങ് ഉദ്ഘാടനം ചെയ്തുകൊണ്ട് സഹമന്ത്രിയും ഖത്തർ നാഷണൽ ലൈബ്രറി പ്രസിഡന്റുമായ ഡോ. ഹമദ് ബിൻ അബ്ദുൽഅസീസ് അൽ കുവാരി വ്യക്തമാക്കി. "കമ്മ്യൂണിറ്റി വികസനത്തിനുള്ള നവീന കാഴ്ചപ്പാടുകൾ" എന്ന പ്രമേയത്തിലൂന്നിയാണ് ഇത്തവണത്തെ ചർച്ചകൾ പുരോഗമിക്കുന്നത്.
സമൂഹത്തിന്റെ പങ്കാളിത്തത്തോടെയുള്ള സേവനങ്ങളാണ് ലൈബ്രറികൾ മുന്നോട്ടുവെക്കുന്നതെന്ന് എക്സിക്യൂട്ടീവ് ഡയറക്ടർ ഹൊസെം ടാൻ അഭിപ്രായപ്പെട്ടു. ഇന്റർനാഷണൽ ഫെഡറേഷൻ ഓഫ് ലൈബ്രറി അസോസിയേഷൻസ് (IFLA) പ്രസിഡന്റ് ലെസ്ലി വെയർ, അറബ് ഫെഡറേഷൻ ഫോർ ലൈബ്രറീസ് ആന്റ് ഇൻഫർമേഷൻ (AFLI) പ്രസിഡന്റ് ഡോ. ഇമാദ് ഈസാ സ്വാലിഹ് തുടങ്ങിയ പ്രമുഖരും ചടങ്ങിൽ സംസാരിച്ചു.
