കൊച്ചി: നീതി തേടിയെത്തുന്ന പൗരന്മാരുടെ അവസാന ആശ്രയമാണ് നീതിന്യായവ്യവസ്ഥയെന്നും അതിനാൽ അഭിഭാഷകരെ ക്ഷമയോടെ കേട്ട് നിയമാനുസൃതമായി അവകാശങ്ങൾ നിർണയിക്കണമെന്നും കേരള ഹൈക്കോടതി ജഡ്ജി ജസ്റ്റിസ് കെ. നടരാജൻ. കണക്കുകളിലെ നേട്ടത്തിനുവേണ്ടി മാത്രം കേസുകൾ തീർപ്പാക്കരുതെന്നും അദ്ദേഹം പറഞ്ഞു. നവംബർ അഞ്ചിന് വിരമിക്കുന്നതിനു മുന്നോടിയായി നാലിന് ഹൈക്കോടതിയിൽ നടന്ന ഫുൾ കോർട്ട് റഫറൻസിൽ വിടവാങ്ങൽ പ്രസംഗം നടത്തുകയായിരുന്നു അദ്ദേഹം.
ജനങ്ങൾ വിശ്വാസമർപ്പിച്ച സ്ഥാപനമാണ് നീതിന്യായവ്യവസ്ഥ. ആ വിശ്വാസം കാത്തുസൂക്ഷിക്കാൻ അഭിഭാഷകരോട് മാന്യമായി പെരുമാറുകയും അവരുടെ വാദങ്ങൾ ക്ഷമയോടെ കേൾക്കുകയും വേണം. കേസുകൾ തീർപ്പാക്കുന്നതിൽ എണ്ണത്തിനപ്പുറം നിയമാനുസൃതമായ നീതിനിർണയത്തിനാണ് പ്രാധാന്യം നൽകേണ്ടതെന്ന് അദ്ദേഹം വ്യക്തമാക്കി.
ഏകദേശം ഇരുപത്തിനാലര വർഷത്തെ നീതിന്യായസേവനത്തിനുശേഷം സംതൃപ്തിയോടെയാണ് പടിയിറങ്ങുന്നതെന്ന് ജസ്റ്റിസ് നടരാജൻ പറഞ്ഞു. ചീഫ് ജസ്റ്റിസിനും സഹജഡ്ജിമാർക്കും അഡ്വക്കേറ്റ് ജനറലിനും കേരള ഹൈക്കോടതി അഭിഭാഷക അസോസിയേഷനും അഭിഭാഷക സമൂഹത്തിനും നൽകിയ സ്നേഹത്തിനും പിന്തുണയ്ക്കും അദ്ദേഹം നന്ദി അറിയിച്ചു.
കേരളത്തിൽ സേവനമനുഷ്ഠിക്കാൻ ലഭിച്ച അവസരം അനുഗ്രഹമായാണ് കാണുന്നതെന്നും അദ്ദേഹം പറഞ്ഞു. സ്ഥലംമാറ്റമുണ്ടായാൽ തന്റെ ആദ്യ പരിഗണന കേരളമായിരുന്നു. 1995 മുതൽ ഗുരുവായൂർ, ചോറ്റാനിക്കര, ശബരിമല ക്ഷേത്രങ്ങളിൽ തീർഥാടനത്തിനായി പതിവായി എത്തിയിരുന്നതിനാൽ സംസ്ഥാനവുമായി മൂന്നു പതിറ്റാണ്ടോളം നീളുന്ന ആത്മബന്ധമുണ്ടെന്നും അദ്ദേഹം അനുസ്മരിച്ചു.
ജഡ്ജിമാരും മനുഷ്യരാണെന്നും അവരും നിയമത്തിന് വിധേയരാണെന്നും ചൂണ്ടിക്കാട്ടിയ അദ്ദേഹം, നീതിന്യായ ചുമതലകൾ നീതിപൂർവവും നിഷ്പക്ഷവുമായി നിർവഹിക്കേണ്ടതിന്റെ ആവശ്യകത ഊന്നിപ്പറഞ്ഞു. തന്റെ മാർഗദർശിയായ ജസ്റ്റിസ് ആർ. വി. രവീന്ദ്രൻ ഉൾപ്പെടെ ഔദ്യോഗികജീവിതത്തെ രൂപപ്പെടുത്തുന്നതിൽ പങ്കുവഹിച്ച മുൻ ജഡ്ജിമാരെയും അദ്ദേഹം നന്ദിയോടെ സ്മരിച്ചു.
ഔപചാരിക വിദ്യാഭ്യാസം ലഭിച്ചിട്ടില്ലാത്ത മാതാപിതാക്കളുടെ മകനായ താൻ കുടുംബത്തിലെ ആദ്യ ബിരുദധാരിയും അഭിഭാഷകനുമായിരുന്നുവെന്ന് അദ്ദേഹം പറഞ്ഞു. നിയമപഠനത്തിന് ചേരാൻ ശ്രമിച്ചപ്പോൾ പലരും നിരുത്സാഹപ്പെടുത്തിയെങ്കിലും മാതാപിതാക്കൾ ഉറച്ച പിന്തുണ നൽകി. അവരുടെ പ്രോത്സാഹനമാണ് തന്റെ ലക്ഷ്യത്തിലേക്ക് മുന്നേറാനുള്ള കരുത്തായതെന്നും അദ്ദേഹം വ്യക്തമാക്കി.
തിരക്കേറിയ നീതിന്യായജീവിതത്തിലുടനീളം പിന്തുണയും സഹകരണവും നൽകിയ ഭാര്യയ്ക്കും മക്കൾക്കും അദ്ദേഹം നന്ദി അറിയിച്ചു. സഹജഡ്ജിമാർ, കോടതി ഉദ്യോഗസ്ഥർ, രജിസ്ട്രി ജീവനക്കാർ, പ്രോട്ടോക്കോൾ വിഭാഗം, മെഡിക്കൽ ഉദ്യോഗസ്ഥർ, വിവിധ ജില്ലകളിലെ അഭിഭാഷകർ എന്നിവരുടെ സഹായവും അദ്ദേഹം പ്രത്യേകം പരാമർശിച്ചു.
എല്ലാ അഭിഭാഷകരോടും വിവേചനമില്ലാതെ പെരുമാറാനും നീതിയുടെ തത്ത്വങ്ങൾ ഉയർത്തിപ്പിടിക്കാനുമാണ് എന്നും ശ്രമിച്ചതെന്ന് ജസ്റ്റിസ് നടരാജൻ പറഞ്ഞു. ഔദ്യോഗിക കർത്തവ്യനിർവഹണത്തിനിടെ അറിഞ്ഞോ അറിയാതെയോ തന്റെ പെരുമാറ്റം ആരെയെങ്കിലും വേദനിപ്പിച്ചിട്ടുണ്ടെങ്കിൽ ഖേദിക്കുന്നതായും അത്തരം സംഭവങ്ങൾക്ക് വ്യക്തിപരമായ ഉദ്ദേശ്യമുണ്ടായിരുന്നില്ലെന്നും അദ്ദേഹം വ്യക്തമാക്കി.