കൊല്ലം: അഭിഭാഷകനെയും സുഹൃത്തുക്കളെയും മർദിക്കുകയും അസഭ്യം പറയുകയും ചെയ്ത സംഭവത്തിൽ പൊലീസ് ഉദ്യോഗസ്ഥന് സസ്പെൻഷൻ. ഇരവിപുരം പൊലീസ് സ്റ്റേഷനിലെ അൽ സഫീർ എന്ന ഉദ്യോഗസ്ഥനെയാണ് അന്വേഷണ വിധേയമായി സസ്പെൻഡ് ചെയ്തത്. സംഭവത്തിൽ നടപടി ആവശ്യപ്പെട്ട് കൊല്ലം ബാർ അസോസിയേഷൻ രംഗത്തെത്തിയിരുന്നു.
കഴിഞ്ഞദിവസം രാത്രി 10.20ഓടെ കൊല്ലം മേമനത്തെ ലാലാസ് കൺവെൻഷൻ സെന്ററിന് സമീപമായിരുന്നു സംഭവം. കൊല്ലം ബാർ അസോസിയേഷൻ അംഗമായ അഭിഭാഷകൻ ഗുൽസാറും സുഹൃത്തുക്കളും സ്ഥലത്തുണ്ടായിരുന്നപ്പോഴാണ് പൊലീസ് ജീപ്പ് എത്തിയത്. ജീപ്പിൽനിന്ന് യൂണിഫോമിലല്ലാത്ത ഒരു പൊലീസ് ഉദ്യോഗസ്ഥൻ ഇറങ്ങി ഇവരോട് വീട് എവിടെയാണെന്ന് ചോദിച്ചതായും തുടർന്ന് കാരണമൊന്നും വ്യക്തമാക്കാതെ അഭിഭാഷകന്റെ സുഹൃത്തിനെ ലാത്തികൊണ്ട് അടിച്ചതായും പരാതിയിൽ പറയുന്നു.
ഇത് ചോദ്യം ചെയ്തതോടെ അഭിഭാഷകനോടും ഉദ്യോഗസ്ഥൻ മോശമായി പെരുമാറിയെന്നും മർദിക്കുകയും പിടിച്ചുതള്ളുകയും ചെയ്തെന്നുമാണ് ആരോപണം. അഭിഭാഷകനാണെന്ന് പറഞ്ഞിട്ടും അതിക്രമം തുടർന്നതായി പരാതിയിലുണ്ട്.
സംഭവത്തിൽ സംസ്ഥാന പൊലീസ് മേധാവിക്കും ജില്ലാ പൊലീസ് മേധാവിക്കും ബാർ അസോസിയേഷൻ പരാതി നൽകിയിരുന്നു. പരാതിയിൽ സ്പെഷൽ സെൽ എസ്.പി. അന്വേഷണം നടത്തണമെന്ന് സംസ്ഥാന പൊലീസ് മേധാവി നിർദേശിച്ചതായി ബാർ അസോസിയേഷന് മറുപടി ലഭിച്ചിട്ടുണ്ട്.
അഭിഭാഷകർക്കെതിരായ ഇത്തരം അതിക്രമങ്ങൾക്കെതിരെ ശക്തമായ നടപടി സ്വീകരിക്കണമെന്നാണ് ബാർ അസോസിയേഷന്റെ ആവശ്യം.
