കോഴിക്കോട്: സ്റ്റോപ്പില്ലാത്ത സ്ഥലത്ത് ബസ് നിർത്തണമെന്ന ആവശ്യം ജീവനക്കാർ നിരാകരിച്ചതോടെ യുവതി കെഎസ്ആർടിസി ബസിന്റെ ചില്ല് തകർത്തു. സൂപ്പർഫാസ്റ്റ് പ്രീമിയം ബസിന്റെ മുൻവശത്തെ ഡോറിനോടു ചേർന്ന സൈഡ് ഗ്ലാസാണ് യുവതി അടിച്ചുപൊട്ടിച്ചത്. മൂന്നു ദിവസം മുമ്പു നടന്ന സംഭവത്തിന്റെ വീഡിയോ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.
മിംസ് ആശുപത്രിക്ക് സമീപത്ത് ബസ് നിർത്തണമെന്നായിരുന്നു യുവതിയുടെ ആവശ്യം. എന്നാൽ അവിടെ സ്റ്റോപ്പില്ലെന്ന് ഡ്രൈവറും കണ്ടക്ടറും അറിയിച്ചതോടെ യുവതി പ്രകോപിതയായി ബഹളം വയ്ക്കുകയായിരുന്നു. സംഭവത്തിനിടെ ജീവനക്കാരുടെ ദൃശ്യങ്ങളും യുവതി മൊബൈലിൽ പകർത്തിയിരുന്നു. തുടർന്ന് ബസിനുള്ളിലുണ്ടായിരുന്ന ഗ്ലാസ് ബ്രേക്കിങ് ഹാമർ ഉപയോഗിച്ച് ചില്ല് തകർക്കുകയായിരുന്നു.
“കാൻ യു സ്റ്റോപ്പ് ദി വെഹിക്കിൾ” എന്ന് യുവതി ആവശ്യപ്പെടുന്നതും, സ്റ്റോപ്പില്ലാത്ത സ്ഥലത്ത് വാഹനം നിർത്താനാകില്ലെന്ന് ജീവനക്കാർ മറുപടി പറയുന്നതും വീഡിയോയിൽ വ്യക്തമായി കേൾക്കാം. സംഭവത്തിന് പിന്നാലെ കെഎസ്ആർടിസി ജീവനക്കാരും യുവതിയും കോഴിക്കോട് മെഡിക്കൽ കോളജ് പൊലീസ് സ്റ്റേഷനിലെത്തി. നഷ്ടപരിഹാരം നൽകാമെന്ന ഉറപ്പിനെ തുടർന്ന് യുവതിയെ വിട്ടയച്ചതായാണ് പൊലീസിന്റെ വിശദീകരണം.
