തിരുവനന്തപുരം: തദ്ദേശ തെരഞ്ഞെടുപ്പിൽ കൊല്ലം അത്ഭുതപ്പെടുത്തിയെന്ന് കെപിസിസി പ്രസിഡന്റ് സണ്ണി ജോസഫ്. കൊല്ലം, കൊച്ചി, തൃശ്ശൂർ എന്നിവിടങ്ങളിലെ മേയർമാരെ ഉടൻ തീരുമാനിക്കുമെന്നും സണ്ണി ജോസഫ് പറഞ്ഞു. ഒരു വാർത്താ ചാനലിനോട് സംസാരിക്കവെയായിരുന്നു കെപിസിസി അധ്യക്ഷൻ ഇക്കാര്യം പറഞ്ഞത്.
അതേസമയം, യുഡിഎഫ് വിപുലീകരണം സംബന്ധിച്ചും അദ്ദേഹം പ്രതികരിച്ചു. യുഡിഎഫ് വിട്ടു പോയവർ ചിന്തിക്കണമെന്നും മടക്കത്തിന് ഇതാണ് സമയമെന്നും സണ്ണി ജോസഫ് പറഞ്ഞു. കേരള കോൺഗ്രസ് മാണി ഗ്രൂപ്പ് യുഡിഎഫിലെത്തുമോ എന്ന കാര്യത്തിൽ തീരുമാനം എടുക്കേണ്ടത് അവരാണെന്നും സണ്ണി ജോസഫ് കൂട്ടിച്ചേർത്തു. പി വി അൻവറിന്റെ തൃണമൂൽ കോൺഗ്രസ് യുഡിഎഫിന്റെ അസോസിയേറ്റ് അംഗമാകും. അന്തിമ പ്രഖ്യാപനം ഉടൻ ഉണ്ടാകുമെന്നും സണ്ണി ജോസഫ് വ്യക്തമാക്കി.
അതേസമയം, തോൽവിയുടെ കാരണങ്ങൾ തേടി എൽഡിഎഫ് സൂക്ഷ്മ പരിശോധനയിലേക്ക് കടക്കും. എറണാകുളത്തെ സ്ഥിതി വിശദമായി പരിശോധിക്കും. എറണാകുളം ജില്ലയിലെ നഗരവും മലയോരവും കടലോരവും കായലോരവും നേടിയാണ് ജില്ലയിൽ യുഡിഎഫ് മിന്നും ജയം നേടിയത്. തൃപ്പൂണിത്തുറയിൽ ഏറ്റവും വലിയ ഒറ്റകക്ഷിയായി സാന്നിദ്ധ്യം അറിയിച്ചത് ജില്ലയിൽ ബിജെപിക്കും നേട്ടമായി.
