കോഴിക്കോട് നഗരപരിധിയിൽ നിന്ന് കഴിഞ്ഞ മാസം ദുരൂഹ സാഹചര്യത്തിൽ കാണാതായ 16-കാരിയെ 36 ദിവസങ്ങൾക്ക് ശേഷം കണ്ണൂർ ജില്ലയിലെ കൊളവല്ലൂരിലെ ഒരു രഹസ്യ കേന്ദ്രത്തിൽ നിന്ന് പൊലീസ് രക്ഷപ്പെടുത്തി. രഹസ്യവിവരത്തിന്റെ അടിസ്ഥാനത്തിൽ സ്ഥലത്തെത്തിയ പൊലീസ് കെട്ടിടം വളഞ്ഞെങ്കിലും, ഉദ്യോഗസ്ഥർ എത്തുന്നതിന് മുമ്പ് അഞ്ചംഗ സംഘം അവിടെ നിന്ന് രക്ഷപ്പെട്ടതായി പൊലീസ് അറിയിച്ചു. രക്ഷപ്പെടുത്തിയ പെൺകുട്ടി തനിക്ക് ലൈംഗിക പീഡനം നേരിട്ടതായി മൊഴി നൽകിയിട്ടുണ്ട്. തുടർന്ന് കുട്ടിയെ കോഴിക്കോട് ശിശുക്ഷേമ സമിതിക്ക് മുന്നിൽ ഹാജരാക്കി സംരക്ഷണ കേന്ദ്രത്തിലേക്ക് മാറ്റി.

സംഭവവുമായി ബന്ധപ്പെട്ട് പെൺകുട്ടിയെ തട്ടിക്കൊണ്ടുപോയതായി ആരോപിക്കപ്പെടുന്ന രണ്ട് പേർ ഉൾപ്പെടെ ഏഴ് പേർക്കെതിരെ ചേവായൂർ പൊലീസ് പോക്സോ നിയമപ്രകാരം കേസെടുത്തു. പ്രതികൾക്കായുള്ള തിരച്ചിൽ ഊർജിതമാക്കിയിട്ടുണ്ടെന്നും പ്രത്യേക അന്വേഷണ സംഘം രൂപീകരിച്ച് അന്വേഷണം തുടരുകയാണെന്നും പൊലീസ് വ്യക്തമാക്കി.

മേയ് 15-ന് ചേവായൂർ പൊലീസ് സ്റ്റേഷൻ പരിധിയിൽ നിന്ന് പെൺകുട്ടിയെ കാണാതായതിനെ തുടർന്ന് രക്ഷിതാക്കൾ നൽകിയ പരാതിയിലാണ് കേസ് രജിസ്റ്റർ ചെയ്തത്. രാത്രി വീട്ടുമുന്നിലെ റോഡിൽ കാറിലെത്തിയ രണ്ട് പേർ പെൺകുട്ടിയെ ബലമായി കൂട്ടിക്കൊണ്ടുപോയതായാണ് അന്വേഷണത്തിൽ കണ്ടെത്തിയത്.

ചേവായൂർ ഇൻസ്പെക്ടർ ടി. മഹേഷിന്റെ നേതൃത്വത്തിൽ പ്രത്യേക അന്വേഷണസംഘം രൂപീകരിച്ച് നടത്തിയ അന്വേഷണത്തിൽ, കുട്ടിയെ ആദ്യം നെടുമ്പാശ്ശേരിയിലേക്ക് കൊണ്ടുപോയതായി വിവരം ലഭിച്ചു. പിന്നീട് സംഘത്തിൽ നിന്ന് രക്ഷപ്പെട്ട പെൺകുട്ടി തൃശൂർ കെഎസ്ആർടിസി ബസ് സ്റ്റാൻഡിലെത്തിയതായും കണ്ടെത്തി. സൈബർ പൊലീസിന്റെ സഹായത്തോടെ അവിടെയെത്തിയെങ്കിലും പിന്നീട് കുട്ടിയെ കണ്ടെത്താനായിരുന്നില്ല.

ഇൻസ്റ്റഗ്രാമിലൂടെ പരിചയപ്പെട്ട ഒരാളാണ് രാത്രി ഫോണിൽ ബന്ധപ്പെടുകയും പിന്നീട് മറ്റൊരു സുഹൃത്തിന്റെയും സഹായത്തോടെ കോഴിക്കോട് എത്തി കാറിൽ കയറ്റി തട്ടിക്കൊണ്ടുപോകുകയും ചെയ്തതെന്നാണ് അന്വേഷണത്തിൽ വ്യക്തമായതെന്ന് പൊലീസ് അറിയിച്ചു. അന്വേഷണം പുരോഗമിക്കുകയാണ്.