തിരുവനന്തപുരം: വേണാട് എക്‌സ്പ്രസിലെ തിരക്ക് കുറയ്ക്കാൻ വേണാടിനു മുൻപ് ഒരു ട്രെയിൻ അനുവദിക്കണമെന്ന യാത്രക്കാരുടെ ആവശ്യം നിലനിൽക്കെ, കൊല്ലം–കോട്ടയം മെമു എറണാകുളം വരെ നീട്ടിയ റെയിൽവേയുടെ നടപടി പുതിയ പ്രതിസന്ധിക്ക് വഴിയൊരുക്കുന്നു. നവംബർ ഒന്ന് മുതൽ കോട്ടയത്തുനിന്ന് വൈകിട്ട് 5.40ന് കൊല്ലത്തേക്ക് പുറപ്പെട്ടിരുന്ന മെമു സർവീസ് ഇല്ലാതാകുന്നതോടെ യാത്രക്കാർക്ക് ദീർഘനേരം കാത്തിരിക്കേണ്ടിവരുമെന്നാണ് പരാതി.

നിലവിലെ ക്രമീകരണമനുസരിച്ച് എറണാകുളത്തുനിന്ന് കോട്ടയത്തെത്തുന്ന മെമു വൈകിട്ട് 6.45നാകും എത്തുക. ഇതോടെ കോട്ടയത്തുനിന്ന് കൊല്ലം ഭാഗത്തേക്ക് യാത്ര ചെയ്യുന്നവർക്ക് നേരത്തെയുണ്ടായിരുന്ന 5.40നുള്ള ട്രെയിൻ ലഭിക്കില്ല. വൈകിട്ട് 3.45ന് പരശുറാം എക്‌സ്പ്രസ് കടന്നുപോയാൽ പിന്നീട് 6.30നുള്ള വേണാട് എക്‌സ്പ്രസിനെ ആശ്രയിക്കേണ്ട അവസ്ഥയാണ്. ഏകദേശം രണ്ടര മണിക്കൂറോളം കാത്തിരുന്നശേഷം തിരക്കേറിയ വേണാടിൽ യാത്ര ചെയ്യേണ്ടിവരുമെന്നും യാത്രക്കാർ ചൂണ്ടിക്കാട്ടുന്നു.

കോട്ടയം, ചങ്ങനാശേരി, തിരുവല്ല, ചെങ്ങന്നൂർ തുടങ്ങിയ സ്റ്റേഷനുകളെ ആശ്രയിക്കുന്ന സർക്കാർ ജീവനക്കാർ, സ്വകാര്യ സ്ഥാപനങ്ങളിലെ ജീവനക്കാർ, വിദ്യാർഥികൾ എന്നിവരെയാണ് പുതിയ സമയക്രമം കൂടുതൽ ബാധിക്കുക. ജോലി കഴിഞ്ഞ് മടങ്ങുന്ന സമയത്ത് യാത്രാസൗകര്യം കുറയുന്നതും വേണാട് എക്‌സ്പ്രസിലെ തിരക്ക് വർധിക്കാനുള്ള സാധ്യതയും ആശങ്കയുണ്ടാക്കുന്നു.

വേണാട് എക്‌സ്പ്രസിലെ അമിത തിരക്ക് കണക്കിലെടുത്ത് അതിനു മുൻപായി മറ്റൊരു ട്രെയിൻ അനുവദിക്കണമെന്നതായിരുന്നു യാത്രക്കാരുടെ പ്രധാന ആവശ്യം. പരശുറാം എക്‌സ്പ്രസ് വൈകിട്ട് 3.45ന് കോട്ടയം വഴി കടന്നുപോയാൽ അടുത്ത പ്രധാന പ്രതിദിന സർവീസായ വേണാട് എറണാകുളം ടൗണിൽനിന്ന് പുറപ്പെടുന്നത് വൈകിട്ട് 5.15നാണ്. ഇതിനിടയിലെ നീണ്ട ഇടവേള പരിഹരിക്കാൻ വൈകിട്ട് നാലുമണിയോടെ കോട്ടയം വഴി കൊല്ലത്തേക്ക് അധിക ട്രെയിൻ വേണമെന്നായിരുന്നു ആവശ്യം.

എന്നാൽ പുതിയ എറണാകുളം–കൊല്ലം ട്രെയിൻ എറണാകുളം ജംക്‌ഷനിൽനിന്ന് വൈകിട്ട് 5.25നാണ് പുറപ്പെടുന്നത്. വേണാട് എക്‌സ്പ്രസ് എറണാകുളം ടൗണിൽനിന്ന് പുറപ്പെട്ടതിന് തൊട്ടുപിന്നാലെയാണ് ഈ സർവീസ് ആരംഭിക്കുന്നത്. അതിനാൽ യാത്രക്കാർ ആവശ്യപ്പെട്ട സമയക്രമത്തിൽ മാറ്റമുണ്ടാകുന്നില്ലെന്നും വേണാടിലെ തിരക്ക് കുറയ്ക്കാൻ പുതിയ ക്രമീകരണം സഹായിക്കില്ലെന്നുമാണ് വിമർശനം.

ഇതിനൊരു പരിഹാരമായി എറണാകുളം–കോട്ടയം പാസഞ്ചർ റേക്കിന്റെ ഉപയോഗം പുനഃക്രമീകരിക്കണമെന്നാണ് യാത്രക്കാരുടെ സംഘടനകളുടെ നിർദേശം. രാവിലെ മുതൽ വൈകിട്ട് വരെ കോട്ടയത്ത് ലഭ്യമായിരിക്കുന്ന ഈ റേക്ക് ഉച്ചകഴിഞ്ഞ് എറണാകുളത്തേക്ക് സർവീസ് നടത്തി വൈകിട്ട് നാലുമണിയോടെ കോട്ടയത്തുനിന്ന് കൊല്ലം ഭാഗത്തേക്ക് മടക്കയാത്ര ആരംഭിക്കുന്ന രീതിയിൽ ക്രമീകരിക്കണമെന്നാണ് ആവശ്യം.

ഇങ്ങനെ ചെയ്താൽ നിലവിൽ വൈകിട്ട് 5.40ന് കോട്ടയത്തുനിന്ന് പുറപ്പെടുന്ന മെമു സർവീസിനെ ബാധിക്കാതെ അധിക യാത്രാസൗകര്യം ഒരുക്കാനാകുമെന്നാണ് സംഘടനകൾ പറയുന്നത്. യാത്രക്കാരുടെ ആവശ്യങ്ങൾ പരിഗണിച്ച് റെയിൽവേ സമയക്രമത്തിൽ പുനഃക്രമീകരണം നടത്തണമെന്ന ആവശ്യവും ശക്തമാകുകയാണ്.