കൊല്ലം: കടയ്ക്കലിൽ ദമ്പതികളെ വീട്ടിനുള്ളിൽ മരിച്ച നിലയിൽ കണ്ടെത്തി. അഞ്ചുമുക്ക് സ്വദേശികളായ സുഗതനും ഭാര്യ ലതയുമാണ് മരിച്ചത്. ശനിയാഴ്ച വിദേശത്തേക്ക് യാത്രതിരിക്കാനിരിക്കെയാണ് സംഭവം. സുഗതനെ വീടിനുള്ളിൽ തൂങ്ങിമരിച്ച നിലയിലും ലതയെ കട്ടിലിൽ കമിഴ്ന്നുകിടക്കുന്ന നിലയിലുമാണ് കണ്ടെത്തിയത്. വെള്ളിയാഴ്ച വൈകുന്നേരം വരെ ബന്ധുക്കളുമായി ഇരുവരും സംസാരിച്ചിരുന്നുവെന്നാണ് വിവരം.
ശനിയാഴ്ച രാവിലെ ഭക്ഷണം നൽകാനായി എത്തിയ ബന്ധു വാതിലിൽ തട്ടിയും ഫോണിൽ വിളിച്ചും നോക്കിയെങ്കിലും പ്രതികരണമൊന്നും ലഭിച്ചില്ല. തുടർന്ന് സംശയം തോന്നിയതിനെ തുടർന്ന് വാതിൽ ചവിട്ടിപ്പൊളിച്ച് അകത്ത് പ്രവേശിച്ചപ്പോഴാണ് ദാരുണമായ കാഴ്ച കണ്ടത്.
ദമ്പതികൾക്ക് സാമ്പത്തിക ബാധ്യതകളുണ്ടായിരുന്നുവെന്ന സൂചനകളൊന്നും ഇതുവരെ ലഭിച്ചിട്ടില്ല. ഒരു മകനും ഒരു മകളുമാണ് ഇവർക്കുള്ളത്. ഇരുവരും വിദേശത്താണ് താമസം. മകൻ വെള്ളിയാഴ്ചയാണ് വിദേശത്തേക്ക് മടങ്ങിയത്.
സംഭവത്തിൽ പോലീസ് അന്വേഷണം ആരംഭിച്ചിട്ടുണ്ടെന്നും മരണത്തിന്റെ യഥാർഥ കാരണം കണ്ടെത്തുന്നതിനായി കൂടുതൽ നടപടികൾ പുരോഗമിക്കുകയാണെന്നും അധികൃതർ അറിയിച്ചു.
