കൊച്ചി: നഗരത്തിലെ അടിസ്‌ഥാനസൗകര്യ വികസനത്തോടൊപ്പം ഹരിത ഇടങ്ങളുടെ വിപുലീകരണം ലക്ഷ്യമിട്ട് സിറ്റി ബ്ലും പദ്ധതി നടപ്പാക്കും. കൊച്ചി നേരിടുന്ന അർബൻ ഹീറ്റ് ഐലന്‍റ് പ്രതിഭാസം കുറയ്ക്കുന്നതിനും കാലാവസ്‌ഥാ വ്യതിയാനങ്ങളെ പ്രതിരോധിക്കുന്നതിനുമായി നഗരത്തിലുടനീളം വ്യാപകമായി വൃക്ഷത്തൈകളും ചെടികളും നട്ടു പിടിപ്പിക്കുന്ന സമഗ്ര പദ്ധതിയാണ് ബജറ്റിൽ പ്രഖ്യാപിച്ച സിറ്റി ബ്ലൂം. റോഡ് മീഡിയനുകൾ, റോഡ് വശങ്ങൾ, പൊതുസ്‌ഥലങ്ങൾ, ഫ്‌ളൈ ഓവറുകൾ, പൊതു മതിലുകൾ, നഗരസഭയുടെയും പൊതുസ്‌ഥാപനങ്ങളുടെയും ഉടമസ്‌ഥതയിലുള്ള കെട്ടിട പരിസരങ്ങൾ എന്നിവിടങ്ങളിൽ വൃക്ഷങ്ങളും ചെടികളും നടും.നഗരത്തിന്‍റെ സൗന്ദര്യം വർധിപ്പിക്കുന്നതിനായി പൂക്കളുള്ള മരങ്ങൾക്ക് മുൻഗണന നൽകും. വർഷത്തിലൊരിക്കലെങ്കിലും വർണാഭമായ പൂക്കൾ വിരിയുന്ന മണിമരുത്, മന്ദാരം, റോസി ട്രമ്പറ്റ്, ഗുൽമോഹർ ഉൾപ്പെടെയുള്ള മരങ്ങളായിരിക്കും പദ്ധതിയുടെ ഭാഗമായി നടുന്നത്. പദ്ധതിയുടെ ഭാഗമായി പൂന്തോട്ട പരിപാലനത്തെ പ്രൊഫഷണൽ തൊഴിലായി വളർത്താൻ താല്പര്യമുള്ള കുടുംബശ്രീ യൂണിറ്റുകൾക്കും വനിതാ കൂട്ടായ്മകൾക്കും പ്രത്യേക പരിശീലനം നൽകും. പദ്ധതിക്കായി ഒരു കോടി രൂപ ചെലവഴിക്കും.
