ജനിക്കുന്ന നക്ഷത്രത്തിന് അനുസരിച്ച് ഓരോ വ്യക്തിയുടെയും സ്വഭാവത്തിലും ജീവിതരീതിയിലും വ്യത്യാസങ്ങളുണ്ടാകുമെന്നാണ് ജ്യോതിഷവിശ്വാസം. 27 നക്ഷത്രങ്ങൾക്കും വ്യത്യസ്തമായ ദേവത, ഗണം, ഭൂതം, മൃഗം, പക്ഷി, വൃക്ഷം എന്നിവയും കൽപ്പിച്ചുനൽകിയിട്ടുണ്ട്. ജ്യോതിഷത്തിൽ പറയുന്ന വിശ്വാസപ്രകാരം ഓരോ നക്ഷത്രക്കാരുടെയും പൊതുവായ സ്വഭാവസവിശേഷതകൾ എന്തൊക്കെയെന്ന് നോക്കാം.

അശ്വതി – അറിവും ധൈര്യവും

അശ്വതി നക്ഷത്രക്കാർ അറിവും ധൈര്യവും ഉള്ളവരായിരിക്കുമെന്നാണ് വിശ്വാസം. ഉത്തരവാദിത്തബോധത്തോടെയും ആത്മാഭിമാനത്തോടെയും കാര്യങ്ങൾ കൈകാര്യം ചെയ്യുന്നവരും കുടുംബത്തിൽ ബഹുമാനം നേടുന്നവരുമായിരിക്കും.

ഭരണി – ദീർഘായുസ്സിന്റെ നക്ഷത്രം

ഭരണി നക്ഷത്രക്കാർ ബുദ്ധിശാലികളും ധീരരുമായിരിക്കും. തീരുമാനങ്ങളെടുക്കുന്നതിൽ ചിലപ്പോൾ ആശയക്കുഴപ്പം നേരിടാമെങ്കിലും ദീർഘായുസ്സും കുടുംബബന്ധങ്ങളിലെ പ്രത്യേക സ്ഥാനവും ഈ നക്ഷത്രത്തിന്റെ ഫലമായി കണക്കാക്കപ്പെടുന്നു.

കാർത്തിക – സത്യസന്ധത മുഖമുദ്ര

സത്യസന്ധതയും ആരോഗ്യവും തേജസ്സും കാർത്തിക നക്ഷത്രക്കാരുടെ പ്രത്യേകതകളായി ജ്യോതിഷത്തിൽ പറയുന്നു. വിദ്യാഭ്യാസത്തിലും സാമ്പത്തിക കാര്യങ്ങളിലും നേട്ടമുണ്ടാക്കാനും ജീവിതത്തിൽ സമ്പന്നരാകാനും സാധ്യതയുണ്ടെന്നാണ് വിശ്വാസം.

രോഹിണി – സമ്പത്തിന്റെയും നേതൃത്വത്തിന്റെയും നക്ഷത്രം

രോഹിണി നക്ഷത്രക്കാർ സാമ്പത്തികമായി മികച്ച നിലയിലെത്തുന്നവരായിരിക്കുമെന്ന് വിശ്വാസം. ഏത് കൂട്ടായ്മയിലും നേതൃത്വം ഏറ്റെടുക്കാനുള്ള കഴിവും ഇവർക്കുണ്ടാകുമെന്നാണ് പറയപ്പെടുന്നത്.

മകയിരം – യാത്ര ഇഷ്ടപ്പെടുന്നവർ

സ്ഥിരതയേക്കാൾ മാറ്റവും യാത്രകളും ഇഷ്ടപ്പെടുന്ന സ്വഭാവമാണ് മകയിരം നക്ഷത്രക്കാർക്കെന്ന് ജ്യോതിഷം പറയുന്നു. ഏത് കാര്യത്തിലും ആവേശത്തോടെ ഇടപെടുന്നവരായിരിക്കും.

തിരുവാതിര – ചഞ്ചലമായ മനസ്സ്

തിരുവാതിര നക്ഷത്രക്കാർ ചഞ്ചലമനസ്കരായിരിക്കുമെന്നാണ് വിശ്വാസം. സംസാരശേഷിയും ധൈര്യവും ഇവരുടെ പ്രത്യേകതകളായി കണക്കാക്കപ്പെടുന്നു. ഔദ്യോഗിക മേഖലകളിൽ അംഗീകാരം നേടാനും സാധ്യതയുണ്ടെന്നാണ് ജ്യോതിഷഫലം.

പുണർതം – ഉദാരമനസ്കർ

പുണർതം നക്ഷത്രക്കാർ സ്നേഹവും ഉദാരതയും നിറഞ്ഞ സ്വഭാവക്കാരായിരിക്കുമെന്ന് പറയപ്പെടുന്നു. മറ്റുള്ളവരോട് സഹാനുഭൂതിയോടെ പെരുമാറുകയും നല്ല സ്വഭാവത്തിന് പേരുകേൾക്കുകയും ചെയ്യുന്നവരായിരിക്കും.

പൂയം – മികച്ച വാഗ്മികൾ

ബുദ്ധിശക്തിയും വാക്ചാതുര്യവും പൂയം നക്ഷത്രക്കാരുടെ പ്രധാന സവിശേഷതകളായി കണക്കാക്കപ്പെടുന്നു. ശാസ്ത്രം, സാഹിത്യം തുടങ്ങിയ മേഖലകളിൽ താൽപര്യമുള്ളവരും മറ്റുള്ളവരെ സഹായിക്കുന്ന മനോഭാവമുള്ളവരുമായിരിക്കും.

ആയില്യം – നേതൃത്വശേഷിയുള്ളവർ

ഏത് സംഘത്തിലും നേതൃത്വസ്ഥാനത്തേക്ക് എത്താനുള്ള കഴിവ് ആയില്യം നക്ഷത്രക്കാർക്കുണ്ടാകുമെന്നാണ് വിശ്വാസം. ആഴത്തിലുള്ള അറിവും വാക്സാമർഥ്യവും ഇവരുടെ സവിശേഷതകളായി പറയപ്പെടുന്നു.

മകം – അറിവും വിനയവും

അറിവിനൊപ്പം വിനയവും മകം നക്ഷത്രക്കാരുടെ പ്രത്യേകതയായി കണക്കാക്കുന്നു. സമൂഹത്തിൽ ബഹുമാനം നേടാനും ജീവിതത്തിൽ സാമ്പത്തികമായും സുഖകരമായും മുന്നേറാനും സാധ്യതയുണ്ടെന്നാണ് ജ്യോതിഷവിശ്വാസം.

പൂരം – സംസാരശേഷിയിലൂടെ സ്വാധീനം

നന്നായി സംസാരിക്കാനും മറ്റുള്ളവരെ സ്വാധീനിക്കാനും പൂരം നക്ഷത്രക്കാർക്ക് കഴിവുണ്ടാകുമെന്നാണ് വിശ്വാസം. ദാനശീലവും വിവിധ മേഖലകളിൽ പ്രശസ്തി നേടാനുള്ള സാധ്യതയും ഇവരുടെ പ്രത്യേകതകളായി പറയുന്നു.

ഉത്രം – ജ്ഞാനവും ഉദാരതയും

ജ്ഞാനവും ഉദാരമനസ്കതയും ഉത്രം നക്ഷത്രക്കാരുടെ പ്രധാന ഗുണങ്ങളായി കണക്കാക്കപ്പെടുന്നു. ബന്ധുക്കൾക്കിടയിൽ ബഹുമാനവും ഔദ്യോഗിക തലത്തിൽ അംഗീകാരവും ലഭിക്കുമെന്നാണ് വിശ്വാസം.

അത്തം – പരോപകാര മനസ്സ്

അത്തം നക്ഷത്രക്കാർ വാക്ചാതുര്യമുള്ളവരും ബുദ്ധിശാലികളുമായിരിക്കുമെന്ന് ജ്യോതിഷം പറയുന്നു. മറ്റുള്ളവരെ സഹായിക്കാനുള്ള മനസ്സും സാമ്പത്തികമായി ഉയരാനുള്ള സാധ്യതയും ഇവർക്കുണ്ടെന്നാണ് വിശ്വാസം.

ചിത്തിര – ഉത്സാഹവും മത്സരബുദ്ധിയും

ചിത്തിര നക്ഷത്രക്കാർ ഉത്സാഹികളും വാദപ്രതിവാദങ്ങളിൽ താൽപര്യമുള്ളവരുമായിരിക്കും. നല്ല വസ്ത്രങ്ങളോടും ആഭരണങ്ങളോടും താൽപര്യം കാണിക്കാനും ജീവിതത്തിൽ സ്വന്തം നിലപാടുകളിൽ ഉറച്ചുനിൽക്കാനും സാധ്യതയുണ്ട്.

ചോതി – ധർമം കൈവിടാത്തവർ

വിനയവും സംസാരപ്രിയതയും ചോതി നക്ഷത്രക്കാരുടെ പ്രത്യേകതകളായി പറയപ്പെടുന്നു. ഏത് സാഹചര്യത്തിലും ധർമം വിട്ട് പ്രവർത്തിക്കാത്തവരായിരിക്കും എന്നും വിദേശവാസത്തിന് സാധ്യതയുണ്ടെന്നും ജ്യോതിഷത്തിൽ പറയുന്നു.

വിശാഖം – ഭാഗ്യത്തിന്റെ പിന്തുണ

വിശാഖം നക്ഷത്രക്കാർ സമ്പന്നരും ഭാഗ്യവാന്മാരുമായിരിക്കുമെന്ന് വിശ്വാസം. കുടുംബജീവിതത്തിൽ നേട്ടങ്ങളും ശത്രുക്കളെ സ്നേഹത്തിലൂടെ കീഴടക്കാനുള്ള കഴിവും ഇവരുടെ പ്രത്യേകതകളായി കണക്കാക്കപ്പെടുന്നു.

അനിഴം – സംസാരിക്കാൻ ഇഷ്ടമുള്ളവർ

അനിഴം നക്ഷത്രക്കാർക്ക് യാത്രകളും സംസാരവും ഏറെ ഇഷ്ടമായിരിക്കുമെന്ന് പറയപ്പെടുന്നു. എവിടെ പോയാലും ഭാഗ്യം കൂടെയുണ്ടാകുമെന്നും നല്ല വ്യക്തികളുടെ സ്നേഹം ലഭിക്കുമെന്നും ജ്യോതിഷവിശ്വാസം പറയുന്നു.

തൃക്കേട്ട – സന്തോഷമുള്ള മനസ്സ്

മനസ്സിൽ സന്തോഷം നിലനിർത്തുന്നവരായിരിക്കും തൃക്കേട്ട നക്ഷത്രക്കാർ എന്നാണ് വിശ്വാസം. ധർമകാര്യങ്ങളിൽ താൽപര്യവും സമൂഹത്തിൽ നേതൃത്വസ്ഥാനത്ത് എത്താനുള്ള കഴിവും ഇവർക്കുണ്ടാകാം.

മൂലം – വാക്ചാതുര്യമുള്ളവർ

അറിവും വാക്ചാതുര്യവും മൂലം നക്ഷത്രക്കാരുടെ പ്രത്യേകതകളായി കണക്കാക്കപ്പെടുന്നു. ജീവിതത്തിൽ സാമ്പത്തിക നേട്ടങ്ങൾ കൈവരിക്കാനും സുഖസൗകര്യങ്ങൾ അനുഭവിക്കാനും സാധ്യതയുണ്ടെന്നാണ് ജ്യോതിഷഫലം.

പൂരാടം – ഉറച്ച സൗഹൃദം

പൂരാടം നക്ഷത്രക്കാർ സൗഹൃദങ്ങളിൽ ആത്മാർത്ഥത പുലർത്തുന്നവരായിരിക്കുമെന്ന് പറയപ്പെടുന്നു. വിനയവും ബുദ്ധിശക്തിയും ഇവരുടെ പ്രധാന ഗുണങ്ങളായി കണക്കാക്കുന്നു. ഔദ്യോഗിക തലത്തിൽ അംഗീകാരം നേടാനും സാധ്യതയുണ്ട്.

ഉത്രാടം – ഹാസ്യപ്രിയർ

ഹാസ്യബോധവും വിനയവും ഉത്രാടം നക്ഷത്രക്കാരുടെ സവിശേഷതകളായി പറയപ്പെടുന്നു. യാത്രകൾ ഇഷ്ടപ്പെടുന്ന ഇവർ അറിവുള്ളവരും ദുരിതമനുഭവിക്കുന്നവരോട് കരുണ കാണിക്കുന്നവരുമായിരിക്കുമെന്ന് വിശ്വാസം.

തിരുവോണം – അറിവും നേതൃത്വവും

ശാസ്ത്രവിഷയങ്ങളിൽ അറിവും സാമ്പത്തികമായി മുന്നേറാനുള്ള കഴിവും തിരുവോണം നക്ഷത്രക്കാരുടെ പ്രത്യേകതകളായി കണക്കാക്കുന്നു. ഏത് സദസ്സിലും നേതൃത്വം ഏറ്റെടുക്കാനുള്ള കഴിവുണ്ടാകുമെന്നും വിശ്വാസമുണ്ട്.

അവിട്ടം – നേതൃത്വഗുണം

നേതൃത്വശേഷിയും ആഗ്രഹസമ്പന്നമായ സ്വഭാവവും അവിട്ടം നക്ഷത്രക്കാരിൽ കാണാമെന്നാണ് ജ്യോതിഷം പറയുന്നത്. സംഗീതം, നാടകം തുടങ്ങിയ കലാരംഗങ്ങളോടും ഇവർക്ക് താൽപര്യമുണ്ടാകാം.

ചതയം – ജനപ്രീതി നേടുന്നവർ

ചതയം നക്ഷത്രക്കാർ സംസാരശേഷിയുള്ളവരും ജനങ്ങൾക്കിടയിൽ പ്രിയപ്പെട്ടവരുമായിരിക്കുമെന്ന് വിശ്വാസം. സാഹചര്യങ്ങൾക്കനുസരിച്ച് പെരുമാറാനും സങ്കീർണമായ കാര്യങ്ങൾക്ക് എളുപ്പവഴി കണ്ടെത്താനും ഇവർക്ക് കഴിവുണ്ടാകുമെന്നാണ് പറയപ്പെടുന്നത്.

പൂരുരുട്ടാതി – സൗമ്യസ്വഭാവക്കാർ

ശാന്തമായ മനസ്സും സൗമ്യമായ പെരുമാറ്റവുമാണ് പൂരുരുട്ടാതി നക്ഷത്രക്കാരുടെ പ്രത്യേകതകളായി പറയപ്പെടുന്നത്. ജോലി ചിട്ടയോടെ ചെയ്യുന്നതിലും ജീവിതത്തിൽ സുഖം അനുഭവിക്കുന്നതിലും ഇവർ മുന്നിലായിരിക്കുമെന്ന് വിശ്വാസം.

ഉത്രട്ടാതി – വിനയവും അറിവും

വാക്ചാതുര്യവും വിനയവും ഉത്രട്ടാതി നക്ഷത്രക്കാരുടെ പ്രധാന സവിശേഷതകളായി കണക്കാക്കുന്നു. ആരോഗ്യകാര്യങ്ങളിൽ ശ്രദ്ധ ചെലുത്തുന്ന ഇവർക്ക് വിവിധ വിഷയങ്ങളിൽ ആഴത്തിലുള്ള അറിവുണ്ടാകുമെന്നും ജ്യോതിഷം പറയുന്നു.

രേവതി – സുമുഖരും മത്സരബുദ്ധിയുള്ളവരും

രേവതി നക്ഷത്രക്കാർ സുമുഖരും ആത്മവിശ്വാസമുള്ളവരുമായിരിക്കുമെന്ന് വിശ്വാസം. മത്സരബുദ്ധിയും നല്ല കാര്യങ്ങൾ ചെയ്യാനുള്ള താൽപര്യവും ഇവരുടെ പ്രത്യേകതകളാണ്. കുടുംബത്തോടൊപ്പം സന്തോഷകരമായ ജീവിതം നയിക്കാനുള്ള സാധ്യതയുമുണ്ടെന്നാണ് ജ്യോതിഷഫലം.

ഓരോ നക്ഷത്രജാതരുടെയും ദേവത, ​ഗണം, ഭൂതം, മൃ​ഗം, പക്ഷി, വൃക്ഷം എന്നിവ അറിയാം..

അശ്വതി 

ദേവത: അശ്വനി ദേവകൾ

ഗണം: ദൈവം

ഭൂതം:ഭൂമി

മൃഗം: കുതിര

പക്ഷി: പുള്ള്

വൃക്ഷം: കാഞ്ഞിരം

ഭരണി 

ദേവത: യമൻ

ഗണം: മാനുഷം

ഭൂതം:ഭൂമി

മൃഗം: ആന

പക്ഷി: പുള്ള്

വൃക്ഷം:നെല്ലി

കാർത്തിക 

ദേവത: അഗ്നി

ഗണം: ആസുരം

ഭൂതം:ഭൂമി

മൃഗം: ആട്

പക്ഷി: പുള്ള്

വൃക്ഷം: അത്തി

രോഹിണി 

ദേവത: ബ്രഹ്മാവ്

ഗണം: മാനുഷം

ഭൂതം:ഭൂമി

മൃഗം: നല്പാമ്ബ്

പക്ഷി: പുള്ള്

വൃക്ഷം:ഞാവൽ

മകയിരം 

ദേവത: ചന്ദ്രൻ

ഗണം: ദൈവം

ഭൂതം:ഭൂമി

മൃഗം: പാമ്പ്

പക്ഷി: പുള്ള്

വൃക്ഷം:കരിങ്ങാലി

തിരുവാതിര 

ദേവത: ശിവൻ

ഗണം: മാനുഷം

ഭൂതം:ജലം

മൃഗം: ശ്വാവ്

പക്ഷി: ചെമ്പോത്ത്

വൃക്ഷം:കരിമരം

പുണർതം 

ദേവത: അദിതി

ഗണം: ദൈവം

ഭൂതം:ജലം

മൃഗം: പൂച്ച

പക്ഷി: ചെമ്പോത്ത്

വൃക്ഷം:മുള

പൂയം 

ദേവത: ബൃഹസ്പതി

ഗണം: ദൈവം

ഭൂതം: ജലം

മൃഗം: ആട്

പക്ഷി: ചെമ്പോത്ത്

വൃക്ഷം: അരയാൽ

ആയില്യം 

ദേവത: സർപ്പങ്ങൾ

ഗണം: ആസുരം

ഭൂതം:ജലം

മൃഗം: കരിമ്പൂച്ച

പക്ഷി: ചെമ്പോത്ത്

വൃക്ഷം:നാകം

മകം 

ദേവത: പിത്യക്കൾ

ഗണം: ആസുരം

ഭൂതം: ജലം

മൃഗം: എലി

പക്ഷി: ചെമ്പോത്ത്

വൃക്ഷം: പേരാൽ

പൂരം

ദേവത: ആര്യമാവ്

ഗണം: മാനുഷം

ഭൂതം:ജലം

മൃഗം: ചുണ്ടെലി

പക്ഷി: ചെമ്പോത്ത്

വൃക്ഷം:പ്ലാശ്

ഉത്രം 

ദേവത: ഭഗൻ

ഗണം: മാനുഷം

ഭൂതം:അഗ്നി

മൃഗം: ഒട്ടകം

പക്ഷി: കാകൻ

വൃക്ഷം: ഇത്തി

അത്തം 

ദേവത: ആദിത്യൻ

ഗണം: ദൈവം

ഭൂതം :അഗ്നി

മൃഗം :പോത്ത്

പക്ഷി :കാകൻ

വൃക്ഷം :അമ്പഴം

ചിത്തിര 

ദേവത: ത്വഷ്ട്രാവ്

ഗണം: ആസുരം

ഭൂതം: അഗ്നി

മൃഗം: ആൾപുലി

പക്ഷി: കാകൻ

വൃക്ഷം: കൂവളം

ചോതി 

ദേവത: വായു

ഗണം: ദൈവം

ഭൂതം: അഗ്നി

മൃഗം: മഹിഷം

പക്ഷി: കാകൻ

വൃക്ഷം: നീർമരുത്

വിശാഖം 

ദേവത: ഇന്ദ്രാഗ്നി

ഗണം: ആസുരം

ഭൂതം: അഗ്നി

മൃഗം: സിംഹം

പക്ഷി: കാകൻ

വൃക്ഷം: വയ്യങ്കതവ്

അനിഴം

ദേവത: മിത്രൻ

ഗണം: ദൈവം

ഭൂതം :അഗ്നി

മൃഗം: മാൻ

പക്ഷി: കാകൻ

വൃക്ഷം: ഇലഞ്ഞി

തൃക്കേട്ട 

ദേവത: ഇന്ദ്രൻ

ഗണം: ആസുരം

ഭൂതം: വായു

മൃഗം: കേഴമാൻ

പക്ഷി: കോഴി

മൂലം 

ദേവത: നിര്യതി

ഗണം: ആസുരം

ഭൂതം: വായു

മൃഗം:ശ്വാവ്

പക്ഷി: കോഴി

വൃക്ഷം വയനം

പൂരാടം 

ദേവത:ജലം

ഗണം: മാനുഷം

ഭൂതം: വായു

മൃഗം: വാനരൻ

പക്ഷി : കോഴി

വൃക്ഷം : വഞ്ഞി

ഉത്രാടം 

ദേവത: വിശ്വദേവതകൾ

ഗണം: മാനുഷം

ഭൂതം: വായു

മൃഗം: കാള

പക്ഷി: കോഴി

വൃക്ഷം: പ്ലാവ്

തിരുവോണം

ദേവത : വിഷ്ണു

ഗണം: ദൈവം

ഭൂതം: വായു

മൃഗം : വാനരൻ

പക്ഷി : കോഴി

വൃക്ഷം : എരിക്ക്

അവിട്ടം 

ദേവത: വസുക്കൾ

ഗണം: ആസുരം

ഭൂതം: ആകാശം

മൃഗം: സിംഹം

പക്ഷി: മയിൽ

വൃക്ഷം : വഹ്നി

ചതയം 

ദേവത:വരുണൻ

ഗണം:ആസുരം

ഭൂതം: ആകാശം

മൃഗം: കുതിര

പക്ഷി: മയിൽ

വൃക്ഷം: കടമ്പ്

പൂരുരുട്ടാതി

ദേവ: അജൈകപാത്

ഗണം: മാനുഷം

ഭൂതം: ആകാശം

മൃഗം: നരൻ

പക്ഷി: മയിൽ

വൃക്ഷം: തേൻമാവ്

ഉത്രട്ടാതി 

ദേവത: അഹിർബുധ്നി

ഗണം : മാനുഷം

ഭൂതം : ആകാസം

മൃഗം : പശു

പക്ഷി : മയിൽ

വൃക്ഷം : കരിമ്ബന

രേവതി 

ദേവത: പുഷാവ്

ഗണം : ദൈവം

ഭൂതം : ആകാശം

മൃഗം : ആന

പക്ഷി : മയിൽ

വൃക്ഷം : ഇരിപ്പ