തിരുവനന്തപുരം: കേരള മെഡിക്കൽ സർവീസസ് കോർപ്പറേഷന്റെ (കെ.എം.എസ്.സി.എൽ) മരുന്ന് വാങ്ങലിലെ അഴിമതികളും ക്രമക്കേടുകളും കണ്ടെത്താൻ വിജിലൻസ് അന്വേഷണം പ്രഖ്യാപിച്ചു. ആരോഗ്യ വകുപ്പിന്റെ റിപ്പോർട്ടും മാധ്യമങ്ങൾ പുറത്തുവിട്ട വെളിപ്പെടുത്തലുകളും അടിസ്ഥാനമാക്കിയാണ് ആരോഗ്യമന്ത്രിയുടെ കര്ശന നടപടി.
772 കോടി രൂപയ്ക്ക് ലഭിക്കുമായിരുന്ന മരുന്നുകൾ 962 കോടി രൂപയ്ക്ക് വാങ്ങിയതുൾപ്പെടെയുള്ള വൻ ക്രമക്കേടുകൾ അന്വേഷിക്കും.
അഞ്ചിരട്ടി വരെ വില വ്യത്യാസത്തിൽ ഗുണനിലവാരം കുറഞ്ഞ മരുന്നുകൾ ഉയർന്ന വിലയ്ക്ക് വാങ്ങിയെന്ന മാധ്യമ വാർത്തയാണ് അന്വേഷണത്തിന് നിമിത്തമായത്.
ഐ.എച്ച്.ഡി.ബി നേരിട്ട് മരുന്നുകൾ വാങ്ങുമ്പോൾ, കെ.എം.എസ്.സി.എൽ ഇടനിലക്കാർ വഴി ഉയർന്ന വിലയ്ക്ക് വാങ്ങിയതായി കണ്ടെത്തിയിട്ടുണ്ട്. ഇതിന് പിന്നിൽ ഉന്നത രാഷ്ട്രീയ-ഉദ്യോഗസ്ഥ ബന്ധങ്ങളുണ്ടെന്നാണ് സൂചന. അഴിമതി ആരോപണങ്ങൾ ശക്തമായതിനെ തുടർന്ന് കെ.എം.എസ്.സി.എൽ മേധാവി സ്ഥാനം ഏറ്റെടുക്കാൻ ഐ.എ.എസുകാർ മടികാണിക്കുന്ന സാഹചര്യവുമുണ്ട്.
"വിജിലൻസ് അന്വേഷണത്തിൽ കുറ്റക്കാരായി കണ്ടെത്തുന്നവർക്കെതിരെ ശക്തമായ നിയമനടപടി സ്വീകരിക്കും" എന്ന് ആരോഗ്യമന്ത്രി വ്യക്തമാക്കി.
അന്വേഷണത്തിന്റെ ഭാഗമായി കഴിഞ്ഞ 10 വർഷത്തെ പർച്ചേസിങ് രേഖകളും ഗോഡൗണുകളിൽ മരുന്ന് കെട്ടിക്കിടന്ന് നശിച്ച സംഭവങ്ങളും ബ്ലീച്ചിംഗ് പൗഡർ വാങ്ങിയതിലെ അഴിമതികളും വിജിലൻസ് പരിശോധിക്കും.
