മെക്‌സിക്കോ സിറ്റി: ഫോർമുല വൺ ചരിത്രത്തിൽ പുതിയ റെക്കോർഡ് കുറിച്ച് മെഴ്‌സിഡീസ് താരം കിമി ആന്റൊണെല്ലി. ഏറ്റവും കുറഞ്ഞ പ്രായത്തിൽ ലോക ചാമ്പ്യൻഷിപ്പ് നേടുന്ന ഡ്രൈവറെന്ന നേട്ടമാണ് ഇറ്റാലിയൻ താരത്തെ തേടിയെത്തിയത്. മെക്‌സിക്കോ സിറ്റി ഗ്രാൻപ്രീയിൽ മൂന്നാം സ്ഥാനത്ത് ഫിനിഷ് ചെയ്തതോടെയാണ് സീസണിൽ നാല് മത്സരങ്ങൾ ശേഷിക്കെ ആന്റൊണെല്ലി കിരീടം ഉറപ്പിച്ചത്.

20 വർഷവും 68 ദിവസവും മാത്രം പ്രായമുള്ളപ്പോഴാണ് ആന്റൊണെല്ലി ലോക ചാമ്പ്യനായത്. 2010-ൽ 23 വർഷവും 134 ദിവസവും പ്രായത്തിൽ കിരീടം നേടിയ സെബാസ്റ്റ്യൻ വെറ്റലിന്റെ റെക്കോർഡാണ് താരം മറികടന്നത്. ഇതോടെ 1953-ൽ ആൽബർട്ടോ അസ്‌കാരി ലോക കിരീടം നേടിയതിനുശേഷം ഫോർമുല വണ്ണിൽ ചാമ്പ്യനാകുന്ന ആദ്യ ഇറ്റാലിയൻ ഡ്രൈവറെന്ന നേട്ടവും ആന്റൊണെല്ലിക്ക് സ്വന്തമായി.

മെക്‌സിക്കോ സിറ്റി ഗ്രാൻപ്രീയിൽ റെഡ് ബുള്ളിന്റെ മാക്‌സ് വെസ്റ്റാപ്പനാണ് ഒന്നാം സ്ഥാനം നേടിയത്. ഫെരാരിയുടെ ലൂയിസ് ഹാമിൽട്ടൺ രണ്ടാമതെത്തിയപ്പോൾ ആന്റൊണെല്ലി മൂന്നാം സ്ഥാനത്തും ഫിനിഷ് ചെയ്തു. 2025-ൽ മെഴ്‌സിഡീസിലൂടെ ഫോർമുല വണ്ണിൽ അരങ്ങേറിയ താരത്തിന്റെ കരിയറിലെ നിർണായക നേട്ടമാണിത്. ഈ സീസണിൽ ഒൻപത് റേസുകളിൽ വിജയിച്ചാണ് ആന്റൊണെല്ലി ചാമ്പ്യൻഷിപ്പിൽ ആധിപത്യം ഉറപ്പിച്ചത്.

മെക്‌സിക്കോയിലെ മത്സരത്തിന് ഇറങ്ങുമ്പോൾ തന്നെ ആന്റൊണെല്ലിക്ക് കിരീടസാധ്യത ശക്തമായിരുന്നു. ബാക്കിയുള്ള മത്സരങ്ങളിൽ വലിയ തിരിച്ചടികൾ നേരിടാതിരുന്നാൽ ചാമ്പ്യൻഷിപ്പ് ഉറപ്പിക്കാമെന്ന നിലയിലായിരുന്നു താരം. സഹതാരം ജോർജ് റസ്സലോ ലൂയിസ് ഹാമിൽട്ടണോ വിജയിച്ചാൽ മാത്രമേ കിരീടപ്പോരാട്ടത്തിൽ ആന്റൊണെല്ലിക്ക് വെല്ലുവിളിയുണ്ടാകുമായിരുന്നുള്ളൂ. അത്തരമൊരു സാഹചര്യത്തിൽ ഒൻപതോ പത്തോ സ്ഥാനങ്ങളിൽ ഫിനിഷ് ചെയ്താലും കിരീടം നേടാൻ താരത്തിന് കഴിയുമായിരുന്നു.

റേസിന്റെ തുടക്കത്തിൽ ചാൾസ് ലെക്ലെയർ, മാക്‌സ് വെസ്റ്റാപ്പൻ, ലൂയിസ് ഹാമിൽട്ടൺ എന്നിവർക്ക് പിന്നിൽ നാലാം സ്ഥാനത്തായിരുന്നു ആന്റൊണെല്ലി. എതിരാളികൾ പിറ്റ് സ്റ്റോപ്പിനായി കയറിയതോടെ മുന്നിലെത്തിയ താരം കൃത്യസമയത്ത് ടയറുകളും മാറ്റി. 45-ാം ലാപ്പിൽ വാൽട്ടേരി ബോട്ടാസിന്റെ കാഡിലാക് കാർ ആദ്യ ടേണിൽ അപകടത്തിൽപ്പെട്ടതോടെ സേഫ്റ്റി കാർ ട്രാക്കിലെത്തി. തുടർന്ന് റെഡ് ഫ്ലാഗ് പ്രഖ്യാപിച്ച് മത്സരം താത്കാലികമായി നിർത്തിവച്ചു.

മത്സരം പുനരാരംഭിച്ചതോടെ ഒന്നാം സ്ഥാനത്തിനായി വെസ്റ്റാപ്പനും ഹാമിൽട്ടണും തമ്മിൽ ശക്തമായ പോരാട്ടം അരങ്ങേറി. ഇതിനിടെ ചാൾസ് ലെക്ലെയറിനെ മറികടന്ന ആന്റൊണെല്ലി മൂന്നാം സ്ഥാനം സ്വന്തമാക്കി. മത്സരം അവസാനിക്കാൻ 12 ലാപ്പുകൾ ശേഷിക്കെ ആർവിഡ് ലിൻഡ്ബ്ലാഡിന്റെ റേസിങ് ബുൾസ് കാർ ഓസ്‌കാർ പിയാസ്ട്രിയുടെ വാഹനവുമായി കൂട്ടിയിടിച്ച് വീണ്ടും അപകടമുണ്ടായി. ഇതോടെ സേഫ്റ്റി കാർ വീണ്ടും ട്രാക്കിലെത്തി.

അവസാന ഏഴ് ലാപ്പുകൾക്കായി മത്സരം പുനരാരംഭിച്ചപ്പോൾ വെസ്റ്റാപ്പൻ, ഹാമിൽട്ടൺ, ആന്റൊണെല്ലി എന്നിവർ തമ്മിൽ കടുത്ത പോരാട്ടമാണ് നടന്നത്. ഒടുവിൽ വെസ്റ്റാപ്പൻ ഒന്നാമനായും ഹാമിൽട്ടൺ രണ്ടാമനായും ഫിനിഷ് ചെയ്തപ്പോൾ മൂന്നാം സ്ഥാനത്തെത്തിയ ആന്റൊണെല്ലി ചരിത്ര കിരീടം ഉറപ്പിച്ചു.