ദോഹ: സാമൂഹ്യപരമായ സേവനപ്രവർത്തനങ്ങളിൽ സജീവമായ ഖത്തർ ഫൗണ്ടേഷൻ ഫോർ സോഷ്യൽ വർക്കിന്റെ കീഴിലുള്ള എഹ്‌സാൻ സെന്റർ ഫോർ എംപവർമെന്റ് ആൻഡ് കെയർ ഓഫ് ദ എൽഡർലി, കതാറാ കൾച്ചറൽ വില്ലേജിൽ പുരുഷ മുതിർന്ന പൗരന്മാർക്കായി ‘കിബാർ അൽ ഖദർ മജ്ലിസ്’ ഉദ്ഘാടനം ചെയ്തു. കതാറാ ഭരണസമിതിയുമായുള്ള സഹകരണത്തോടെയും മ്വാനി ഖത്തറിന്റെ കോർപ്പറേറ്റ് സോഷ്യൽ റെസ്പോൺസിബിലിറ്റി പദ്ധതിയുടെ ഭാഗമായിട്ടുമാണ് മജ്ലിസ് ആരംഭിച്ചത്.
ഖത്തർ ഫൗണ്ടേഷൻ ഫോർ സോഷ്യൽ വർക്കിന്റെ ചീഫ് എക്സിക്യൂട്ടീവ് റാഷിദ് മുഹമ്മദ് അൽ നുവൈമി മജ്ലിസ് ഉദ്ഘാടനം ചെയ്തു. ചടങ്ങിൽ വിവിധ വകുപ്പുകളിലെ ഉദ്യോഗസ്ഥരും പിന്തുണ നൽകിയ സംഘടനകളുടെ പ്രതിനിധികളും നിരവധി മുതിർന്ന പൗരന്മാരും പങ്കെടുത്തു. സമൂഹത്തിൽ മുതിർന്നവർക്കുള്ള ബഹുമാനവും പങ്കാളിത്തവുമെല്ലാം പ്രകടിപ്പിക്കുന്ന സംരംഭമാണിതെന്ന് പങ്കെടുത്തവർ അഭിപ്രായപ്പെട്ടു.
മുതിർന്ന പൗരന്മാരുടെ പരസ്പര ബന്ധവും ആശയവിനിമയവും ശക്തിപ്പെടുത്തുകയും സാമൂഹിക ഒറ്റപ്പെടൽ കുറയ്ക്കുകയും ചെയ്യുകയാണ് മജ്ലിസിന്റെ ലക്ഷ്യം. അവരുടെ മനോവികസനത്തിനും സാമൂഹിക പങ്കാളിത്തത്തിനും സഹായിക്കുന്ന പരിപാടികളും പ്രവർത്തനങ്ങളും ഇതിനായി ഒരുക്കിയിട്ടുണ്ട്.
കതാറയുമായി സഹകരിച്ച് ഈ മജ്ലിസ് ആരംഭിക്കുന്നതിൽ സന്തോഷമുണ്ട്. മുതിർന്ന പൗരന്മാർക്ക് സജീവമായ സാമൂഹിക സാന്നിധ്യം നിലനിർത്താനും അവരുടെ അനുഭവങ്ങൾ പ്രയോജനപ്പെടുത്താനും സഹായിക്കുന്ന ഒരു മാതൃകാ പദ്ധതിയാണിതെന്ന്
എഹ്‌സാൻ സെന്റർ എക്സിക്യൂട്ടീവ് ഡയറക്ടർ മനാൽ അഹ്മദ് അൽ മന്നായി പറഞ്ഞു.
മ്വാനി ഖത്തർ ചീഫ് എക്സിക്യൂട്ടീവ് ക്യാപ്റ്റൻ അബ്ദുല്ല മുഹമ്മദ് അൽ ഖാൻജി പറഞ്ഞു, മുതിർന്ന പൗരന്മാർക്ക് ആദരവും പരിചരണവും നൽകുന്ന ഈ സംരംഭം സമൂഹത്തിന് ദീർഘകാലമായി പോസിറ്റീവ് സ്വാധീനം ചെലുത്തുമെന്നും, മ്വാനി ഖത്തറിന്റെ സാമൂഹിക പ്രതിബദ്ധതയുടെ തെളിവാണിതെന്നും അദ്ദേഹം വ്യക്തമാക്കി.
കതാറാ പബ്ലിക് റിലേഷൻസ് ഡയറക്ടർ സാലിം മുബ്ഖൂത് അൽ മർറി പറഞ്ഞു, എഹ്‌സാൻ സെന്ററുമായി കതാറയുടെ സഹകരണം മുമ്പും നിലനിന്നിരുന്നു എന്നും, ഈ മജ്ലിസ് അതിന്റെ തുടർച്ചയാണെന്നും അദ്ദേഹം കൂട്ടിച്ചേർത്തു.
മുതിർന്ന പൗരന്മാർക്ക് ആധുനിക സൗകര്യങ്ങളോടും സാംസ്കാരിക പൈതൃകത്തിന്റെ മാധുര്യവുമൊത്തും അനുഭവിക്കാനാകുന്ന വിധത്തിലാണ് ‘കിബാർ അൽ ഖദർ മജ്ലിസ്’ രൂപകൽപ്പന ചെയ്തിരിക്കുന്നത്.
