സംസ്ഥാനത്ത് നാളെ മുതൽ ട്രോളിങ് നിരോധനം പ്രാബല്യത്തിൽ വരും. മീനുകളുടെ പ്രജനനകാല സംരക്ഷണം ലക്ഷ്യമിട്ട് ജൂലൈ 31 വരെ ആഴക്കടൽ മത്സ്യബന്ധനം പൂർണമായും നിർത്തിവയ്ക്കും. ഇതോടെ കടലിനെ ആശ്രയിച്ച് ജീവിക്കുന്ന ആയിരക്കണക്കിന് കുടുംബങ്ങൾ രണ്ട് മാസത്തോളം നീളുന്ന വരുമാന പ്രതിസന്ധിയിലേക്ക് കടക്കുകയാണ്.

നിരോധനം ആരംഭിക്കുന്നതിന് മുൻപ് അവസാന പ്രതീക്ഷയുമായി തൊഴിലാളികൾ കടലിലേക്ക് പുറപ്പെട്ടിരിക്കുകയാണ്. കാലാവസ്ഥയും കടലും അനുകൂലമായാൽ രണ്ട് ദിവസത്തിനുള്ളിൽ മികച്ച മീൻലഭ്യതയുമായി മടങ്ങിയെത്താമെന്ന പ്രതീക്ഷയാണ് അവരുടെ ആശ്വാസം. എന്നാൽ സ്കൂളുകൾ തുറന്നതോടെ കുടുംബച്ചെലവുകൾ വർധിച്ച സാഹചര്യത്തിൽ വരുമാനം നിലയ്ക്കുന്ന ദിവസങ്ങളെക്കുറിച്ചുള്ള ആശങ്ക മത്സ്യത്തൊഴിലാളികളുടെ മനസ്സിൽ ശക്തമാണ്.

ട്രോളിങ് നിരോധനകാലത്ത് ഉപജീവനത്തിനായി പലരും പരമ്പരാഗത വള്ളങ്ങളിലെ മത്സ്യബന്ധനത്തിലേക്ക് മാറും. എങ്കിലും സാധാരണ ലഭിക്കുന്ന വരുമാനത്തിന് പകരമാകാൻ അത് മതിയാകില്ലെന്നാണ് തൊഴിലാളികൾ പറയുന്നത്.

മത്സ്യത്തൊഴിലാളികൾ മാത്രമല്ല, തുറമുഖങ്ങളെ ആശ്രയിച്ച് ജീവിക്കുന്ന നിരവധി തൊഴിലാളികൾക്കും ഈ കാലയളവ് കടുത്ത വെല്ലുവിളിയാണ്. ഹാർബറുകളിൽ ബോട്ടുകളും വലകളും ജിപിഎസ്, എക്കോ സൗണ്ടർ ഉൾപ്പെടെയുള്ള ഉപകരണങ്ങളും സുരക്ഷിതമായി സൂക്ഷിക്കുന്ന തിരക്കിലാണ് ഉടമകളും തൊഴിലാളികളും.

ഡീസൽ വിലവർധനയും കുറഞ്ഞ മീൻലഭ്യതയും മൂലം ഇതിനകം തന്നെ പ്രതിസന്ധി നേരിടുന്ന മത്സ്യമേഖല, ട്രോളിങ് നിരോധനത്തിന് ശേഷമെങ്കിലും മികച്ച കാലം തിരിച്ചെത്തുമെന്ന പ്രതീക്ഷയിലാണ്. ആശങ്കകളും പ്രതീക്ഷകളും ഒരുപോലെ മനസ്സിലേറ്റി മത്സ്യത്തൊഴിലാളികൾ മറ്റൊരു ട്രോളിങ് നിരോധന കാലത്തേക്ക് കടക്കുകയാണ്.