തിരുവനന്തപുരം: കേരളത്തിൽ തുലാവർഷമെത്തുന്നതോടെ വരും ദിവസങ്ങളിൽ മഴ ശക്തമാകുമെന്ന് കാലാവസ്ഥാ വകുപ്പിന്റെ മുന്നറിയിപ്പ്. ഒക്ടോബർ 15 മുതൽ 18 വരെ സംസ്ഥാനത്ത് വിവിധയിടങ്ങളിൽ കനത്തമഴയ്ക്ക് സാധ്യതയുണ്ട്. ഇതിന്റെ ഭാഗമായി വിവിധ ജില്ലകളിൽ മഞ്ഞ അലർട്ട് പ്രഖ്യാപിച്ചു.
ഒക്ടോബർ 15-ന് തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി ജില്ലകളിലാണ് മഞ്ഞ മുന്നറിയിപ്പ്. 16-ന് ഇടുക്കി, എറണാകുളം, തൃശൂർ, പാലക്കാട്, മലപ്പുറം, വയനാട് ജില്ലകളിലും മഞ്ഞ അലർട്ട് പ്രഖ്യാപിച്ചിട്ടുണ്ട്.
വടക്കുകിഴക്കൻ കാലവർഷം എന്നറിയപ്പെടുന്ന തുലാവർഷം അടുത്ത രണ്ടുദിവസത്തിനകം കേരളത്തിലെത്തുമെന്നാണ് കാലാവസ്ഥാ വകുപ്പിന്റെ വിലയിരുത്തൽ. അതേസമയം, രാജ്യത്തുനിന്ന് തെക്കുപടിഞ്ഞാറൻ കാലവർഷം പൂർണമായി പിൻവാങ്ങുന്നതും രണ്ടുദിവസത്തിനകമുണ്ടാകുമെന്നാണ് പ്രതീക്ഷിക്കുന്നത്. ഇതിന് പിന്നാലെ തുലാവർഷം സജീവമാകുന്നതോടെ കേരളത്തിൽ മഴ ലഭിക്കും.
