12:30am 18 November 2026
NEWS
മലയാളികൾ മരച്ചീനിയും വാഴമാണവും പുഴുങ്ങിതിന്നേണ്ടി വരുമോ? കേരളത്തിലേക്കുള്ള നെല്ലുവരവ് കുറയുന്നു; അരിവിപണിയിൽ പ്രതിസന്ധി രൂക്ഷമാകുന്നു
17/11/2026  07:13 AM IST
nila
മലയാളികൾ മരച്ചീനിയും വാഴമാണവും പുഴുങ്ങിതിന്നേണ്ടി വരുമോ? കേരളത്തിലേക്കുള്ള നെല്ലുവരവ് കുറയുന്നു; അരിവിപണിയിൽ പ്രതിസന്ധി രൂക്ഷമാകുന്നു

പാലക്കാട്: കേരളത്തിന്റെ അരിവിപണിയിൽ ആശങ്ക വർധിപ്പിച്ച് അയൽസംസ്ഥാനങ്ങളിൽ നിന്നുള്ള നെല്ലിന്റെ വരവിൽ വൻ ഇടിവ്. തമിഴ്നാട്ടിലും കർണാടകയിലും വരൾച്ചയും ഉയർന്ന താപനിലയും നെൽക്കൃഷിയെ ബാധിച്ചതോടെ ഉൽപാദനം ഗണ്യമായി കുറഞ്ഞു. ഇതിന്റെ പ്രതിഫലനമായി കേരളത്തിലേക്കുള്ള നെല്ലുവിതരണം കുറയ്ക്കുമെന്ന് വ്യാപാരികൾ അറിയിച്ചതായി മില്ലുടമകൾ വ്യക്തമാക്കുന്നു. നിലവിൽ നെല്ലിന്റെ വരവിൽ നാലിലൊന്നോളം കുറവുണ്ടായിട്ടുണ്ട്.

കേരളത്തിന്റെ അരി ആവശ്യകതയുടെ വലിയൊരു പങ്കും ഇതരസംസ്ഥാനങ്ങളിൽ നിന്നാണ് എത്തുന്നത്. പ്രതിവർഷം 40 ലക്ഷം മെട്രിക് ടൺ അരി ആവശ്യമുള്ള സംസ്ഥാനത്ത് ഉൽപാദനം അഞ്ചുലക്ഷം മെട്രിക് ടൺ മാത്രമാണ്. അതിനാൽ അയൽസംസ്ഥാനങ്ങളിൽ നിന്നുള്ള വിതരണത്തിലുണ്ടാകുന്ന ചെറിയ കുറവുപോലും കേരളത്തിലെ വിപണിയെ കാര്യമായി ബാധിക്കും.

മട്ട അരിയുടെ ലഭ്യതയെ ബാധിക്കുന്നത് തമിഴ്നാട്ടിലെ കൃഷിയിടങ്ങളിലെ ഉൽപാദനക്കുറവാണ്. കേരളത്തിൽ ഏറെ പ്രചാരമുള്ള മട്ട നെല്ലിന്റെ പ്രധാന സ്രോതസ്സായ തമിഴ്നാട്ടിൽ മഴയുടെ അളവ് കുറഞ്ഞതോടെ കൃഷി 28 ശതമാനത്തോളം ഇടിഞ്ഞു. നെൽക്കതിരിൽ പാലുറയ്ക്കുന്ന ഘട്ടത്തിലെ കടുത്ത ചൂടും വിളവിനെ പ്രതികൂലമായി ബാധിച്ചു.

ഇതിനുപുറമേ കർഷകർ മട്ട നെൽകൃഷിയിൽനിന്ന് പൊന്നി ഇനത്തിലേക്ക് മാറുന്നതും കേരളത്തിന് തിരിച്ചടിയാകുന്നു. പൊന്നിക്ക് കൂടുതൽ വില ലഭിക്കുന്നതാണ് ഈ മാറ്റത്തിന് പിന്നിൽ. ജനുവരി മുതൽ ഏപ്രിൽ വരെയുള്ള കാലയളവിൽ മാത്രം 200 കോടിയിലേറെ രൂപയുടെ നെല്ലാണ് തമിഴ്നാട്ടിൽനിന്ന് കേരളത്തിലെത്തുന്നത്.

കർണാടകയിലെ നെൽകൃഷിയെയും ജലക്ഷാമം ബാധിച്ചിട്ടുണ്ട്. കൃഷ്ണരാജസാഗർ, തുംഗഭദ്ര അണക്കെട്ടുകളിലെ ജലനിരപ്പ് താഴ്ന്നത് കൃഷിക്കാവശ്യമായ വെള്ളത്തിന്റെ ലഭ്യത കുറച്ചു. ഇതോടെ അവിടെയും നെല്ലുൽപാദനം കുറഞ്ഞു. വരും ദിവസങ്ങളിൽ കേരളത്തിലേക്കുള്ള വിതരണം കൂടുതൽ കുറയുമെന്ന സൂചനകൾ വിപണിയിൽ ആശങ്ക സൃഷ്ടിക്കുന്നുണ്ട്.

കൈമ അരിക്കും തിരിച്ചടി; പഴക്കമുള്ള നെല്ലിന്റെ ലഭ്യത കുറഞ്ഞു

മട്ട അരിക്ക് പിന്നാലെ ബിരിയാണി അരിയുടെ വിപണിയിലും പ്രതിസന്ധി പ്രകടമാകുകയാണ്. കേരളത്തിൽ ബിരിയാണി തയ്യാറാക്കാൻ വ്യാപകമായി ഉപയോഗിക്കുന്ന കൈമ അരിയുടെ പ്രധാന വരവ് പശ്ചിമബംഗാളിൽ നിന്നാണ്. ഒന്നോ രണ്ടോ വർഷം പഴക്കമുള്ള നെല്ല് അരിയാക്കുമ്പോഴാണ് കൈമയ്ക്ക് ആവശ്യമായ മണവും ഗുണനിലവാരവും ലഭിക്കുന്നത്.

എന്നാൽ കാലാവസ്ഥാ വ്യതിയാനം മുൻവർഷങ്ങളിലെ നെല്ലുൽപാദനത്തെ ബാധിച്ചതോടെ പഴക്കമുള്ള നെല്ലിന്റെ ലഭ്യത കുറഞ്ഞു. അതേസമയം, രാജ്യാന്തര വിപണിയിൽ ബിരിയാണി അരിക്ക് ആവശ്യക്കാർ വർധിച്ചതോടെ കയറ്റുമതിയും ഉയർന്നു. ഇതോടെ ആഭ്യന്തര വിപണിയിലേക്കും പ്രത്യേകിച്ച് കേരളത്തിലേക്കുമുള്ള അരിയുടെ വരവ് കുറഞ്ഞു.

മട്ട, കൈമ തുടങ്ങിയ ജനപ്രിയ ഇനങ്ങളുടെ ലഭ്യത ഒരേസമയം കുറയുന്നത് കേരളത്തിലെ അരിവിപണിക്ക് ഇരട്ടപ്രഹരമാകുകയാണ്. അയൽസംസ്ഥാനങ്ങളിലെ ഉൽപാദനം മെച്ചപ്പെടാത്ത പക്ഷം വരും മാസങ്ങളിൽ അരിയുടെ ലഭ്യതയിലും വിലയിലും കൂടുതൽ സമ്മർദമുണ്ടാകുമെന്ന ആശങ്കയും ശക്തമാണ്.

ഇവിടെ പോസ്റ്റുചെയ്യുന്ന അഭിപ്രായങ്ങള്‍ കേരളശബ്‌ദത്തിന്റേതല്ല . അഭിപ്രായങ്ങളുടെ പൂര്‍ണ്ണ ഉത്തരവാദിത്വം രചയിതാവിനായിരിക്കും. കേന്ദ്ര സർക്കാരിന്റെ ഐ.ടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളൂം നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
KERALA
img