തിരുവനന്തപുരം: ഭരണമാറ്റത്തിന് പിന്നാലെ പോലീസ് സേനയിൽ നിർണായക സ്ഥലംമാറ്റങ്ങൾ. പോലീസ് ഓഫീസേഴ്സ് അസോസിയേഷൻ സംസ്ഥാന പ്രസിഡന്റ് ആർ. പ്രശാന്തിനെയും ജനറൽ സെക്രട്ടറി സി.ആർ. ബിജുവിനെയും മാറ്റി നിയമിച്ചു. സേനയിൽ ഇടത് അനുകൂല നിലപാടുകൾക്ക് പേരുകേട്ട നേതാക്കളാണ് ഇരുവരും.
കഴിഞ്ഞ ഒരു ദശാബ്ദമായി സ്പെഷ്യൽ ബ്രാഞ്ചിൽ സേവനമനുഷ്ഠിച്ചുവരുന്ന ആർ. പ്രശാന്ത് സ്റ്റേറ്റ് സ്പെഷ്യൽ ബ്രാഞ്ചിൽ സി.ഐ റാങ്കിലുള്ള ഉദ്യോഗസ്ഥനായിരുന്നു. അദ്ദേഹത്തെ തിരുവനന്തപുരം മ്യൂസിയം പോലീസ് സ്റ്റേഷന്റെ എസ്.എച്ച്.ഒയായി നിയമിച്ചു. കൊച്ചിയിലെ സ്പെഷ്യൽ ബ്രാഞ്ചിൽ ജോലി ചെയ്തിരുന്ന സി.ആർ. ബിജുവിനെ കൊച്ചി സിറ്റി പോലീസിലേക്ക് താത്കാലികമായി മാറ്റി. അദ്ദേഹത്തെ ഏത് സ്റ്റേഷനിലേക്കാണ് നിയമിക്കേണ്ടതെന്നത് സിറ്റി പോലീസ് കമ്മീഷണർ തീരുമാനിക്കും. ഇതുസംബന്ധിച്ച അന്തിമ ഉത്തരവ് ഉടൻ പുറത്തിറങ്ങുമെന്നാണ് വിവരം.
ചൊവ്വാഴ്ച വൈകീട്ടോടെയാണ് സംസ്ഥാന പോലീസ് മേധാവി ഇരുവരുടെയും സ്ഥലംമാറ്റ ഉത്തരവ് പുറത്തിറക്കിയത്. ഏറെക്കാലമായി യൂണിഫോം ഡ്യൂട്ടിയിൽ നിന്ന് മാറിനിന്ന ഉദ്യോഗസ്ഥരെ വീണ്ടും ലോ ആൻഡ് ഓർഡർ ചുമതലയിലേക്ക് കൊണ്ടുവരുന്നതിന്റെ ഭാഗമായാണ് നടപടി എന്ന വിലയിരുത്തലും സേനയ്ക്കുള്ളിൽ ഉയരുന്നുണ്ട്.
എന്നാൽ, സാധാരണ ജനറൽ ട്രാൻസ്ഫറിന് പകരം പ്രത്യേക ഉത്തരവിലൂടെ നടത്തിയ ഈ നടപടി രാഷ്ട്രീയ പ്രേരിതമാണെന്നാണ് പോലീസ് അസോസിയേഷന്റെ ആരോപണം. മുൻ സർക്കാരിനോട് അടുത്തുനിന്ന നേതാക്കളെ ലക്ഷ്യമിട്ടുള്ള നീക്കമാണിതെന്ന സംശയവും സംഘടനയ്ക്കുണ്ട്.
വി.ഡി. സതീശന്റെ നേതൃത്വത്തിലുള്ള യുഡിഎഫ് സർക്കാർ അധികാരമേറ്റ് ദിവസങ്ങൾക്കുള്ളിൽ തന്നെ ആഭ്യന്തരവകുപ്പിൽ ഇത്തരം നടപടികൾ ആരംഭിച്ചതോടെ, വരും ദിവസങ്ങളിലും കൂടുതൽ സ്ഥലംമാറ്റങ്ങൾ ഉണ്ടാകുമെന്ന സൂചനകളാണ് ലഭിക്കുന്നത്.
