തിരുവനന്തപുരം: ഭൂപരിഷ്കരണ നിയമത്തിൽ ഭേദഗതി കൊണ്ടുവരുമെന്ന സംസ്ഥാന സർക്കാരിന്റെ പ്രഖ്യാപനം രാഷ്ട്രീയ വിവാദങ്ങൾക്ക് വഴിവെച്ചിരിക്കുകയാണ്. നിയമഭേദഗതിയിലൂടെ കോർപ്പറേറ്റ് സ്ഥാപനങ്ങൾക്ക് ഭൂമി കൈമാറാനാണ് സർക്കാർ ശ്രമിക്കുന്നതെന്ന് പ്രതിപക്ഷം ആരോപിക്കുമ്പോൾ, സമാനമായ നീക്കങ്ങൾ മുൻ ഇടത് സർക്കാരുകളുടെ കാലത്തും ഉണ്ടായിരുന്നുവെന്ന് ചൂണ്ടിക്കാട്ടി പ്രതിരോധം ശക്തമാക്കാനാണ് സർക്കാർ തീരുമാനം.
നിയമത്തിൽ വരുത്തേണ്ട മാറ്റങ്ങൾ പഠിക്കുന്നതിനായി പ്രത്യേക വിദഗ്ധസമിതിയെ നിയോഗിക്കാനാണ് സർക്കാർ ആലോചിക്കുന്നത്. അതേസമയം, നിയമഭേദഗതി സംബന്ധിച്ച ആശങ്കകൾ പൊതുജനങ്ങളിൽ സർക്കാർ വിരുദ്ധ വികാരം സൃഷ്ടിക്കാത്തവിധം മുന്നോട്ട് പോകാനും ഭരണകൂടം ശ്രദ്ധ കേന്ദ്രീകരിക്കുന്നുണ്ട്.
മുൻ ഇടത് സർക്കാരിന്റെ കാലത്ത് തോട്ടം ഭൂമിയിലെ ഒരു നിശ്ചിത വിഹിതം ഫലവൃക്ഷകൃഷിക്കും ടൂറിസം പദ്ധതികൾക്കുമായി ഉപയോഗിക്കാൻ അനുമതി നൽകിയിരുന്നു. നിലവിലെ സർക്കാർ ഈ വ്യവസ്ഥ കൂടുതൽ പ്രായോഗികമാക്കുന്ന തരത്തിലുള്ള മാറ്റങ്ങളാണ് പരിഗണിക്കുന്നത്. ഉടമസ്ഥാവകാശത്തിൽ മാറ്റം വരുത്താതെ ഉപയോഗശൂന്യമായി കിടക്കുന്ന തോട്ടം ഭൂമികൾ മറ്റ് ആവശ്യങ്ങൾക്ക് വിനിയോഗിക്കാൻ അവസരം ഒരുക്കുക എന്നതാണ് ലക്ഷ്യം.
എന്നാൽ ഇതുമായി ബന്ധപ്പെട്ട പരിസ്ഥിതി ആശങ്കകളും സർക്കാർ ഗൗരവമായി കാണുന്നുണ്ട്. പ്രത്യേകിച്ച് ഇടുക്കി പോലുള്ള ജില്ലകളിൽ തോട്ടം ഭൂമിയുടെ സ്വഭാവത്തിൽ വലിയ മാറ്റങ്ങൾ വന്നാൽ പരിസ്ഥിതിക്ക് തിരിച്ചടിയാകാമെന്ന വിലയിരുത്തലുണ്ട്. അതിനാലാണ് വിദഗ്ധരുടെ പഠനത്തിന് മുൻഗണന നൽകുന്നത്.
അതേസമയം, ധവളപത്രത്തിലും ബജറ്റിലുമുള്ള നിർദേശങ്ങൾ സ്വകാര്യ നിക്ഷേപത്തെ പ്രോത്സാഹിപ്പിക്കുന്നതാണെന്ന വിമർശനവുമായി പ്രതിപക്ഷം രംഗത്തെത്തിയിട്ടുണ്ട്. പൊതുമേഖലാ സ്ഥാപനങ്ങളുടെ ഭൂമി മറ്റ് ആവശ്യങ്ങൾക്ക് ഉപയോഗിക്കൽ, ധാതുസമ്പത്ത് അടിസ്ഥാനമാക്കിയുള്ള സ്വകാര്യ നിക്ഷേപം ആകർഷിക്കൽ, ഭൂപരിഷ്കരണ നിയമ ഭേദഗതി തുടങ്ങിയ നിർദേശങ്ങളാണ് ആരോപണങ്ങൾക്ക് അടിസ്ഥാനം.
സംസ്ഥാനം സാമ്പത്തിക പ്രതിസന്ധിയിലാണെന്ന പ്രചാരണത്തിന് ശക്തി പകരാനാണ് പ്രതിപക്ഷ ശ്രമമെന്നാണ് എൽ.ഡി.എഫിന്റെ മറുപടി. വികസന പദ്ധതികൾക്ക് ധനസമാഹരണം നടത്താൻ സ്വകാര്യ നിക്ഷേപം മാത്രമാണ് മാർഗമെന്ന ധാരണ സൃഷ്ടിക്കാനാണ് യു.ഡി.എഫ് ശ്രമിക്കുന്നതെന്നും അവർ ആരോപിക്കുന്നു.
വി.എസ്. അച്യുതാനന്ദൻ സർക്കാരിന്റെ കാലം മുതൽ ഭൂപരിഷ്കരണ നിയമത്തിൽ മാറ്റം കൊണ്ടുവരാനുള്ള ചർച്ചകൾ ഇടതുപക്ഷത്തിനുള്ളിൽ നടന്നിട്ടുണ്ടെന്ന വാദവും സർക്കാർ ഉയർത്തുന്നു. കൂടാതെ, പിണറായി വിജയൻ സർക്കാരിന്റെ കാലത്ത് കാമ്പസ് വ്യവസായ പാർക്കുകൾ ഉൾപ്പെടെ വിവിധ പദ്ധതികൾക്കായി സ്വകാര്യ നിക്ഷേപത്തിന് നൽകിയ ഇളവുകളും ഉദാഹരണമായി ചൂണ്ടിക്കാട്ടാനാണ് നീക്കം. ഇതുസംബന്ധിച്ച വിവരങ്ങൾ ശേഖരിച്ചാണ് പ്രതിപക്ഷ വിമർശനങ്ങളെ നേരിടാനുള്ള സർക്കാരിന്റെ തയ്യാറെടുപ്പ്.
