അഞ്ച് മാസത്തെ ദൂരം, തീപാറുന്ന പരീക്ഷ: ഭരണത്തുടർച്ച തേടി LDF, അതിജീവനത്തിനായി UDF, തലയെണ്ണം കൂട്ടാൻ NDA
തിരുവനന്തപുരം: നിയമസഭാ തിരഞ്ഞെടുപ്പിലേക്ക് ഇനി കഷ്ടിച്ച് അഞ്ചുമാസം മാത്രം. എന്നാൽ, കേരളം മുഴുവൻ ഇപ്പോൾ തദ്ദേശ തിരഞ്ഞെടുപ്പിന്റെ തീപാറുന്ന പോരാട്ടത്തിലാണ്. മൂന്ന് പ്രധാന മുന്നണികളെ സംബന്ധിച്ചും, ഈ തിരഞ്ഞെടുപ്പ് വെറുമൊരു തദ്ദേശ സ്ഥാപന ഭരണത്തിനായുള്ള പോരല്ല; മറിച്ച്, അടുത്ത നിയമസഭാ തിരഞ്ഞെടുപ്പിലേക്കുള്ള ജനഹിതം അളക്കുന്ന ഒരു 'ലിറ്റ്‌മസ് ടെസ്റ്റ്' ആണ്. തീയതി കുറിച്ചതോടെ, രാഷ്ട്രീയ കളത്തിൽ കനൽ വിതറി പോരാട്ടം ഉച്ചസ്ഥായിലായി.
എൽ.ഡി.എഫിന്റെ സ്വപ്നം: ചരിത്രപരമായ ഭരണത്തുടർച്ച
വികസന പ്രവർത്തനങ്ങളും ക്ഷേമ ആനുകൂല്യങ്ങളും മുൻനിർത്തിയാണ് ഇടതുപക്ഷം ജനങ്ങളെ സമീപിക്കുന്നത്. കഴിഞ്ഞ തവണ വ്യക്തമായ മേധാവിത്വം നേടിയ അവർക്ക്, തദ്ദേശ തിരഞ്ഞെടുപ്പിലെ വിജയം നിലവിലെ സംസ്ഥാന ഭരണത്തിനുള്ള ഗുഡ്‌സർട്ടിഫിക്കറ്റായി ഉയർത്തിക്കാട്ടാം. അതോടെ, ചരിത്രത്തിൽ ഇടംപിടിക്കാൻ സാധ്യതയുള്ള വീണ്ടുമൊരു ഭരണത്തുടർച്ച എന്ന അത്യപൂർവ ലക്ഷ്യത്തിലേക്ക് അവർക്ക് ആത്മവിശ്വാസത്തോടെ നീങ്ങാം. ഒരു കാലിടറലുണ്ടായാൽ, അത് സർക്കാരിന്റെ പ്രവർത്തനങ്ങളിലുള്ള ജനങ്ങളുടെ അവമതിപ്പായി വിലയിരുത്തപ്പെടും എന്ന ആശങ്കയും അവർക്കുണ്ട്.
യു.ഡി.എഫിന്റെ പോരാട്ടം:
രാഷ്ട്രീയ അതിജീവനത്തിനായി
തുടർച്ചയായ പരാജയങ്ങളിൽ നിന്ന് പാഠം ഉൾക്കൊണ്ട്, ഈ തദ്ദേശ തിരഞ്ഞെടുപ്പിനെ അതിജീവനത്തിനുള്ള പോരാട്ടമായാണ് യു.ഡി.എഫ് കാണുന്നത്. സർക്കാരിന്റെ ധൂർത്തും സാമ്പത്തിക പ്രതിസന്ധിയും, ശബരിമല സ്വർണത്തട്ടിപ്പ് ഉൾപ്പെടെയുള്ള വിവാദങ്ങളും അവർ പ്രധാന പ്രചാരണ വിഷയമാക്കുന്നു. തദ്ദേശത്തിൽ മികച്ച പ്രകടനം കാഴ്ചവയ്ക്കാൻ സാധിച്ചാൽ, അത് ശക്തമായൊരു തിരിച്ചുവരവിന് വഴിതെളിക്കും. ഒരു തിരിച്ചടി നേരിട്ടാൽ, കേരള രാഷ്ട്രീയത്തിൽ അപ്രസക്തമായ ഒരദ്ധ്യായമായി മാറിയേക്കുമെന്ന ഭയമാണ് മുന്നണിയെ നയിക്കുന്നത്.
എൻ.ഡി.എയുടെ തന്ത്രം:
'തലയെണ്ണം' കൂട്ടാനുള്ള നീക്കം
നിലവിൽ കേവലം 17 ഗ്രാമപഞ്ചായത്തുകളിലും 2 മുനിസിപ്പാലിറ്റികളിലും മാത്രമാണ് എൻ.ഡി.എയ്ക്ക് ഭരണമുള്ളത്. കൂടുതൽ തദ്ദേശ സ്ഥാപനങ്ങളിലും കോർപ്പറേഷനുകളിലും ഭരണം പിടിക്കുക എന്നതാണ് അവരുടെ ലക്ഷ്യം. കേന്ദ്ര പദ്ധതികൾ നടപ്പാക്കുന്നതിൽ സംസ്ഥാന സർക്കാർ ശുഷ്കാന്തി കാട്ടുന്നില്ലെന്ന വിമർശനമാണ് അവർ പ്രധാനമായും ഉന്നയിക്കുന്നത്. ഈ തിരഞ്ഞെടുപ്പിൽ അസാധാരണമായ പ്രകടനം കാഴ്ചവച്ചാൽ, അടുത്ത നിയമസഭാ തിരഞ്ഞെടുപ്പിൽ തങ്ങളുടെ 'തലയെണ്ണം' കൂട്ടാനുള്ള തന്ത്രങ്ങൾ മെനയാൻ അവർക്ക് സാധിക്കും.
കളത്തിൽ മുൻനിര നേതാക്കൾ
തീവ്രമായ മത്സരത്തിനൊരുങ്ങി, മുന്നണികൾ മുൻനിര നേതാക്കളെ ജില്ലകളിൽ തിരഞ്ഞെടുപ്പ് പ്രവർത്തനങ്ങളുടെ ചുമതലക്കാരാക്കി നിയോഗിച്ചു കഴിഞ്ഞു. മുൻനിര നേതാക്കൾ പോലും സ്ഥാനാർത്ഥി പട്ടികയിൽ ഇടംപിടിച്ചിട്ടുണ്ട്. യുവജനങ്ങൾക്ക് കൂടുതൽ അവസരം നൽകി, വലിയ പൊട്ടിത്തെറികളില്ലാതെ സീറ്റു പങ്കുവയ്ക്കലും സ്ഥാനാർത്ഥി നിർണയവും പുരോഗമിക്കുന്നു.
തദ്ദേശ ഭരണത്തിനായുള്ള ഈ പോരാട്ടം, യഥാർത്ഥത്തിൽ അഞ്ച് മാസത്തിനപ്പുറമുള്ള നിയമസഭാ തിരഞ്ഞെടുപ്പിന്റെ ചൂണ്ടുപലകയായി മാറുമെന്നുറപ്പാണ്.
