തിരുവനന്തപുരം: 100 വയസ്സുള്ള അമ്മയെ സംരക്ഷിക്കുന്നതിൽ നിന്ന് മകന് ഒഴിഞ്ഞുമാറാൻ കഴിയില്ലെന്ന് കേരള ഹൈക്കോടതി വ്യക്തമാക്കി. വാർദ്ധക്യസഹജമായ ബുദ്ധിമുട്ടുകൾ അനുഭവിക്കുന്ന അമ്മയ്ക്ക് മറ്റ് മക്കളുണ്ടെന്ന കാരണത്താൽ സംരക്ഷണം നൽകാതിരിക്കാൻ കഴിയില്ലെന്നും കോടതി ചൂണ്ടിക്കാട്ടി.
'മാതാപിതാക്കളുടെയും മുതിർന്ന പൗരന്മാരുടെയും ക്ഷേമത്തിനായുള്ള നിയമം-2007' പ്രകാരം അമ്മയ്ക്ക് ജീവനാംശം നൽകണമെന്ന ഉത്തരവിനെ ചോദ്യം ചെയ്തുകൊണ്ടുള്ള മകന്റെ ഹർജിയിലാണ് ഹൈക്കോടതിയുടെ സുപ്രധാന വിധി. ജസ്റ്റിസ് പി.ജി. അജിത്കുമാറാണ് ഈ വിധി പുറപ്പെടുവിച്ചത്. പ്രായമായ മാതാപിതാക്കളെ സംരക്ഷിക്കേണ്ടത് ഓരോ കുട്ടിയുടെയും വ്യക്തിപരമായ ഉത്തരവാദിത്തമാണെന്നും മറ്റ് കുട്ടികളുടെ സാന്നിധ്യം ഈ ബാധ്യതയിൽ നിന്ന് ഒരാളെയും ഒഴിവാക്കുന്നില്ലെന്നും കോടതി പറഞ്ഞു.
അമ്മയുടെ വാർദ്ധക്യവും അനാരോഗ്യവും പരിഗണിച്ച്, സാമ്പത്തിക സഹായം നിഷേധിക്കുന്നത് നിയമവിരുദ്ധവും മനുഷ്യത്വരഹിതവുമാണെന്ന് കോടതി നിരീക്ഷിച്ചു. സ്വയം ജീവിക്കാൻ കഴിയാത്ത മുതിർന്ന പൗരന്മാരെ സംരക്ഷിക്കാൻ മക്കളോ അവകാശികളോ നിയമപരമായി ബാധ്യസ്ഥരാണെന്ന് 'മാതാപിതാക്കളുടെയും മുതിർന്ന പൗരന്മാരുടെയും ക്ഷേമത്തിനായുള്ള നിയമം-2007' അനുശാസിക്കുന്നു. ഈ നിയമത്തിന്റെ ഉദ്ദേശ്യലക്ഷ്യങ്ങൾ ശക്തിപ്പെടുത്തുന്നതാണ് ഹൈക്കോടതിയുടെ ഈ വിധി.
