കൊച്ചി: സ്ത്രീയുടെ മാന്യതയ്ക്ക് ഭംഗം വരുത്താൻ ഉദ്ദേശിച്ചുള്ളതാണെന്ന് തെളിയിക്കാനായില്ലെന്ന് കണ്ടെത്തി, ഇന്ത്യൻ ശിക്ഷാ നിയമത്തിലെ (IPC) 354-ാം വകുപ്പ് പ്രകാരമുള്ള കുറ്റത്തിൽ നിന്ന് പ്രതിയെ കേരള ഹൈക്കോടതി വിട്ടയച്ചു.
ചാലക്കുടി ജുഡീഷണൽ ഫസ്റ്റ് ക്ലാസ് മജിസ്ട്രേറ്റ് കോടതി-I ചുമത്തുകയും തൃശൂർ അഡീഷണൽ സെഷൻസ് കോടതി-III ശരിവെയ്ക്കുകയും ചെയ്ത ശിക്ഷാവിധിയാണ് ജസ്റ്റിസ് ജോബിൻ സെബാസ്റ്റ്യൻ രാജേന്ദ്രന്റെ ക്രിമിനൽ റിവിഷൻ ഹർജി അനുവദിച്ചുകൊണ്ട് റദ്ദാക്കിയത്.
പഞ്ചായത്ത് റോഡിലൂടെ നടന്നുപോവുകയായിരുന്ന സ്ത്രീയെ പ്രതി കൈമുട്ട് കൊണ്ട് ഇടിച്ചു എന്നാണ് പ്രോസിക്യൂഷൻ ആരോപിച്ചിരുന്നത്. ഈ കേസിൽ പ്രതിക്ക് ഒരു മാസം ലളിതമായ തടവും 1,000 രൂപ പിഴയുമാണ് കീഴ്ക്കോടതികൾ വിധിച്ചിരുന്നത്.
പ്രവൃത്തിയുടെ സ്വഭാവവും ചുറ്റുളള സാഹചര്യങ്ങളും വിലയിരുത്തിയാണ് ഉദ്ദേശ്യം കണ്ടെത്തേണ്ടതെന്ന് ഹൈക്കോടതി വ്യക്തമാക്കി. ഇവിടെ കുറ്റകൃത്യത്തിന് ആധാരമായ ക്രിമിനൽ ഉദ്ദേശ്യം തെളിയിക്കപ്പെട്ടിട്ടില്ല.
സ്ത്രീയുടെ ഭർത്താവിനെതിരെ പ്രതി നേരത്തെ നൽകിയിരുന്ന പരാതി കേസിൽ സംശയത്തിന് ഇടനൽകുന്നുണ്ട്. അതിനാൽ തെളിവുകൾ കൂടുതൽ സൂക്ഷ്മമായി പരിശോധിക്കേണ്ടതുണ്ടെന്നും കോടതി നിരീക്ഷിച്ചു. സംഭവത്തിൽ സ്വതന്ത്രമായ മറ്റു സാക്ഷികളുടെ പിന്തുണയും ലഭ്യമല്ല. പരാതിക്കാരിയുമായുള്ള സാക്ഷിയുടെ ബന്ധം മാത്രം മൊഴിയുടെ വിശ്വാസ്യത തകർക്കില്ലെന്ന് വ്യക്തമാക്കിയ കോടതി, എന്നാൽ നിലവിലുള്ള തെളിവുകൾ വെച്ച് കുറ്റം സംശയാതീതമായി തെളിയിക്കാൻ പ്രോസിക്യൂഷന് കഴിഞ്ഞിട്ടില്ലെന്നും ഉത്തരവിൽ വ്യക്തമാക്കി.
