കൊച്ചി: ജാതിവ്യവസ്ഥയുടെ അതിർവരമ്പുകൾ ഭേദിക്കുന്ന മിശ്രവിവാഹങ്ങൾക്കുള്ള സംവരണാനുകൂല്യങ്ങൾ മതാന്തര വിവാഹങ്ങൾക്കും (Inter-religious marriages) ലഭ്യമാണെന്ന് കേരള ഹൈക്കോടതി. വ്യത്യസ്ത മതങ്ങളിൽപ്പെട്ടവർ തമ്മിലുള്ള വിവാഹങ്ങളെയും മിശ്രവിവാഹ സംവരണ വിഭാഗത്തിൽ ഉൾപ്പെടുത്തണമെന്ന് ജസ്റ്റിസ് ഹരിശങ്കർ വി. മേനോൻ വ്യക്തത വരുത്തി.
ഫാം എംപ്ലോയി തസ്തികയിലേക്കുള്ള നിയമനവുമായി ബന്ധപ്പെട്ട് സമർപ്പിച്ച റിട്ട് ഹർജി പരിഗണിക്കുന്നതിനിടയിലാണ് ഹൈക്കോടതിയുടെ ഈ നിർണ്ണായക ഉത്തരവ്. വ്യത്യസ്ത മതങ്ങളിൽപ്പെട്ടവരുടെ വിവാഹവും വ്യത്യസ്ത സമുദായങ്ങളുടെ സംയോജനമാണ്. അതിനാൽ ഇവരെ മിശ്രവിവാഹ ആനുകൂല്യങ്ങളുടെ പരിധിയിൽ നിന്ന് ഒഴിവാക്കാനാകില്ല. ഭരണഘടനാപരമായ ലക്ഷ്യങ്ങളായ സാമൂഹിക ഏകീകരണം, തുല്യത, പരമ്പരാഗത സാമൂഹിക തടസ്സങ്ങൾ തകർക്കൽ എന്നിവ ലക്ഷ്യമിട്ടുള്ളതാണ് ഈ സുപ്രധാന വിധി.
വ്യാപകമായ സ്വാധീനം: തൊഴിൽ, ക്ഷേമ പദ്ധതികൾ എന്നിവയിൽ മിശ്രവിവാഹ കുടുംബങ്ങൾക്കുള്ള സംവരണവും ആനുകൂല്യങ്ങളും ലഭിക്കുന്നതിന് ഈ വിധി പുതിയ മാനദണ്ഡമാകും.
"വ്യത്യസ്ത മതങ്ങളിൽ നിന്നുള്ളവരുടെ കൂട്ടായ്മയായ മതാന്തര വിവാഹങ്ങളും മിശ്രവിവാഹങ്ങളുടെ വിശാലമായ അർത്ഥവ്യാപ്തിയിൽ ഉൾപ്പെടുന്നതാണ്." - ഹൈക്കോടതി
സാമൂഹികമായ വേർതിരിവുകൾ ഇല്ലാതാക്കുന്നതിൽ മതാന്തര വിവാഹങ്ങളും വലിയ പങ്കുവേവിക്കുന്നുണ്ടെന്ന കോടതിയുടെ കണ്ടെത്തൽ പുരോഗമനപരമായ വലിയൊരു ചുവടുവെപ്പായാണ് വിലയിരുത്തപ്പെടുന്നത്.
