തിരുവനന്തപുരം: സംസ്ഥാനത്ത് കടുത്ത ചൂട് തുടരുന്നതിനിടെ ഉഷ്ണതരംഗ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ്. പാലക്കാട്, തൃശ്ശൂർ, കൊല്ലം ജില്ലകളിലാണ് പ്രത്യേക ജാഗ്രത നിർദേശം. വെള്ളിയാഴ്ചയും ഈ മുന്നറിയിപ്പ് തുടരുമെന്നാണ് അറിയിപ്പ്.
ഒരു പ്രദേശത്ത് അന്തരീക്ഷ താപനില സാധാരണയെക്കാൾ 4.5 ഡിഗ്രി സെൽഷ്യസോ അതിലധികമോ ഉയരുന്ന അവസ്ഥയാണ് ഉഷ്ണതരംഗം. സമതലപ്രദേശങ്ങളിൽ 40°C അല്ലെങ്കിൽ അതിലധികം.തീരപ്രദേശങ്ങളിൽ 37°C അല്ലെങ്കിൽ അതിലധികം. ഇത്തരം സാഹചര്യങ്ങൾ തുടർച്ചയായി രണ്ട് ദിവസം നിലനിൽക്കുമ്പോൾ ഉഷ്ണതരംഗമായി പ്രഖ്യാപിക്കും.
കേരളത്തിൽ ഉഷ്ണതരംഗം സാധാരണ സംഭവമല്ല. 2016-ൽ പാലക്കാട്, തൃശ്ശൂർ ജില്ലകളിലും 2024-ൽ പാലക്കാട്, കോഴിക്കോട് ജില്ലകളിലുമാണ് ഇതിന് മുമ്പ് ഇത്തരം സാഹചര്യം രേഖപ്പെടുത്തിയിരിക്കുന്നത്. നിലവിലെ സാഹചര്യത്തിൽ 26 വരെ സംസ്ഥാനത്തെ 12 ജില്ലകളിൽ താപനില സാധാരണ നിലയെക്കാൾ 3 മുതൽ 4 ഡിഗ്രി വരെ കൂടുതലായിരിക്കും.
ചൂട് 40 ഡിഗ്രി വരെ ഉയരാൻ സാധ്യത കണക്കിലെടുത്ത് കൊല്ലം, തൃശ്ശൂർ ജില്ലകളിലെ എല്ലാ വിദ്യാഭ്യാസ സ്ഥാപനങ്ങൾക്കും ഇന്ന് അവധി പ്രഖ്യാപിച്ചു. പ്രൊഫഷണൽ കോളേജുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾക്കാണ് ജില്ലാ കളക്ടർമാർ വെള്ളിയാഴ്ച അവധി പ്രഖ്യാപിച്ചിരിക്കുന്നത്.
