കൊച്ചി: മുനമ്പത്തെ താമസക്കാരിൽ നിന്ന് ഭൂനികുതി സ്വീകരിക്കാൻ സംസ്ഥാന സർക്കാരിന് ഹൈക്കോടതി ഇടക്കാല അനുമതി നൽകി. കേസിൽ അന്തിമ വിധി വരുന്നതുവരെ താൽക്കാലികമായി ഭൂനികുതി സ്വീകരിക്കാമെന്നാണ് ജസ്റ്റിസ് സി. ജയചന്ദ്രൻ നൽകിയ നിർദേശം.
മുനമ്പം വഖഫ് ഭൂമിയല്ലെന്ന ഹൈക്കോടതി ഡിവിഷൻ ബെഞ്ചിന്റെ മുൻ ഉത്തരവിനെ തുടർന്ന്, റവന്യൂ വകുപ്പിന് ഭൂനികുതി സ്വീകരിക്കാനുള്ള നിർദേശം നൽകണമെന്ന് ആവശ്യപ്പെട്ട് ഭൂസംരക്ഷണ സമിതി ഉൾപ്പെടെയുള്ള ഹർജികളും കോടതിയുടെ പരിഗണനയിൽ ആയിരുന്നു. ഈ ഹർജികൾ വേഗത്തിൽ പരിഗണിക്കണമെന്ന സർക്കാരിന്റെ അഭ്യർത്ഥനയെ തുടർന്നാണ് കോടതിയുടെ ഇടക്കാല തീരുമാനം.
1950ലെ ആധാരപ്രകാരം ഭൂമി ഫറൂഖ് കോളേജിന് നൽകിയ ദാനം ആയിരുന്നെങ്കിലും ഭൂമി തിരിച്ചെടുക്കാനുള്ള വ്യവസ്ഥ നിലവിൽ വന്നതോടെ ഇത് വഖഫ് ഭൂമിയുടെ പരിധിയിൽപ്പെടില്ല എന്ന് നേരത്തേ കോടതി നിരീക്ഷിച്ചിരുന്നു. അതേസമയം, മുനമ്പം വഖഫ് ഭൂമിയല്ലെന്ന ഡിവിഷൻ ബെഞ്ചിന്റെ തീരുമാനം ചോദ്യം ചെയ്യിച്ച് വഖഫ് സംരക്ഷണ സമിതി സുപ്രീംകോടതിയെ സമീപിച്ചിട്ടുണ്ട്.
