തിരുവനന്തപുരം: മാസപ്പടി കേസിൽ സംസ്ഥാന സർക്കാരിന്റെ ഭാഗത്തുനിന്ന് നിർണായക നീക്കം. സി.എം.ആർ.എൽ–എക്സാലോജിക് ഇടപാടുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയൻ, മുൻ മന്ത്രി പി.എ. മുഹമ്മദ് റിയാസ്, ടി. വീണ എന്നിവർക്കെതിരെ സംസ്ഥാന സർക്കാർ അന്വേഷണം പ്രഖ്യാപിച്ചു.
എൻഫോഴ്സ്മെന്റ് ഡയറക്ടറേറ്റ് സംസ്ഥാന പൊലീസ് മേധാവിക്ക് നൽകിയ റിപ്പോർട്ടിന്റെ അടിസ്ഥാനത്തിലാണ് നടപടി. അഴിമതി നിരോധന നിയമപ്രകാരം കേസ് രജിസ്റ്റർ ചെയ്ത് അന്വേഷണം നടത്തണമെന്നായിരുന്നു ഇ.ഡിയുടെ ആവശ്യം. സി.എം.ആർ.എൽ–എക്സാലോജിക് സാമ്പത്തിക ഇടപാടുകൾക്ക് പുറമെ ഹവാല ഇടപാടുകൾ സംബന്ധിച്ച ആരോപണങ്ങളും ഇ.ഡി. റിപ്പോർട്ടിൽ ഉന്നയിച്ചിട്ടുണ്ട്.
ഇ.ഡിയുടെ റിപ്പോർട്ടിൽ ഉന്നയിച്ച ആരോപണങ്ങളിൽ അന്വേഷണം നടത്താൻ നിയമപരമായി സാധിക്കുമെന്നാണ് അഡ്വക്കറ്റ് ജനറലിന്റെ നിയമോപദേശം. റിപ്പോർട്ടും അനുബന്ധ രേഖകളും പരിശോധിച്ച ശേഷമാണ് സർക്കാർ അന്വേഷണ നടപടികളിലേക്ക് കടക്കുന്നത്.
മുൻ മുഖ്യമന്ത്രി പിണറായി വിജയൻ, മകൾ ടി. വീണ, മരുമകനും മുൻ മന്ത്രിയുമായ മുഹമ്മദ് റിയാസ് എന്നിവർക്കെതിരെ അന്വേഷണം ആവശ്യപ്പെട്ടാണ് ഇ.ഡി. സംസ്ഥാന പൊലീസ് മേധാവിക്ക് റിപ്പോർട്ട് നൽകിയത്. ആരോപണങ്ങൾ തെളിയിക്കപ്പെട്ട വസ്തുതകളല്ലെന്നും, അവ ഇ.ഡി. അന്വേഷണത്തിൽ ഉന്നയിച്ച ആരോപണങ്ങളാണെന്നും ശ്രദ്ധേയമാണ്.
അന്വേഷണം പ്രാഥമിക പരിശോധനയിലൂടെയോ നേരിട്ട് എഫ്.ഐ.ആർ രജിസ്റ്റർ ചെയ്തോ മുന്നോട്ടുകൊണ്ടുപോകണമോ എന്നതടക്കമുള്ള കാര്യങ്ങളിൽ സംസ്ഥാന പൊലീസ് മേധാവിയുടെ നേതൃത്വത്തിൽ തുടർനടപടികൾ തീരുമാനിക്കും. അന്വേഷണം വിജിലൻസിനെയോ പ്രത്യേക അന്വേഷണ സംഘത്തെയോ ഏൽപ്പിക്കുന്നതും പരിഗണനയിലുണ്ടെന്ന റിപ്പോർട്ടുകളും പുറത്തുവന്നിട്ടുണ്ട്.
