കൊച്ചി: ഗോവൻ വിമോചന സമരം ഗഹനമായ പഠനത്തിന് വിധേയമാക്കണമെന്നും അതിന് നേതൃത്വം നൽകിയ വീര ദേശാഭിമാനികളിൽ നിന്നും ആവേശം ഉൾക്കൊള്ളണമെന്നും കേരള ഗവർണ്ണർ രാജേന്ദ്ര വിശ്വനാഥ ആർലേക്കർ കൊച്ചി അന്താരാഷ്ട്ര പുസ്തകോത്സവ വേദിയിൽ നടന്ന പതിനെട്ട് ജൂൺ - ഒരു ക്രാന്തി യാത്ര എന്ന പുസ്തകത്തിൻ്റെ പ്രകാശനം നടത്തിക്കൊണ്ട് അഭിപ്രായപ്പെട്ടു.   ഐതിഹാസികമായ സമരമാണ് ഗോവയുടെ വിമോചനത്തിന് വേണ്ടി പോർച്ചുഗീസുകാർക്ക് എതിരെ റാം മനോഹർ ലോഹ്യയുടെയും, ജഗന്നാഥ റാവു ജോഷിയുടെയും നേതൃത്വത്തിൽ നടന്നത്. പോർച്ചുഗീസുകാർ    ഗോവൻ ജനതയോട് കാട്ടിയ ക്രൂരതകൾ ഒരു കാരണവശാലും മറക്കരുതെന്നും, മറക്കാൻ ആവില്ലെന്നും ഗവർണ്ണർ അഭിപ്രായപ്പെട്ടു. ഇത്തരം ചരിത്രത്തിലെ ഏടുകളെ കുറിച്ച് സ്മരിക്കാനും, സംവദിക്കാനും പുതിയ തലമുറ തയ്യാറാകണമെന്നും, അതിനായി ഗഹനമായ വായനയിലേക്ക് ചെറുപ്പക്കാർ തിരിയണമെന്നും അദ്ദേഹം കൂട്ടിച്ചേർത്തു. സ്വാതന്ത്ര്യ സമര സേനാനിയും, എഴുത്തുകാരനുമായ ലക്ഷ്മിദാസ് ബോർക്കർ എഴുതി ആർ.ഭാസ്കർ മലയാളത്തിലേക്ക് വിവർത്തനം ചെയ്ത "പതിനെട്ട് ജൂൺ ഒരു ക്രാന്തി യാത്ര" എന്ന പുസ്തകത്തിൻ്റെ പ്രകാശനം നടത്തി സംസാരിക്കുകയായിരുന്നു ഗവർണ്ണർ.   ഗോവയുടെ വിമോചനത്തിനായി 1960കളിൽ വീര പോരാട്ടം നടത്തിയ ലെഫ്റ്റ്.കമാൻഡർ പി. കെ നാരായണപ്പിള്ളയെ (റിട്ട) വേദിയിൽ പൊന്നാടയണിയിച്ച് ആദരിച്ചതും, തിരിച്ച് തന്നോടൊപ്പം പ്രവർത്തിച്ച ധീര ജവാന്മാർക്കും അവരുടെ ഓർമ്മകൾക്കും ആദര സൂചകമായി സല്യൂട്ട് നൽകിയപ്പോൾ നിറഞ്ഞ സദസ്സ് കരഘോഷത്തോടെയാണ് സ്വീകരിച്ചത്. നിതിൻ ബോർക്കർ അധ്യക്ഷനായ ചടങ്ങിൽ ആർ.എസ്. ഭാസ്കർ, ഡോ.പൂജ പി,  എൻ.എസ് സരിത എന്നിവർ പങ്കെടുത്തു സംസാരിച്ചു.

Photo Courtesy - Google