തിരുവനന്തപുരം: സംസ്ഥാനത്ത് തടവുപുള്ളികളുടെ എണ്ണം വർധിച്ചുവരുന്ന സാഹചര്യത്തിൽ ഒരു സെൻട്രൽ ജയിൽ കൂടി സ്ഥാപിക്കേണ്ടതുണ്ടെന്ന് ആഭ്യന്തരമന്ത്രി രമേശ് ചെന്നിത്തല വ്യക്തമാക്കി. നിലവിലെ ജയിലുകളിൽ സൗകര്യങ്ങളുടെ അപര്യാപ്തത പരിഹരിക്കുന്നതിനും ജീവനക്കാരുടെ എണ്ണം വർധിപ്പിക്കുന്നതിനുമായി സർക്കാർ നടപടികൾ ആലോചിച്ചുവരികയാണെന്നും അദ്ദേഹം പറഞ്ഞു.
ജയിൽ ആസ്ഥാനത്ത് മുതിർന്ന ഉദ്യോഗസ്ഥരുമായി നടത്തിയ അവലോകന യോഗത്തിന് ശേഷമാണ് മന്ത്രി ഇക്കാര്യം അറിയിച്ചത്. സംസ്ഥാനത്തെ ജയിലുകളെ ശിക്ഷാകേന്ദ്രങ്ങൾ മാത്രമല്ല, തടവുപുള്ളികളെ സമൂഹത്തിന്റെ മുഖ്യധാരയിലേക്ക് തിരിച്ചെത്തിക്കാൻ സഹായിക്കുന്ന തെറ്റുതിരുത്തൽ കേന്ദ്രങ്ങളാക്കി മാറ്റുന്നതിന് സർക്കാർ പ്രാധാന്യം നൽകുന്നുണ്ടെന്നും അദ്ദേഹം പറഞ്ഞു.
ജയിൽ സംവിധാനത്തിന്റെ സമഗ്ര നവീകരണത്തിനും പരിഷ്കരണത്തിനുമായി പ്രത്യേക പദ്ധതികൾ നടപ്പാക്കും. എല്ലാ ജയിലുകളിലും വിഡിയോ കോൺഫറൻസിങ് സൗകര്യം ഒരുക്കി നടപടിക്രമങ്ങൾ കൂടുതൽ കാര്യക്ഷമമാക്കാനും ആധുനികവത്കരണം ഉറപ്പാക്കാനുമാണ് ലക്ഷ്യമെന്ന് ആഭ്യന്തരമന്ത്രി വ്യക്തമാക്കി.
