കൊച്ചി: സന്ദേശങ്ങൾക്കൊപ്പം ഒളിപ്പിച്ച് അയക്കുന്ന രഹസ്യ ഫയലുകൾ ഉപയോഗിച്ച് സ്ഥാപനങ്ങളെയും വ്യക്തികളെയും ലക്ഷ്യമിട്ട് കോടികളുടെ സൈബർ തട്ടിപ്പ് വ്യാപിക്കുന്നതായി സൈബർ പോലീസ് മുന്നറിയിപ്പ് നൽകി. നേരത്തെ വ്യാപകമായി റിപ്പോർട്ട് ചെയ്ത വ്യാജ എം-പരിവാഹൻ എ.പി.കെ. തട്ടിപ്പിന് സമാനമായ രീതിയിലാണ് പുതിയ ആക്രമണം.

ബിസിനസ് സ്ഥാപനങ്ങളുമായി സാമ്പത്തിക ഇടപാടുകൾ നടത്തുന്ന ഉപഭോക്താക്കളുടെയോ വിതരണക്കാരുടെയോ ഹാക്ക് ചെയ്യപ്പെട്ട സോഷ്യൽ മീഡിയ അക്കൗണ്ടുകളിൽ നിന്ന് 'അക്കൗണ്ട് സ്റ്റേറ്റ്മെന്റ്' എന്ന പേരിൽ .vbs എക്സ്റ്റൻഷനുള്ള ഫയലുകളാണ് അയക്കുന്നത്. ഈ ഫയൽ തുറക്കുന്നതോടെ കമ്പ്യൂട്ടറിലോ ലാപ്ടോപ്പിലോ മാൽവെയർ ഇൻസ്റ്റാൾ ചെയ്യപ്പെടുകയും ഉപകരണത്തിന്റെ നിയന്ത്രണം തട്ടിപ്പുകാർ ഏറ്റെടുക്കുകയും ചെയ്യും.

തുടർന്ന് ബ്രൗസറുകളിൽ സൂക്ഷിച്ചിരിക്കുന്ന പാസ്‌വേഡുകളും മറ്റ് രഹസ്യ വിവരങ്ങളും ചോർത്തിയെടുക്കുന്ന മാൽവെയർ, സ്ഥാപനത്തിലെ മുതിർന്ന ഉദ്യോഗസ്ഥരുടെ വാട്‌സ്ആപ്പ് അക്കൗണ്ടുകളും ഹൈജാക്ക് ചെയ്യുന്നു. പിന്നീട് അവരുടെ പേരിൽ വ്യാജ സന്ദേശങ്ങൾ അയച്ച് ജീവനക്കാരോട് പണം കൈമാറാൻ ആവശ്യപ്പെടുന്നതാണ് തട്ടിപ്പിന്റെ രീതി.

സ്വീകരിക്കേണ്ട മുൻകരുതലുകൾ

വാട്‌സ്ആപ്പിലൂടെയോ മറ്റ് സന്ദേശമാധ്യമങ്ങളിലൂടെയോ ലഭിക്കുന്ന അക്കൗണ്ട് സ്റ്റേറ്റ്‌മെന്റുകളോ മറ്റ് ഫയലുകളോ തുറക്കുന്നതിന് മുമ്പ് അയച്ചയാളുമായി നേരിട്ട് ഫോണിൽ ബന്ധപ്പെടണമെന്ന് സൈബർ പോലീസ് നിർദേശിക്കുന്നു. സംശയാസ്പദമായ ലിങ്കുകളോ അസാധാരണ എക്സ്റ്റൻഷനുകളുള്ള ഫയലുകളോ ഡൗൺലോഡ് ചെയ്യുകയോ പ്രവർത്തിപ്പിക്കുകയോ ചെയ്യരുത്. വാട്‌സ്ആപ്പ് സന്ദേശം മാത്രം അടിസ്ഥാനമാക്കി ഔദ്യോഗിക സ്ഥിരീകരണമില്ലാതെ പണം കൈമാറുന്നതും ഒഴിവാക്കണം.

വ്യാജ എം-പരിവാഹൻ തട്ടിപ്പും സമാന അപകടം

കേരളത്തിൽ നേരത്തെ വ്യാജ എം-പരിവാഹൻ സന്ദേശങ്ങളിലൂടെ ലക്ഷക്കണക്കിന് രൂപയുടെ തട്ടിപ്പാണ് നടന്നത്. ട്രാഫിക് പിഴ അടയ്ക്കണമെന്ന് കാണിച്ച് അയച്ച സന്ദേശത്തിനൊപ്പം നൽകിയിരുന്ന എ.പി.കെ. ഫയൽ ഡൗൺലോഡ് ചെയ്തതോടെ മൊബൈൽ ഫോൺ പൂർണമായും തട്ടിപ്പുകാരുടെ നിയന്ത്രണത്തിലാകുകയായിരുന്നു.

ഫയൽ പിന്നീട് ഡിലീറ്റ് ചെയ്താലും മാൽവെയർ പ്രവർത്തനം തുടരുമെന്നും, ഗൂഗിൾ പേ, ഫോൺപേ, ബാങ്കിംഗ് ആപ്പുകൾ ഉൾപ്പെടെയുള്ള സാമ്പത്തിക ഇടപാടുകൾ തട്ടിപ്പുകാർ നിരീക്ഷിക്കാൻ സാധ്യതയുണ്ടെന്നും അധികൃതർ മുന്നറിയിപ്പ് നൽകുന്നു.

വായ്പാ ആപ്പുകളുടെ കെണിയും തുടരുന്നു

തിരുവനന്തപുരം കേന്ദ്രീകരിച്ച് പ്രവർത്തിച്ചിരുന്ന രാജ്യാന്തര ഓൺലൈൻ വായ്പാ തട്ടിപ്പ് സംഘത്തെ അടുത്തിടെ പോലീസ് പിടികൂടിയിരുന്നു. 'ഓപ്പറേഷൻ തൂഫാൻ' പരിശോധനയിൽ 18 പേരെ അറസ്റ്റ് ചെയ്യുകയും 50 കമ്പ്യൂട്ടറുകൾ പിടിച്ചെടുക്കുകയും ചെയ്തിരുന്നു. വിദേശികളെയാണ് സംഘം പ്രധാനമായും ലക്ഷ്യമിട്ടിരുന്നത്.

നിയന്ത്രണങ്ങൾ ശക്തമാക്കിയിട്ടും വ്യാജ വായ്പാ ആപ്പുകളും അവയുടെ പരസ്യങ്ങളും ഇപ്പോഴും വ്യാപകമാണെന്നാണ് പോലീസ് ചൂണ്ടിക്കാട്ടുന്നത്. ഇത്തരം ആപ്പുകൾ ഇൻസ്റ്റാൾ ചെയ്യുന്നവരിൽ നിന്ന് കോൺടാക്റ്റുകൾ, എസ്.എം.എസ്., കോൾ വിവരങ്ങൾ, ക്യാമറ, മൈക്രോഫോൺ, ലൊക്കേഷൻ, സ്റ്റോറേജ് തുടങ്ങിയവയിലേക്കുള്ള അനുമതികൾ കൈവശപ്പെടുത്തുന്നു.

തുടർന്ന് ആധാർ, പാൻ കാർഡ്, ബാങ്ക് അക്കൗണ്ട് വിവരങ്ങൾ, ഫോട്ടോ, ജോലി സംബന്ധമായ രേഖകൾ എന്നിവ അപ്‌ലോഡ് ചെയ്യാൻ ആവശ്യപ്പെടുകയും ചെറിയ തുക അക്കൗണ്ടിലേക്ക് അയച്ച് വിശ്വാസം നേടിയെടുക്കുകയും ചെയ്യുന്നു. പിന്നീട് പ്രോസസിങ് ഫീ, ജിഎസ്ടി, ഇൻഷുറൻസ്, വെരിഫിക്കേഷൻ ചാർജ്, സെക്യൂരിറ്റി ഡിപ്പോസിറ്റ്, അക്കൗണ്ട് ആക്ടിവേഷൻ ഫീ തുടങ്ങിയ പേരുകളിൽ പണം ഈടാക്കുന്നതാണ് രീതി.

പണം ലഭിച്ച ശേഷവും വിവിധ കാരണങ്ങൾ ചൂണ്ടിക്കാട്ടി വീണ്ടും തുക ആവശ്യപ്പെടുകയും ഒടുവിൽ ബന്ധം വിച്ഛേദിക്കുകയും ചെയ്യുന്നതായി പോലീസ് പറയുന്നു. ചില കേസുകളിൽ കൈവശപ്പെടുത്തിയ ഫോട്ടോകൾ മോർഫ് ചെയ്ത് കുടുംബാംഗങ്ങൾക്കും സുഹൃത്തുക്കൾക്കും പ്രചരിപ്പിക്കുമെന്ന് ഭീഷണിപ്പെടുത്തി കൂടുതൽ പണം തട്ടാനുള്ള ശ്രമവും നടക്കുന്നു.

സ്ത്രീകളെയാണ് വായ്പാ ആപ്പ് തട്ടിപ്പുകാർ കൂടുതലായി ലക്ഷ്യമിടുന്നതെന്നും, കഴിഞ്ഞ ഒരു വർഷത്തിനിടെ കേരളത്തിൽ 2,317 സ്ത്രീകൾ ഇത്തരം തട്ടിപ്പുകൾക്ക് ഇരയായിട്ടുണ്ടെന്നും പോലീസ് വ്യക്തമാക്കി.