യു.ഡി.എഫിലേക്ക് മടങ്ങിയേക്കുമെന്ന അഭ്യൂഹങ്ങൾക്കിടെ കേരള കോൺഗ്രസ് (എം) ഇന്ന് കോട്ടയത്ത് നിർണായക സംസ്ഥാന സെക്രട്ടേറിയറ്റ് യോഗം ചേരും. വരാനിരിക്കുന്ന തദ്ദേശ സ്വയംഭരണ തിരഞ്ഞെടുപ്പ് ഒരുക്കങ്ങളാണ് ഔദ്യോഗിക അജണ്ടയെങ്കിലും, നിലമ്പൂർ ഉപതിരഞ്ഞെടുപ്പിലേറ്റ തിരിച്ചടിയും തുടർന്നുണ്ടായ രാഷ്ട്രീയ സാഹചര്യങ്ങളും യോഗത്തിൽ പ്രധാന ചർച്ചയാകുമെന്ന് പാർട്ടി വൃത്തങ്ങൾ സൂചിപ്പിക്കുന്നു.
സർക്കാർ വിരുദ്ധ വികാരവും, കർഷകർക്കിടയിലുള്ള അതൃപ്തിയും പാർട്ടിക്കുള്ളിൽ വലിയ ആശങ്ക സൃഷ്ടിച്ചിട്ടുണ്ടെന്ന് ഒരു മുതിർന്ന കെ.സി(എം) നേതാവ് സമ്മതിച്ചു. കാർഷിക മേഖലയിലെ പ്രതിസന്ധി, വന്യജീവി ആക്രമണങ്ങൾ, മൂന്നാർ ഭൂമി പ്രശ്നം തുടങ്ങിയ പരിഹരിക്കപ്പെടാത്ത വിഷയങ്ങൾ ഇടതുമുന്നണിയിൽ തുടരുകയാണെങ്കിൽ തങ്ങളുടെ പരമ്പരാഗത വോട്ടുബാങ്കുമായി വീണ്ടും ചർച്ചകൾ നടത്തേണ്ടി വരുമെന്നും അദ്ദേഹം കൂട്ടിച്ചേർത്തു.
അതേസമയം, എൽ.ഡി.എഫിൽ നിന്ന് പുറത്തുവരുന്നത് എളുപ്പമാകില്ലെന്ന് പാർട്ടിക്കുള്ളിൽ പൊതുവെയൊരു അഭിപ്രായമുണ്ട്. ജോസ് കെ. മാണിക്ക് രാജ്യസഭാ സീറ്റ് നൽകിയത് ഉൾപ്പെടെയുള്ള വലിയ വിട്ടുവീഴ്ചകൾ സി.പി.എം. കെ.സി(എം)നെ മുന്നണിയിൽ നിലനിർത്താൻ ചെയ്തിട്ടുണ്ട്. വ്യക്തമായ ബദൽ മുന്നണി ഇല്ലാത്തതും, ഇതിനോടകം എൽ.ഡി.എഫിൽ വലിയ രാഷ്ട്രീയ നിക്ഷേപം നടത്തിയതും നേതൃത്വത്തെ കൂടുതൽ ജാഗ്രത പുലർത്താൻ പ്രേരിപ്പിക്കുന്നു.
പാർട്ടിക്കുള്ളിൽ സമ്മർദ്ദം വർദ്ധിക്കുന്നുണ്ടെങ്കിലും, ചില വിഭാഗങ്ങൾ നിലവിലെ സാഹചര്യത്തെ തദ്ദേശ തിരഞ്ഞെടുപ്പിൽ കൂടുതൽ സീറ്റുകൾ ആവശ്യപ്പെടാനും കെ.സി(എം)-ന്റെ അടിത്തട്ടിലുള്ള ശക്തി വീണ്ടെടുക്കാനുമുള്ള അവസരമായി കാണുന്നു. എന്നാൽ പാർട്ടി ചെയർമാൻ ഈ നിലപാടിനെ എത്രത്തോളം പിന്തുണക്കുമെന്നത് വ്യക്തമല്ല.
ഇതിനിടെ, പാർട്ടി തങ്ങളുടെ തിരഞ്ഞെടുപ്പ് പ്രചാരണങ്ങൾക്ക്, പ്രത്യേകിച്ച് മധ്യതിരുവിതാംകൂറിൽ, ഇതിനോടകം ഒരുക്കങ്ങൾ തുടങ്ങിയിട്ടുണ്ട്. വോട്ടർമാരുടെ മടുപ്പും സർക്കാർ വിരുദ്ധ തരംഗവും മറികടക്കാൻ, ശക്തമായ സാമൂഹിക വേരുകളുള്ളവരെയും കുടുംബബന്ധങ്ങളുള്ളവരെയും സ്ഥാനാർത്ഥികളാക്കി നിർത്താനാണ് കെ.സി(എം) ശ്രമിക്കുന്നത്. ഇത് വാർഡ് തലത്തിൽ ജനങ്ങളുടെ വിശ്വാസം വീണ്ടെടുക്കാൻ സഹായിക്കുമെന്നാണ് പ്രതീക്ഷ. മധ്യതിരുവിതാംകൂറിലെ കോൺഗ്രസ് നേതൃത്വം കെ.സി(എം)നെ യു.ഡി.എഫിലേക്ക് സ്വാഗതം ചെയ്യാൻ സന്നദ്ധത പ്രകടിപ്പിച്ചിട്ടുണ്ട്. ക്രൈസ്തവ വോട്ടുകൾ ഏകീകരിക്കുന്നതിനൊപ്പം, മധ്യതിരുവിതാംകൂറിലെ തങ്ങളുടെ ശക്തി വീണ്ടെടുക്കുന്നതിനും കത്തോലിക്കാ സഭയുമായുള്ള ആഴത്തിലുള്ള ബന്ധത്തിനും കെ.സി(എം)ന്റെ തിരിച്ചുവരവ് നിർണായകമാണെന്ന് കോൺഗ്രസ് കണക്കാക്കുന്നു.
