തിരുവനന്തപുരം: കേരള കോൺഗ്രസ് (എം) ഇടതുമുന്നണി വിട്ട് യു.ഡി.എഫിലേക്ക് മടങ്ങുമെന്ന അഭ്യൂഹങ്ങൾ ശക്തമാവുന്നതിനിടെ, പാർട്ടിയുടെ ചരിത്രവും നിലവിലെ സാഹചര്യങ്ങളും ചർച്ചയാകുന്നു. "നിലത്തുവച്ചാൽ ഉറുമ്പരിക്കും തലയിൽ വച്ചാൽ പേനരിക്കും" എന്ന് കെ.എം. മാണി വിശേഷിപ്പിച്ച കേരള കോൺഗ്രസ് (എം) എന്ന പാർട്ടി വളരുന്തോറും പിളരുകയും പിളരുന്തോറും വളരുകയും ചെയ്ത ചരിത്രമുള്ള ഒന്നാണ്.
പ്രതിപക്ഷ നേതാവ് വി.ഡി. സതീശൻ യു.ഡി.എഫ് വിപുലീകരിക്കുമെന്ന് പ്രസ്താവിച്ചതോടെയാണ് കേരള കോൺഗ്രസിനെ മുന്നണി മാറ്റാനുള്ള നീക്കങ്ങൾ സജീവമായത്. എന്നാൽ, ജോസ് കെ. മാണി ഈ വാർത്തകൾ നിഷേധിച്ച് രംഗത്തെത്തിയിട്ടുണ്ട്. താൻ ഈ മാറ്റത്തെക്കുറിച്ച് അറിഞ്ഞിട്ടില്ലെന്നും, ഇത്തരം വാർത്തകൾ തന്റെ ഭാഗത്ത് നിന്നുള്ളതല്ലെന്നും അദ്ദേഹം പറയുന്നു.

പിളർന്ന് വളരുന്ന പാരമ്പര്യം

1964-ൽ ഇന്ത്യൻ നാഷണൽ കോൺഗ്രസ് വിട്ട് പുറത്തുവന്ന ഒരു കൂട്ടം നേതാക്കളാണ് കേരള കോൺഗ്രസ് രൂപീകരിച്ചത്. കെ.എം. ജോർജ് ആയിരുന്നു ഇതിന് നേതൃത്വം നൽകിയത്. കാർഷിക മേഖലയുടെ ഉന്നമനം ലക്ഷ്യമിട്ട് രൂപീകരിച്ച ഈ പാർട്ടിക്ക് കോട്ടയം, ഇടുക്കി, പത്തനംതിട്ട, എറണാകുളം, കൊല്ലം ജില്ലകളിലും വടക്കൻ ജില്ലകളിലെ മലയോര മേഖലകളിലും നല്ല സ്വാധീനമുണ്ടായിരുന്നു. കാലക്രമേണ, കേരള കോൺഗ്രസ് (ജോസഫ്), കേരള കോൺഗ്രസ് (ബി), കേരള കോൺഗ്രസ് (ജേക്കബ്), ജനാധിപത്യ കേരള കോൺഗ്രസ് എന്നിങ്ങനെ നിരവധി കൈവഴികളായി പാർട്ടി പിളർന്നു. ഈ പിളർപ്പുകൾ പലതും വീണ്ടും ഉപപിളർപ്പുകളിലൂടെ ഈ പാരമ്പര്യം നിലനിർത്തുന്നുണ്ട്.

അന്ന് ശത്രു, ഇന്ന് മിത്രം

നാല് പതിറ്റാണ്ടോളം യു.ഡി.എഫുമായി ചേർന്ന് നിന്നതിന് ശേഷമാണ് 2021 ലെ നിയമസഭാ തിരഞ്ഞെടുപ്പിൽ കേരള കോൺഗ്രസ് (മാണി) ഇടതുപക്ഷത്തേക്ക് മാറിയത്. ഇതിന് പിന്നിലെ യഥാർത്ഥ കാരണം ഇപ്പോഴും വ്യക്തമല്ല. ചില സ്ഥാനമാനങ്ങൾക്ക് വേണ്ടിയായിരുന്നു ഇതെന്നും വിമർശനങ്ങളുണ്ടായിരുന്നു. കെ.എം. മാണിയുടെ ബജറ്റ് അവതരണം തടയാൻ നിയമസഭയിൽ കമ്പ്യൂട്ടറുകൾ തല്ലിത്തകർക്കുകയും പ്രതിഷേധിക്കുകയും ചെയ്ത ഇ.പി. ജയരാജനും വി. ശിവൻകുട്ടിയും തോമസ് ഐസക്കുമെല്ലാമാണ് അന്ന് ജോസ് കെ. മാണിയെയും കൂട്ടരെയും സ്വീകരിച്ചത്. മാണിസാറിന്റെ തട്ടകമായിരുന്ന പാലാ മണ്ഡലത്തിൽ ജോസ് കെ. മാണി പരാജയപ്പെട്ടെങ്കിലും മറ്റ് മണ്ഡലങ്ങളിൽ അദ്ദേഹത്തിന്റെ വിശ്വസ്തർ വിജയിക്കുകയും റോഷി അഗസ്റ്റിന് മന്ത്രിസ്ഥാനം ലഭിക്കുകയും ചെയ്തു.

നിലവിൽ, ജോസ് കെ. മാണിക്ക് പാർട്ടി അധ്യക്ഷൻ എന്ന നിലയിൽ കാര്യമായ ചുമതലകളൊന്നുമില്ലാതെ സുഖമായി കഴിയുമ്പോൾ, മുന്നണി മാറ്റണമെന്ന ആവശ്യം ആരുടെ കുത്തിത്തിരിപ്പാണെന്നാണ് അഭ്യുദയകാംക്ഷികൾ ചോദിക്കുന്നത്. "കേരള കോൺഗ്രസ് ഒരു സുന്ദരിക്കുട്ടിയാണെന്നും കണ്ടാൽ ആരുമൊന്നു നോക്കുമെന്നും" മാണിസാർ മുമ്പ് പറഞ്ഞിട്ടുള്ളത് ഓർമ്മിപ്പിച്ച്, യു.ഡി.എഫിലെ ആരെങ്കിലും കള്ളക്കണ്ണിട്ടു നോക്കുന്നുണ്ടോ എന്ന സംശയവും ഉയരുന്നുണ്ട്. പ്രത്യേകിച്ച് തിരഞ്ഞെടുപ്പ് അടുത്തിരിക്കുമ്പോൾ ഇത് കൂടുതൽ പ്രസക്തമാണ്.
ജ്യോതിഷപരമായ സൂചനകളും ചിലർ പങ്കുവെക്കുന്നുണ്ട്. എൽ.ഡി.എഫിന് നിലവിൽ അത്ര നല്ല സമയമല്ലെന്നും, നിലമ്പൂർ ഉപതിരഞ്ഞെടുപ്പ് വരാനിരിക്കുന്ന തിരഞ്ഞെടുപ്പുകളുടെ സൂചകമാണെന്നും വിലയിരുത്തലുകളുണ്ട്. ഇത് കേരള കോൺഗ്രസിന് ഒരു സ്ഥാനഭ്രംശം സംഭവിച്ചേക്കുമോ എന്ന സംശയത്തിലേക്ക് ചില ജ്യോതിഷികളെയും നയിക്കുന്നു.

എങ്കിലും, "രാഷ്ട്രീയത്തിൽ സ്ഥിരമായി ആരും ശത്രുക്കളുമല്ല, മിത്രങ്ങളുമല്ല" എന്ന സിദ്ധാന്തം ഇവിടെയും പ്രസക്തമാണ്. യു.ഡി.എഫ് വിട്ട് കേരള കോൺഗ്രസ് ഇടതുപക്ഷത്തേക്ക് എത്തിയതും ഈ സിദ്ധാന്തത്തിന്റെ അടിസ്ഥാനത്തിലാണല്ലോ. ഈ സാഹചര്യത്തിൽ കേരള കോൺഗ്രസ് (എം) ഏത് മുന്നണിയിൽ ചേരുമെന്നത് കാത്തിരുന്ന് കാണേണ്ട ഒന്നാണ്.