തിരുവനന്തപുരം: ആരോഗ്യ മേഖലയെ ശക്തിപ്പെടുത്താൻ ലക്ഷ്യമിട്ട് സംസ്ഥാന ബജറ്റിൽ സുപ്രധാന പ്രഖ്യാപനങ്ങളുമായി മുഖ്യമന്ത്രി വി.ഡി. സതീശൻ. ആരോഗ്യ മേഖലയ്ക്ക് 2074 കോടി രൂപ വകയിരുത്തിയതായി അദ്ദേഹം നിയമസഭയിൽ ബജറ്റ് അവതരണത്തിനിടെ അറിയിച്ചു.
തിരുവനന്തപുരം ജില്ലയിൽ രണ്ടാമത്തെ മെഡിക്കൽ കോളേജ് സ്ഥാപിക്കുമെന്നും മെഡിക്കൽ കോളേജുകളുടെ വികസനത്തിനായി 100 കോടി രൂപ അനുവദിക്കുമെന്നും മുഖ്യമന്ത്രി വ്യക്തമാക്കി. കൂടാതെ, ഹരിപ്പാട്ട് പുതിയ മെഡിക്കൽ കോളേജും ആരംഭിക്കും.
സംസ്ഥാനത്തെ തെരഞ്ഞെടുത്ത മെഡിക്കൽ കോളേജുകൾക്ക് സ്വയംഭരണ പദവി നൽകും. പകർച്ചവ്യാധി പ്രതിരോധ പ്രവർത്തനങ്ങൾ കൂടുതൽ ശക്തിപ്പെടുത്തുന്നതിനൊപ്പം 40 വയസ്സ് കഴിഞ്ഞ എല്ലാ പൗരന്മാർക്കും വർഷത്തിൽ ഒരിക്കൽ ആരോഗ്യ പരിശോധന ഉറപ്പാക്കുന്ന പദ്ധതിയും നടപ്പാക്കും.
കാരുണ്യ സുരക്ഷാ പദ്ധതിയിലെ കുടിശ്ശിക തുക ഘട്ടംഘട്ടമായി തീർക്കുമെന്നും തീരദേശ ജനതയ്ക്കായി കോസ്റ്റൽ കെയർ യൂണിറ്റുകൾ ആരംഭിക്കുമെന്നും ബജറ്റിൽ പ്രഖ്യാപിച്ചു. ക്യാൻസർ പ്രതിരോധത്തിനായി പ്രത്യേക പദ്ധതി നടപ്പാക്കും. കെ.എം.എസ്.സി.എല്ലിന്റെ മരുന്ന് സംഭരണ സംവിധാനം നവീകരിക്കുകയും അപൂർവ മരുന്നുകളുടെ ലഭ്യത ഉറപ്പാക്കുകയും ചെയ്യും. ഉയർന്ന ചികിത്സാ ചെലവ് കുറയ്ക്കുന്നതിനുള്ള നടപടികളും സർക്കാർ സ്വീകരിക്കുമെന്ന് മുഖ്യമന്ത്രി അറിയിച്ചു.
