"കണ്ടകശനി കൊണ്ടേ പോവൂ" എന്ന ചൊല്ല് നിലമ്പൂർ ഉപതിരഞ്ഞെടുപ്പിൽ യു.ഡി.എഫിന് ശരിക്കും അനുഭവിക്കുകയാണ്. കഴിഞ്ഞ മൂന്ന് ഉപതിരഞ്ഞെടുപ്പുകളിലെ വിജയത്തിന് ശേഷം അടുത്ത നിയമസഭാ തിരഞ്ഞെടുപ്പിൽ മുഖ്യമന്ത്രി കസേര സ്വപ്നം കണ്ടിരുന്ന യു.ഡി.എഫിന് നിലമ്പൂരിലെ നാലാമത്തെ ഉപതിരഞ്ഞെടുപ്പ് കടുത്ത വെല്ലുവിളിയായി മാറിയിരിക്കുകയാണ്.
എൽ.ഡി.എഫിനോട് തോറ്റ പി.വി. അൻവർ യു.ഡി.എഫ് പാളയത്തിൽ എത്തുമെന്ന പ്രതീക്ഷയിൽ അവർക്ക് വലിയ ആത്മവിശ്വാസമുണ്ടായിരുന്നു. പിണറായി സർക്കാരിനെതിരെ നിരന്തരം ശബ്ദമുയർത്തുന്ന അൻവറിന്റെ പിന്തുണയോടെ വൻ ഭൂരിപക്ഷം നേടാമെന്ന് വി.ഡി. സതീശൻ, സണ്ണി ജോസഫ്, പി.കെ. കുഞ്ഞാലിക്കുട്ടി എന്നിവർ കണക്കുകൂട്ടി. എന്നാൽ, അൻവർ താൻ നിർദ്ദേശിച്ച വി.എസ്. ജോയിയെ സ്ഥാനാർത്ഥിയാക്കണമെന്ന് ആവശ്യപ്പെട്ടതോടെ കാര്യങ്ങൾ മാറിമറിഞ്ഞു. ആര്യാടൻ ഷൗക്കത്തിനോടുള്ള താൽപര്യക്കുറവായിരുന്നു ഈ നീക്കത്തിന് പിന്നിൽ.
അൻവറിന്റെ ഈ നിലപാടിനോട് വഴങ്ങേണ്ടെന്ന് വി.ഡി. സതീശന്റെ നേതൃത്വത്തിൽ യു.ഡി.എഫ് തീരുമാനിച്ചു. കെ.പി.സി.സി.യുടെ പുതിയ ഭാരവാഹികളും അധ്യക്ഷനും ഈ തീരുമാനത്തിന് പിന്തുണ നൽകി. എന്നാൽ, കെ. സുധാകരൻ, രമേശ് ചെന്നിത്തല, കുഞ്ഞാലിക്കുട്ടി എന്നിവർ അൻവറിനെ പിണക്കിയാൽ തിരഞ്ഞെടുപ്പ് തോൽക്കുമെന്നും പിണറായി വീണ്ടും മുഖ്യമന്ത്രിയാകുമെന്നും ആശങ്കപ്പെട്ടു. എന്നാൽ സതീശൻ സംഘം വഴങ്ങിയില്ല. അൻവറും അവസാനം സ്വന്തം നിലയ്ക്ക് കളത്തിലിറങ്ങാൻ തീരുമാനിച്ചു. മുഖ്യമന്ത്രിയെ തുടർച്ചയായി വിമർശിച്ച് അൻവർ ശക്തമായ നീക്കങ്ങൾ നടത്തിയപ്പോൾ, നിലമ്പൂരിലെ രാഷ്ട്രീയ കാറ്റ് യു.ഡി.എഫിന് അനുകൂലമാകുമെന്ന് ചിലർ പ്രതീക്ഷിച്ചു.
പക്ഷേ, കാര്യങ്ങൾ അവിടംകൊണ്ടൊന്നും തീർന്നില്ല. രാഹുൽ ഗാന്ധിയുടെ അടുത്ത വിശ്വസ്തനും എ.ഐ.സി.സി. ജനറൽ സെക്രട്ടറിയുമായ കെ.സി. വേണുഗോപാലിന്റെ നാക്കുപിഴ യു.ഡി.എഫിന് വലിയ തിരിച്ചടിയായി. സാമൂഹ്യ സുരക്ഷാ പെൻഷൻ നൽകി ജനങ്ങളെ വശീകരിക്കാനാണ് ഇടതുപക്ഷം ശ്രമിക്കുന്നതെന്ന് പറയാൻ ശ്രമിച്ചപ്പോൾ, അദ്ദേഹം "പെൻഷൻ" എന്ന വാക്കിന് പകരം "കൈക്കൂലി" എന്ന് പറഞ്ഞുപോയി. പി.വി. അൻവർ പിണറായിയെ ആക്രമിക്കുന്നത് ശക്തമാക്കിയപ്പോൾ, സി.പി.എമ്മും എൽ.ഡി.എഫും ഈ "കൈക്കൂലി" പരാമർശം യു.ഡി.എഫിനെതിരെ ശക്തമായ ആയുധമാക്കി. മുഖ്യമന്ത്രിയുടെ മലപ്പുറം പരാമർശം തങ്ങൾക്ക് അനുകൂലമാക്കാൻ അൻവർ ശ്രമിച്ചെങ്കിലും, കെ.സിയുടെ നാക്കുപിഴ എല്ലാ കണക്കുകൂട്ടലുകളും തെറ്റിച്ചു.
ഇതോടെ നിലമ്പൂരിലെ മത്സരം കൂടുതൽ ആവേശകരമായി. അൻവറിനോട് വിട്ടുവീഴ്ചയില്ലാത്ത നിലപാടെടുത്ത വി.ഡി. സതീശനെതിരെ ചോദ്യങ്ങൾ ഉയർത്താൻ കാത്തിരുന്ന യു.ഡി.എഫ്, പ്രത്യേകിച്ച് ലീഗ്, കെ.സിയുടെ നാക്കുപിഴയോടെ കയ്ച്ചിട്ട് ഇറക്കാനും മധുരിച്ചിട്ട് തുപ്പാനും വയ്യാത്ത അവസ്ഥയിലായി. സതീശനാകട്ടെ ഇത് ഒരു ആശ്വാസവുമായി.
വി.ഡി. സതീശന്റെ കടുത്ത നിലപാടോ, അൻവറിന്റെ പിണറായിക്കെതിരായ വിമർശനമോ, അതോ ഇടതുപക്ഷത്തിന്റെ "കൈക്കൂലി" ആരോപണമോ – ഏതാണ് വോട്ടർമാരുടെ മനസ്സിൽ സ്വാധീനം ചെലുത്തുക എന്നതാണ് ഇനി കണ്ടറിയേണ്ടത്. ശേഷിക്കുന്ന ദിവസങ്ങളിൽ എല്ലാവരും കളം കൊഴുപ്പിക്കാൻ ശ്രമിക്കുകയാണ്. ഈ സാഹചര്യത്തിൽ ബി.ജെ.പിയുടെ നിലപാട് എന്തായിരിക്കുമെന്നതും രാഷ്ട്രീയ നിരീക്ഷകർ ഉറ്റുനോക്കുന്നു. സ്വന്തം നിലയ്ക്ക് ശക്തി തെളിയിക്കുമോ അതോ ആരെങ്കിലും സഹായിക്കുമോ?
ഏതായാലും, അപ്രതീക്ഷിതമായി പൊട്ടിപ്പുറപ്പെട്ട നാക്കുപിഴകളാണ് നിലമ്പൂരിലെ മത്സരത്തിന് ഇത്രയധികം ആവേശം നൽകുന്നത്. ഈ തിരഞ്ഞെടുപ്പിൽ ആര് ജയിച്ചാലും, താൻ തോൽപ്പിച്ചത് സ്വന്തം മിടുക്കുകൊണ്ടാണെന്ന് പറയാൻ അൻവറിന് ഒരു ക്രെഡിറ്റുണ്ടാകും. അൻവർ ആഗ്രഹിക്കുന്നതും അതാണ്.
നിലമ്പൂരിലെ ഈ തിരഞ്ഞെടുപ്പ് ഫലം വരാനിരിക്കുന്ന തദ്ദേശ സ്വയംഭരണ സ്ഥാപനങ്ങളിലേക്കും നിയമസഭയിലേക്കുമുള്ള തിരഞ്ഞെടുപ്പുകൾക്ക് ഒരു ചൂണ്ടുപലക ആകുമോ?
