​തിരുവനന്തപുരം: കോൺഗ്രസ് പുനഃസംഘടനയും മന്ത്രിസഭാ പ്രവേശന ചർച്ചകളും സജീവമായിരിക്കെ, കെ.പി.സി.സി ഓഫീസിന് മുൻപിൽ നടന്ന അനാവശ്യ ശക്തിപ്രകടനങ്ങളും ഗ്രൂപ്പ് കളികളും തലസ്ഥാനത്തെ മൂന്ന് പ്രമുഖ സാമുദായിക ജനപ്രതിനിധികൾക്ക് കനത്ത തിരിച്ചടിയാകുന്നു. വ്യത്യസ്ത സാമുദായിക സംഘടനകളെ പ്രതിനിധീകരിക്കുന്ന ഈ മൂന്ന് എം.എൽ.എമാരുടെ മന്ത്രിസഭാ പ്രവേശന സാധ്യതകൾക്ക് മങ്ങലേറ്റതിന് പിന്നിൽ എ.ഐ.സി.സി ജനറൽ സെക്രട്ടറി കെ.സി. വേണുഗോപാലിനെ ലക്ഷ്യമിട്ട് കെ.പി.സി.സി ഓഫീസിന് മുൻപിൽ നടന്ന ഫ്ലെക്സ് കീറലും വി.ഡി. സതീശൻ അനുകൂല പ്രകടനങ്ങളുമാണെന്ന ചർച്ചകളാണ് ഇപ്പോൾ രാഷ്ട്രീയ വൃത്തങ്ങളിൽ സജീവമാകുന്നത്.
​ഉമ്മൻ ചാണ്ടിയുടെയും രമേശ് ചെന്നിത്തലയുടെയും കാലം മുതൽ പാർട്ടിയിലെ സമ്മർദ്ദ തന്ത്രങ്ങളിലൂടെയും സാമുദായിക കാർഡുകളിലൂടെയും നേട്ടങ്ങൾ കൊയ്ത ‘വിദഗ്ധ’ രാഷ്ട്രീയ ശൈലിക്കേറ്റ കനത്ത പ്രഹരമായാണ് ഈ നീക്കത്തെ രാഷ്ട്രീയ നിരീക്ഷകർ വിലയിരുത്തുന്നത്.
​സമ്മർദ്ദ രാഷ്ട്രീയവും ഡി.ഐ.സി പശ്ചാത്തലവും
​ഇതിൽ ഒരു സാമുദായിക നേതാവിന് മുൻപ് കെ.പി.സി.സി ഓഫീസിന് മുൻപിൽ സ്വന്തം സാമുദായിക സംഘടനയെ മുൻനിർത്തി പ്രകടനം നടത്തിച്ച് പാർട്ടിക്ക് വലിയ കളങ്കമുണ്ടാക്കുകയും, ഒടുവിൽ സമ്മർദ്ദങ്ങൾക്ക് വഴങ്ങി ഡെപ്യൂട്ടി സ്പീക്കർ പദവി കൈക്കലാക്കുകയും ചെയ്ത ചരിത്രമാണുള്ളത്. ഉമ്മൻ ചാണ്ടിയെയും രമേശ് ചെന്നിത്തലയെയും ഒരേസമയം കബളിപ്പിച്ച് ഇരുപക്ഷത്തുനിന്നും ആനുകൂല്യങ്ങൾ പറ്റിയിരുന്ന ഇദ്ദേഹം മുൻപ് കെ. കരുണാകരൻ ഡി.ഐ.സി (ഡി) രൂപീകരിച്ചപ്പോൾ അതിനെ അനുകൂലിക്കുകയും കോൺഗ്രസ് ഗവൺമെന്റിൽ ഇരുന്നുകൊണ്ട് തന്നെ ഡി.ഐ.സിയിലെ സ്വന്തം ആളുകൾക്ക് പദവികൾ വാങ്ങിക്കൊടുക്കാൻ തന്ത്രങ്ങൾ മെനയുകയും ചെയ്ത നേതാവാണ്.
​വോയിസ് ക്ലിപ്പ് ഭീഷണിയും ഇരട്ടത്താപ്പും
​കഴിഞ്ഞ നിയമസഭാ തെരഞ്ഞെടുപ്പിൽ ഡി.സി.സി പ്രസിഡന്റിനെ വരെ വോയിസ് ക്ലിപ്പുകൾ പുറത്തുവിടുമെന്ന് ഭീഷണിപ്പെടുത്തിയാണ് ഈ സാമുദായിക നേതാവ് സീറ്റ് വാങ്ങിയെടുത്തതെന്ന ആരോപണങ്ങൾ നിലനിൽക്കുന്നുണ്ട്. എന്നാൽ ജയിച്ചതിന് പിന്നാലെ പാർട്ടിയിലെ രണ്ട് കരുത്തരായ നേതാക്കളായ വി.ഡി. സതീശനെയും കെ.സി. വേണുഗോപാലിനെയും ഒരേസമയം കയ്യിലെടുക്കാനായിരുന്നു അടുത്ത ശ്രമം. വി.ഡി. സതീശൻ മുഖ്യമന്ത്രിയാകുമെന്ന് കാട്ടി ആദ്യം ഫേസ്ബുക്ക് പോസ്റ്റിടുകയും, തുടർന്ന് കെ.സി. വേണുഗോപാൽ പക്ഷത്തിന്റെ നീരസം ഭയന്ന് മണിക്കൂറുകൾക്കകം കെ.സിക്ക് അനുകൂലമായി പോസ്റ്റ് തിരുത്തുകയും ചെയ്തു. ഒരേ രാത്രിയിൽ ഇരുവർക്കുമിടയിൽ ഒത്തുതീർപ്പുകൾക്ക് ശ്രമിച്ച ഈ നേതാവിന്റെ കള്ളക്കളി കെ.സി. വേണുഗോപാൽ കൃത്യമായി തിരിച്ചറിയുകയായിരുന്നു.
​കെ.സി വിരുദ്ധ സൈബർ യുദ്ധവും കെ.പി.സി.സി ഓഫീസിന് മുന്നിലെ പ്രകടനവും
​കെ.സി. വേണുഗോപാലിനെ സൈബർ ഇടങ്ങളിൽ മോശക്കാരനാക്കാൻ ബോധപൂർവ്വമായ ശ്രമങ്ങൾ നടക്കുന്നതിനിടയിലാണ് കെ.പി.സി.സി ഓഫീസിന് മുൻപിൽ വി.ഡി. സതീശന് അനുകൂലമായി ഒരു വിഭാഗം ശക്തിപ്രകടനം നടത്തിയത്. തിരുവനന്തപുരത്തെ മൂന്ന് പ്രമുഖ സാമുദായിക എം.എൽ.എമാർ വി.ഡി. സതീശനുമായി പരസ്യമായ ബന്ധത്തിലാണ് പോകുന്നത്. സതീശന്റെ പരിപാടി വിജയിപ്പിക്കുന്നതിനായി തലസ്ഥാനത്തെ പ്രമുഖ നിയോജക മണ്ഡലങ്ങളിൽ നിന്നും, ഈ നേതാക്കളുടെ സ്വാധീന മേഖലകളായ കമ്മ്യൂണിറ്റി കേന്ദ്രങ്ങളിൽ നിന്നും തീരദേശ-കോസ്റ്റൽ ബെൽറ്റുകളിൽ നിന്നുമുള്ള അനുയായികളെ ഇവർ കെ.പി.സി.സി ഓഫീസിന് മുന്നിലേക്ക് വിട്ടുകൊടുത്തു.
​ഫ്ലെക്സ് കീറലും തിരിച്ചടിയായ വീഡിയോ തെളിവുകളും
​ഈ പ്രകടനത്തിനിടയിലാണ് കെ.സി. വേണുഗോപാലിന്റെ ഫ്ലെക്സുകൾ വ്യാപകമായി വലിച്ച് കീറപ്പെടുകയും കെ.പി.സി.സി ഓഫീസിനു മുന്നിൽ വലിയ തോതിൽ അക്രമസംഭവങ്ങൾ അരങ്ങേറുകയും ചെയ്തത്.
​നിർണായക വഴിത്തിരിവ്: ഈ അക്രമങ്ങൾക്ക് നേതൃത്വം നൽകിയതും പങ്കെടുത്തതും ഈ മൂന്ന് സാമുദായിക ജനപ്രതിനിധികൾ അയച്ച ആളുകളാണെന്ന് വ്യക്തമാക്കുന്ന വീഡിയോ ദൃശ്യങ്ങൾ കെ.സി. വേണുഗോപാൽ കൃത്യമായി ശേഖരിച്ച് പഠിക്കുകയുണ്ടായി. ആരൊക്കെയാണ് തനിക്കെതിരെയുള്ള നീക്കങ്ങൾക്ക് പിന്നിലെന്ന് ബോധ്യപ്പെട്ടതോടെ കെ.സി. വേണുഗോപാൽ കർശന നിലപാടിലേക്ക് നീങ്ങുകയായിരുന്നു.
​ഗ്രൂപ്പ് താല്പര്യങ്ങൾക്കായി പാർട്ടിയുടെ അച്ചടക്കം ലംഘിച്ച് ഹൈക്കമാൻഡ് പ്രതിനിധിക്കെതിരെ പരസ്യമായ തെരുവ് യുദ്ധത്തിന് ആളെക്കൂട്ടിയ ഈ മൂന്ന് സാമുദായിക നേതാക്കളുടെയും മന്ത്രിസഭാ പ്രവേശനത്തിന് ഈ ‘ഫ്ലെക്സ് വിവാദം’ ഒരു വില്ലനായി മാറുകയായിരുന്നു. ഗ്രൂപ്പ് മാനേജർമാരെ പ്രീതിപ്പെടുത്തി പദവികൾ നേടാമെന്ന ഇവരുടെ തന്ത്രങ്ങൾക്ക് കെ.സി. വേണുഗോപാലിന്റെ ശക്തമായ ഇടപെടലോടെ തടസ്സം വീണിരിക്കുകയാണ്.