ബെംഗളൂരു: അഴിമതി ആരോപണങ്ങൾ കനത്തതോടെ കർണാടക മന്ത്രി ബി. നാഗേന്ദ്ര രാജിവെച്ചു. രാജി പ്രഖ്യാപിക്കുന്നതിനിടെ മാധ്യമങ്ങൾക്ക് മുന്നിൽ വികാരാധീനനായ നാഗേന്ദ്ര പൊട്ടിക്കരഞ്ഞു. താൻ ദളിതനായതിനാലാണ് രാഷ്ട്രീയമായി ലക്ഷ്യമിടുന്നതെന്ന് അദ്ദേഹം ആരോപിച്ചു.
കർണാടക മഹർഷി വാൽമീകി ഷെഡ്യൂൾഡ് ട്രൈബ്സ് ഡെവലപ്മെന്റ് കോർപ്പറേഷനുമായി ബന്ധപ്പെട്ട 89 കോടി രൂപയുടെ സാമ്പത്തിക ക്രമക്കേടാണ് നാഗേന്ദ്രയ്ക്കെതിരെ ഉയർന്ന പ്രധാന ആരോപണം. അഴിമതിയിൽ മന്ത്രിക്ക് പങ്കുണ്ടെന്ന് ആരോപിച്ച് ബിജെപിയും ജെഡിഎസും സർക്കാരിനെതിരെ ശക്തമായ പ്രതിഷേധം നടത്തിയിരുന്നു.
മുഖ്യമന്ത്രി ഡി.കെ. ശിവകുമാറുമായി കൂടിക്കാഴ്ച നടത്തിയതിന് പിന്നാലെയാണ് നാഗേന്ദ്ര രാജി പ്രഖ്യാപിച്ചത്. ‘ഞാൻ സ്വമേധയാ മന്ത്രിസ്ഥാനം രാജിവെക്കുന്നു’ എന്ന് വ്യക്തമാക്കിയ അദ്ദേഹം, തനിക്കെതിരായ ആരോപണങ്ങളുടെ പശ്ചാത്തലത്തിലാണ് തീരുമാനമെന്നും പറഞ്ഞു.
മന്ത്രിയായി വീണ്ടും സത്യപ്രതിജ്ഞ ചെയ്ത് 25 ദിവസം പിന്നിടുന്നതിനിടെയാണ് നാഗേന്ദ്രയുടെ രാജി. ഇതേ വിഷയവുമായി ബന്ധപ്പെട്ട് രണ്ട് വർഷം മുമ്പും അദ്ദേഹം മന്ത്രിസ്ഥാനം ഒഴിഞ്ഞിരുന്നു.
നാഗേന്ദ്രയെ വീണ്ടും മന്ത്രിസഭയിൽ ഉൾപ്പെടുത്തിയതിനെതിരെ പ്രതിപക്ഷമായ ബിജെപിയും ജെഡിഎസും നേരത്തെ തന്നെ രംഗത്തെത്തിയിരുന്നു. വാൽമീകി കോർപ്പറേഷനിലെ ഫണ്ട് ക്രമക്കേടിൽ നാഗേന്ദ്രയുടെ പങ്ക് അന്വേഷിക്കണമെന്നാവശ്യപ്പെട്ടായിരുന്നു പ്രതിപക്ഷ പ്രതിഷേധം.
