തിരുവനന്തപുരം: കരമനയിലെ കൂടത്തിൽ കുടുംബത്തിലെ ഏഴുപേരുടെ ദുരൂഹമരണങ്ങളുമായി ബന്ധപ്പെട്ട കേസിൽ നിർണായക നീക്കവുമായി ക്രൈംബ്രാഞ്ച്. കുടുംബത്തിലെ അവസാന അംഗമായിരുന്ന ജയമാധവൻ നായരുടെ മരണവുമായി ബന്ധപ്പെട്ട് അന്നത്തെ കാര്യസ്ഥനും കോടതി ജീവനക്കാരനുമായ രവീന്ദ്രൻ നായരെ അറസ്റ്റ് ചെയ്തു. സ്വത്ത് കൈക്കലാക്കുന്നതിനായി ജയമാധവനെ കൊലപ്പെടുത്തിയെന്നാണ് അന്വേഷണസംഘത്തിന്റെ കണ്ടെത്തൽ. 

2017 ഏപ്രിൽ രണ്ടിനാണ് ജയമാധവൻ നായർ മരിച്ചത്. അസ്വാഭാവിക മരണത്തിന് അന്ന് കരമന പൊലീസ് കേസെടുത്തിരുന്നെങ്കിലും കാര്യമായ അന്വേഷണം നടന്നില്ലെന്ന ആരോപണം ഉയർന്നിരുന്നു. പിന്നീട് നടത്തിയ അന്വേഷണത്തിൽ ജയമാധവന്റേത് കൊലപാതകമാണെന്ന് 2021-ൽ ലഭിച്ച ഫൊറൻസിക് റിപ്പോർട്ടിൽ സ്ഥിരീകരിച്ചതോടെയാണ് കേസ് പുതിയ വഴിത്തിരിവിലെത്തിയത്. ജില്ലാ ക്രൈംബ്രാഞ്ച് കൊലക്കുറ്റം ചുമത്തി അന്വേഷണം ശക്തമാക്കിയതിനു പിന്നാലെയാണ് അറസ്റ്റ്. ബ്രെയിൻ മാപ്പിങ് ഉൾപ്പെടെയുള്ള ഫൊറൻസിക് പരിശോധനകളും അന്വേഷണത്തിന്റെ ഭാഗമായി നടത്തിയിരുന്നു.

ജയമാധവൻ നായരുടെ സ്വത്തുക്കൾ രവീന്ദ്രൻ നായർക്ക് ലഭിക്കുന്ന രീതിയിൽ വിൽപത്രം തയാറാക്കിയിരുന്നുവെന്നാണ് അന്വേഷണസംഘം പറയുന്നത്. എന്നാൽ, പിന്നീട് ജയമാധവൻ വിവാഹം കഴിക്കാൻ തീരുമാനിച്ചതോടെ വിൽപത്രം റദ്ദാക്കപ്പെടുമെന്ന ആശങ്കയിൽ ഇയാളെ കൊലപ്പെടുത്താൻ രവീന്ദ്രൻ നായർ തീരുമാനിച്ചെന്നാണ് ക്രൈംബ്രാഞ്ചിന്റെ നിഗമനം. കേസിൽ സ്വത്ത് തട്ടിയെടുക്കാനുള്ള നീക്കമാണ് കൊലപാതകത്തിലേക്ക് നയിച്ചതെന്നാണ് അന്വേഷണസംഘം സംശയിക്കുന്നത്.

ഏഴുപേരുടെ ദുരൂഹമരണം; സംശയനിഴലിൽ കോടികളുടെ സ്വത്ത്

കൂടത്തിൽ തറവാട്ടിൽ ഗോപിനാഥൻ നായർ, ഭാര്യ സുമുഖിയമ്മ, മക്കളായ ജയശ്രീ, ജയബാലകൃഷ്ണൻ, ജയപ്രകാശ് എന്നിവരും ഗോപിനാഥൻ നായരുടെ ജ്യേഷ്ഠന്മാരായ നാരായണപിള്ളയുടെയും വേലുപിള്ളയുടെയും മക്കളായ ജയമാധവൻ, ഉണ്ണികൃഷ്ണൻ നായർ എന്നിവരുമാണ് വ്യത്യസ്ത കാലയളവുകളിലായി ദുരൂഹ സാഹചര്യത്തിൽ മരിച്ചത്. തിരുവനന്തപുരത്ത് കോടിക്കണക്കിന് രൂപ വിലമതിക്കുന്ന കെട്ടിടങ്ങളും ഭൂസ്വത്തുക്കളും കുടുംബത്തിനുണ്ടായിരുന്നു.

ജയമാധവന്റെ മരണശേഷം ഏകദേശം 100 കോടി രൂപ വിലമതിക്കുന്ന സ്വത്തുക്കൾ കാര്യസ്ഥനായ രവീന്ദ്രൻ നായരും ചില അകന്ന ബന്ധുക്കളും കൈവശപ്പെടുത്തിയെന്ന ആരോപണമാണ് കേസിൽ നിർണായകമായത്. പൊതുപ്രവർത്തകനായ അനിൽകുമാറും വേലുപിള്ളയുടെ മകന്റെ ഭാര്യ പ്രസന്നകുമാരിയും നൽകിയ പരാതികളുടെ അടിസ്ഥാനത്തിലാണ് അന്വേഷണം ജില്ലാ ക്രൈംബ്രാഞ്ചിന് കൈമാറിയത്. കുടുംബാംഗങ്ങളുടെ മരണങ്ങളിൽ കാര്യസ്ഥനടക്കമുള്ളവർക്ക് പങ്കുണ്ടോയെന്നതായിരുന്നു അന്വേഷണസംഘം പ്രധാനമായും പരിശോധിച്ചത്.

അപകടമരണമെന്ന മൊഴിയിൽ വൈരുധ്യങ്ങൾ

2017 ഏപ്രിൽ രണ്ടിന് കൂടത്തിൽ തറവാട്ടിലെത്തിയപ്പോൾ ജയമാധവൻ നായർ കട്ടിലിൽനിന്ന് വീണുകിടക്കുന്നതായി കണ്ടെന്നും തുടർന്ന് ഓട്ടോറിക്ഷയിൽ മെഡിക്കൽ കോളജ് ആശുപത്രിയിലെത്തിച്ചെന്നുമായിരുന്നു രവീന്ദ്രൻ നായരുടെ മൊഴി. വീട്ടുജോലിക്കാരിയായ ലീലയും ഒപ്പമുണ്ടായിരുന്നുവെന്നാണ് ഇയാൾ പറഞ്ഞത്. എന്നാൽ, സംഭവവുമായി ബന്ധപ്പെട്ട് വിവിധ സാക്ഷികൾ നൽകിയ മൊഴികളിൽ വൈരുധ്യങ്ങളുണ്ടെന്ന് അന്വേഷണസംഘം കണ്ടെത്തി.

മരിച്ച വിവരം അറിഞ്ഞശേഷം ലീലയും രവീന്ദ്രൻ നായരും കരമന പൊലീസ് സ്റ്റേഷനിലെത്തിയെന്നായിരുന്നു കാര്യസ്ഥന്റെ വിശദീകരണം. എന്നാൽ, പൊലീസ് സ്റ്റേഷനിൽ പോയിട്ടില്ലെന്നും മൃതദേഹം പോസ്റ്റ്‌മോർട്ടം ചെയ്യേണ്ടതിനാൽ ഓട്ടോ വിളിച്ച് വീട്ടിലേക്ക് മടങ്ങാൻ രവീന്ദ്രൻ നായർ തന്നോട് ആവശ്യപ്പെട്ടെന്നുമാണ് ലീല മൊഴി നൽകിയത്. ഈ വൈരുധ്യങ്ങൾ അന്വേഷണസംഘം വിശദമായി പരിശോധിച്ചു.

ജയമാധവനെ ആശുപത്രിയിലെത്തിച്ചെന്ന ആദ്യ മൊഴി ഓട്ടോഡ്രൈവർ സുമേഷ് പിന്നീട് തിരുത്തിയതും കേസിൽ നിർണായകമായി. ആശുപത്രിയിൽ പോയിട്ടില്ലെന്നും അഞ്ച് ലക്ഷം രൂപ വാഗ്ദാനം ചെയ്തതിനെത്തുടർന്നാണ് ആദ്യം കള്ളമൊഴി നൽകിയതെന്നുമാണ് ഇയാൾ പിന്നീട് പൊലീസിനോട് വെളിപ്പെടുത്തിയത്. ഇതോടെ ജയമാധവന്റെ മരണദിവസം നടന്ന സംഭവങ്ങളിൽ കൂടുതൽ സംശയങ്ങളുയർന്നു.

തലയ്ക്കേറ്റ പരുക്ക് മരണകാരണം

ജയമാധവന്റെ മരണത്തിൽ തലയ്ക്കേറ്റ ഗുരുതര പരുക്കാണ് മരണകാരണമെന്നായിരുന്നു പോസ്റ്റ്‌മോർട്ടം, ആന്തരാവയവ പരിശോധനാ റിപ്പോർട്ടുകളിലെ കണ്ടെത്തൽ. കട്ടിലിൽനിന്ന് നിലത്തുവീണതുകൊണ്ട് മാത്രം ഇത്തരം പരുക്കുകൾ സംഭവിച്ചതല്ലെന്ന സൂചനകളും പരിശോധനയിൽ ലഭിച്ചതായി റിപ്പോർട്ടുകളുണ്ടായിരുന്നു. മുഖത്ത് രക്തം കട്ടപിടിച്ച നിലയിലുമായിരുന്നു. വീടിന്റെ പിൻവശത്തുനിന്ന് രക്തക്കറ പുരണ്ട തടിക്കഷണം കണ്ടെത്തിയതും അന്വേഷണത്തിൽ പ്രധാന തെളിവായി.

മരണവുമായി ബന്ധപ്പെട്ട സാഹചര്യങ്ങൾ വ്യക്തമാക്കുന്നതിനും പരുക്കുകളുടെ സ്വഭാവം പരിശോധിക്കുന്നതിനുമാണ് ഫൊറൻസിക് പരിശോധനകൾ നടത്തിയത്. ഇതിന്റെ അടിസ്ഥാനത്തിൽ ജയമാധവന്റെ മരണം കൊലപാതകമാണെന്ന നിഗമനത്തിലേക്ക് അന്വേഷണസംഘം എത്തുകയായിരുന്നു.

കുടുംബത്തിലെ മറ്റൊരു അംഗമായ ജയപ്രകാശ് രക്തം ഛർദ്ദിച്ചാണ് മരിച്ചതെന്ന വിവരവും കേസിൽ സംശയങ്ങൾക്ക് ഇടയാക്കിയിരുന്നു. എന്നാൽ, ജയപ്രകാശിന്റെ മൃതദേഹം പോസ്റ്റ്‌മോർട്ടം ചെയ്തിരുന്നില്ല.

വിൽപത്രവും സ്വത്തുതട്ടിപ്പു പരാതിയും

ജയമാധവനെ കബളിപ്പിച്ച് 33 സെന്റ് സ്ഥലവും വീടും രവീന്ദ്രൻ നായർ സ്വന്തമാക്കിയെന്ന പരാതിയിലും പൊലീസ് കേസെടുത്തിരുന്നു. വിൽപത്രപ്രകാരം ഉമാമന്ദിരത്തിന്റെ ഉടമസ്ഥാവകാശം ലഭിച്ചത് രവീന്ദ്രൻ നായർക്കായിരുന്നു. 2016 ഫെബ്രുവരി 15-ന് തയാറാക്കിയ വിൽപത്രം വ്യാജമാണെന്ന് ആരോപിച്ച് പ്രസന്നകുമാരി പരാതി നൽകിയിരുന്നു.

കുടുംബത്തിലെ മരണങ്ങൾ, സ്വത്തുക്കളുടെ കൈമാറ്റം, വിൽപത്രത്തിന്റെ ആധികാരികത, ജയമാധവന്റെ മരണദിവസത്തെ സംഭവങ്ങൾ എന്നിവയെല്ലാം അന്വേഷണപരിധിയിലുണ്ടായിരുന്നു. ദീർഘകാലമായി കെട്ടിക്കിടന്ന കേസുകൾ വീണ്ടും പരിശോധിക്കുന്നതിന്റെ ഭാഗമായാണ് അന്വേഷണം ഊർജിതമാക്കിയതും ഇപ്പോൾ അറസ്റ്റ് രേഖപ്പെടുത്തിയതും.