പത്തനാപുരത്ത് കേരള കോൺഗ്രസ് (ബി) പ്രവർത്തകനായ സഞ്ജു പി. സ്വാമിയെ യൂത്ത് കോൺഗ്രസ് പ്രവർത്തകർ ക്രൂരമായി മർദ്ദിച്ച സംഭവത്തിൽ ജ്യോതികുമാർ ചാമക്കാല എം.എൽ.എയ്ക്കും പ്രതികൾക്കുമെതിരെ കെ.ബി. ഗണേഷ് കുമാർ രംഗത്തെത്തി. മർദനമേറ്റ മുൻ പേഴ്സണൽ സ്റ്റാഫ് അംഗത്തെ ആക്രമിച്ച ഗുണ്ടകളെ പത്തനാപുരം എം.എൽ.എ സംരക്ഷിക്കുകയാണെന്ന് ഗണേഷ് കുമാർ ഫേസ്ബുക്ക് പോസ്റ്റിലൂടെ ആരോപിച്ചു. അധികാരത്തിന്റെ അഹങ്കാരത്തിൽ ഭീകരാന്തരീക്ഷം സൃഷ്ടിക്കാനാണ് കോൺഗ്രസ് നീക്കമെന്നും, കുറ്റവാളികളെ ഉടൻ അറസ്റ്റ് ചെയ്തില്ലെങ്കിൽ ശക്തമായ ജനകീയ പ്രതിഷേധങ്ങളുമായി മുന്നോട്ടുപോകുമെന്നും അദ്ദേഹം മുന്നറിയിപ്പ് നൽകി. ഇന്നലെ രാത്രിയോടെയാണ് സഞ്ജു പി. സ്വാമിക്ക് നേരെ ആക്രമണമുണ്ടായതെന്നും, ഇതിനു പിന്നാലെ കേരള കോൺഗ്രസ് (ബി) പ്രവർത്തകർ എം.എൽ.എ ഓഫീസിന് മുന്നിൽ തടിച്ചുകൂടി വലിയ പ്രതിഷേധം ഉയർത്തിയതായും വാർത്തയിൽ വ്യക്തമാക്കുന്നു. തുടർന്ന് കോൺഗ്രസ് - കേരള കോൺഗ്രസ് പ്രവർത്തകർ തമ്മിൽ ഉടലെടുത്ത കടുത്ത സംഘർഷാവസ്ഥ പൊലീസ് ഇടപെട്ടാണ് ശാന്തമാക്കിയത്. പത്തനാപുരത്ത് ഗുണ്ടാവിളയാട്ടം അനുവദിക്കില്ലെന്നും ആക്രമണങ്ങളെ ശക്തമായി എതിർക്കുമെന്നും ഗണേഷ് കുമാർ വ്യക്തമാക്കിയിട്ടുണ്ട്.
Photo Courtesy - Google
