കെ-റെയിൽ പദ്ധതിയെ കുറിച്ചുള്ള പ്രതീക്ഷകൾ നിലച്ചു വരുന്നതായി മുഖ്യമന്ത്രി പിണറായി വിജയൻ. എന്നാൽ അതുവഴി പദ്ധതി ഉപേക്ഷിക്കുകയാണെന്നു കരുതേണ്ടതില്ലെന്നും കണ്ണൂർ പ്രസ്സ് ക്ലബ് സംഘടിപ്പിച്ച ‘മീറ്റ് ദ പ്രസ്’ പരിപാടിയിൽ സംസാരിക്കവെ മുഖ്യമന്ത്രി പറഞ്ഞു. ഇനി മുന്നോട്ട് പോകാൻ മറ്റുപാതകൾ കണ്ടെത്തേണ്ടി വരുമെന്നും അദ്ദേഹം കൂട്ടിച്ചേർത്തു. 

രാജ്യത്തിന്റെ വികസനത്തിന് അനുകൂലമായ പദ്ധതിയായിരുന്നു കെ-റെയിൽ, പക്ഷേ റെയിൽപദ്ധതികൾക്കായി കേന്ദ്രത്തിന്റെ അനുമതി നിർബന്ധമാണ്. അനുമതി വേഗത്തിൽ ലഭിക്കുമെന്ന് സംസ്ഥാന സർക്കാർ പ്രതീക്ഷിച്ചിരുന്നുവെങ്കിലും, രാഷ്ട്രീയപരമായ നിലപാടുകൾ കാരണം അത് സാധ്യമാകുന്നില്ലെന്നാണ് മുഖ്യമന്ത്രിയുടെ വിശദീകരണം. പദ്ധതിയെ കുറിച്ച് സംസ്ഥാനത്തിന് തെറ്റിദ്ധാരണയൊന്നുമില്ലായിരുന്നുവെന്നും അദ്ദേഹം കൂട്ടിച്ചേർത്തു.

ശബരിമല സ്വർണക്കവർച്ച കേസിൽ അന്വേഷണം പാടുപെട്ട് മുന്നോട്ട് പോകുകയാണെന്നും, ആദ്യം പറ്റില്ലെന്ന് പറഞ്ഞ യുഡിഎഫും ഇപ്പോൾ അന്വേഷണം ശരിയായി നടക്കുന്നു എന്ന് സമ്മതിക്കുന്നുവെന്നും മുഖ്യമന്ത്രി പറഞ്ഞു. പ്രതികൾക്കെതിരായ നടപടികൾ ആവശ്യമായ ഘട്ടത്തിൽ പാർട്ടി സ്വീകരിക്കുമെന്നും അദ്ദേഹം വ്യക്തമാക്കി.

തിരഞ്ഞെടുപ്പിനെ ആത്മവിശ്വാസത്തോടെ നേരിടുന്നുവെന്ന് മുഖ്യമന്ത്രി പറഞ്ഞു. ജനങ്ങളുടെ പിന്തുണ തികഞ്ഞതാണെന്നും തിരഞ്ഞെടുപ്പിന് ശേഷം എൽഡിഎഫ് കൂടുതൽ ശക്തിയായി തിരിച്ചുവരുമെന്നും അദ്ദേഹം അഭിപ്രായപ്പെട്ടു. അധികാര വികേന്ദ്രീകരണത്തിൽ കേരളം മുന്നിലാണ്; 2016-ലുയുള്ള എൽഡിഎഫ് സർക്കാരിന്റെ കാലത്ത് തദ്ദേശ സ്ഥാപനങ്ങൾക്ക് 52,648 കോടി രൂപയും 2021 ശേഷം 70,526 കോടിയും അനുവദിച്ചു. യുഡിഎഫ് ഭരണകാലത്ത് 29,500 കോടിയായിരുന്നു അനുവദിച്ചത്. എൽഡിഎഫ് പറഞ്ഞതിലധികം ചെയ്യുന്നതാണ് പതിവെന്ന് മുഖ്യമന്ത്രി പറഞ്ഞു.

വിദ്യാഭ്യാസ മേഖലയെക്കുറിച്ചും അദ്ദേഹം വിമർശനങ്ങൾ ഉന്നയിച്ചു. സംസ്ഥാനത്തെ 2,000-ത്തോളം സ്കൂളുകൾക്ക് 5,000 കോടി രൂപ ചെലവിട്ട് നവീകരണം നടന്നു. പിഎം ശ്രീ പദ്ധതി നടപ്പാക്കാൻ കേന്ദ്രത്തിന്റെ പുതിയ വിദ്യാഭ്യാസ നയം അംഗീകരിക്കണമെന്ന നിബന്ധന സ്വീകരിക്കാനാവില്ലെന്നും, ഗാന്ധിവധം, മുഗൾഭരണം തുടങ്ങിയ വിഷയങ്ങൾ പാഠ്യപദ്ധതിയിൽ ഒഴിവാക്കരുതെന്നും അദ്ദേഹം വ്യക്തമാക്കി. പിഎം ശ്രീയിൽ ഒപ്പില്ലാത്തതിനാൽ സർവശിക്ഷാ അഭിയാൻ ഫണ്ട് ലഭിക്കാത്തത് സംസ്ഥാനത്തെ പ്രയാസത്തിലാക്കിയെന്നും അദ്ദേഹം പറഞ്ഞു.

പ്രധാനമന്ത്രി മുണ്ടക്കൈ, ചൂരൽമല ദുരന്തഭൂമി സന്ദർശിച്ചപ്പോൾ സഹായം കിട്ടുമെന്നു നമ്മൾ പ്രതീക്ഷിച്ചു, കിട്ടിയില്ല. എയിംസ് കിട്ടുമെന്ന് പ്രതീക്ഷിച്ചു, കിട്ടിയില്ല. കണ്ണൂർ വിമാനത്തവളം പോയിന്റ് ഓഫ് കോൾ കിട്ടിയില്ല. എന്നു കരുതി കേന്ദ്രവുമായി വീണ്ടും ബന്ധപ്പെടാനില്ല എന്ന് തീരുമാനിക്കാൻ സാധിക്കുമോയെന്നും മുഖ്യമന്ത്രി ചോദിച്ചു.