യുഡിഎഫിനുള്ളിൽ യാതൊരുവിധ പ്രശ്നങ്ങളുമില്ലെന്നും മന്ത്രിസഭ ഒറ്റക്കെട്ടായി ടീം എന്ന നിലയിലാണ് പ്രവർത്തിക്കുന്നതെന്നും ആരോഗ്യമന്ത്രി കെ. മുരളീധരൻ. പ്രധാനപ്പെട്ട എല്ലാ വിഷയങ്ങളും മന്ത്രിസഭയിൽ ചർച്ച ചെയ്യാറുണ്ടെന്നും വകുപ്പ് മന്ത്രിമാരുമായി കൂടിയാലോചിച്ച ശേഷമാണ് മുഖ്യമന്ത്രി തീരുമാനങ്ങൾ കൈക്കൊള്ളുന്നതെന്നും അദ്ദേഹം വ്യക്തമാക്കി.
സ്വന്തം വകുപ്പുമായി ബന്ധപ്പെട്ട കാര്യങ്ങളിൽ ആരോഗ്യമന്ത്രി എന്ന നിലയിൽ മുഖ്യമന്ത്രിയുമായി കൃത്യമായ ചർച്ചകൾ നടത്താറുണ്ടെന്നും മുരളീധരൻ പറഞ്ഞു. നിലവിൽ വൈദ്യുതി ആവശ്യമില്ലെന്നാണ് മുഖ്യമന്ത്രി അറിയിച്ചിട്ടുള്ളത്. എന്നാൽ ഭാവിയിൽ വൈദ്യുതിയുടെ ആവശ്യം വന്നേക്കാമെന്നും അദ്ദേഹം പ്രതികരിച്ചു.
അടൂർ പ്രകാശ് പാർട്ടി അച്ചടക്കം ലംഘിച്ചിട്ടില്ലെന്നും യുഡിഎഫിലെ കാര്യങ്ങൾ ഭംഗിയായി മുന്നോട്ടുപോകുമെന്നും മന്ത്രി കൂട്ടിച്ചേർത്തു. മുന്നണിക്കുള്ളിൽ ആവശ്യമായ ചർച്ചകളും കൂടിയാലോചനകളും നടക്കുന്നുണ്ടെന്നും അദ്ദേഹം പറഞ്ഞു. തിരുവനന്തപുരം മെഡിക്കൽ കോളേജിലെ എൻഡോക്രൈനോളജി വിഭാഗം മേധാവിയുടെ യോഗ്യതയുമായി ബന്ധപ്പെട്ട വിവാദത്തിലും മന്ത്രി പ്രതികരിച്ചു.
നഴ്സിങ് പരിശീലനത്തെക്കുറിച്ച് വിവാദ പരാമർശം
കേരളത്തിൽ പഠിച്ച നഴ്സുമാർക്ക് ഇഞ്ചക്ഷൻ മാറി നൽകുന്നതുപോലുള്ള പിഴവുകൾ സംഭവിക്കാറില്ലെന്നായിരുന്നു മന്ത്രിയുടെ മറ്റൊരു പരാമർശം. മറ്റു സംസ്ഥാനങ്ങളിൽ പഠിച്ചെത്തുന്ന നഴ്സുമാരാണ് ഇത്തരം തെറ്റുകൾ വരുത്തുന്നതെന്നും അവിടങ്ങളിൽ കേരളത്തിലേതിന് സമാനമായ പഠനരീതിയല്ല ഉള്ളതെന്നും അദ്ദേഹം ആരോപിച്ചു. സംസ്ഥാനത്ത് കൂടുതൽ നഴ്സിങ് സീറ്റുകൾ അനുവദിക്കുമെന്ന് മുഖ്യമന്ത്രി ഉറപ്പുനൽകിയതായും നിലവിലെ 100 സീറ്റുകൾ 200 ആയി ഉയർത്തുമെന്നും മന്ത്രി അറിയിച്ചു.
കെഎംഎസ്‌സിഎല്ലിൽ ഉദ്യോഗസ്ഥർ എത്താത്തതിന് കാരണമെന്ത്?
കെഎംഎസ്‌സിഎല്ലുമായി ബന്ധപ്പെട്ട കാര്യങ്ങളിൽ ഉദ്യോഗസ്ഥർ തന്റെ അടുത്തേക്ക് എത്താത്തതിനെക്കുറിച്ചും മന്ത്രി വിശദീകരിച്ചു. മരുന്ന് കമ്പനികളുടെ പ്രതിനിധികളെ തന്റെ അടുത്തേക്ക് കൊണ്ടുവരരുതെന്ന് കർശന നിർദേശം നൽകിയിട്ടുണ്ടെന്ന് അദ്ദേഹം പറഞ്ഞു.
മരുന്നുകളുടെ ഗുണനിലവാരം പരിശോധിക്കേണ്ടത് ഉദ്യോഗസ്ഥരുടെ ഉത്തരവാദിത്തമാണ്. ഗുണനിലവാര പരിശോധനയുടെ ഉത്തരവാദിത്തം ഏറ്റെടുക്കേണ്ടിവരുമെന്നതിനാലാണ് ഉദ്യോഗസ്ഥർ എത്താത്തതെന്നാണ് മന്ത്രിയുടെ വിശദീകരണം.
'50/50' എന്ന് പറഞ്ഞാൽ നിരവധി ഉദ്യോഗസ്ഥർ എത്തും. എന്നാൽ അത്തരമൊരു നിലപാട് സ്വീകരിക്കാത്തതിനാലാണ് ആരും വരാത്തതെന്നും കെ. മുരളീധരൻ കൂട്ടിച്ചേർത്തു.
